د لوګر د ولایتي شورا او د میدان وردګو چارواکي وايي، له نوي تاکتیک څخه په استفادې وسلهوال طالبان د جګړې پر ځای لویې لارې تړي او په خلکو کې وېره خوروي.
د لوګر د ولایتي شورا رئیس ناصر غیرت د سې شنبې په ورځ ازادي راډیو ته وویل، امنیتي ځواکونه باید په دې برخه کې ځانګړی پام وکړي.
دی وايي:
"په دې وروستیو کې د لوګر امنیتي وضعیت ډېر خراب شوی وړمه ورځ د امنیت د رئیس په کاروان حمله شوې وه، د یوه ساعت لپاره د لوګر-کابل لویه لاره د ترافیکو پر مخ تړل شوې وه او همدا شان د روژې په میاشت کې طالبان سړک ته راوتلي و."
دا په داسې حال کې ده چې د سې شنبې په سهار په ميدان وردګو ولايت کې د جګړې له امله د کابل-کندهار لويه لاره د ترافيکو پر مخ تړل شوې ده.
د دغه ولایت د والي ویاند عبدالرحمن منګل ازادي راډیو ته وویل چې وسلهوالو طالبانو د سید اباد ولسوالۍ په مربوطاتو کې د خلکو موټرونه په لویه لاره کې درولي او لارهیې تړلې وه.
ښاغلي منګل زیاته کړه:
"طالبانو نن سهار لویې لارۍ او موټر په سړکونو کې درولي وو، موټروانانو یې کیلیانې ایستې وې او لویه لارهیې وتړله، وروسته ملي اردو له وسلهوالو طالبانو سره جګړه پيل کړه او هغوی تهیې درانه تلفات واړول."
دا په داسې حال کې ده چې د دوشنبې په ورځ د کابل-شمال لویه لاره د بغلان د دوشي ولسوالۍ په کېلهګي سیمه کې د وسلهوالو مخالفینو لهخوا بنده شوې وه.
په ورته وخت کې د دفاع وزارت په ځینو ځایونو کې د وسلهوالو مخالفینو له لوري د لویو لارو تړل کېدل مني.
د دغه وزارت ویاند جنرال دولت وزیري ازادي راډیو ته وویل، د لویو لارو امنیتیې په لومړیتوبونو کې دی او د امنیت د ټینګښت لپاره به خپلې ګزمې زیاتې کړي.
وزیري وویل:
"کله کله وسلهوال طالبان د غلو په څېر د دوو پوستو په منځ کې راوځي، زموږ هغه پوستې چې د لارې په سر دي او امنیت ساتي هڅه کوي چې ګزمې زیاتې کړي او د وسلهوالو مخالفینو مخه ونیسي د وسلهوالو ځواکونو هڅه دا ده چې د دوی مخه ډب کړي، ځکه د لویو لارو د امنیت خوندیتوب زموږ په لومړیتوبونو کې دی."
ښاغلی وزیري زیاتوي چې د میدان وردګو د سید اباد ولسوالۍ په سیمه کې چېرته چې وسلهوالو طالبانو لاره بنده کړې وه په جګړه کې وسلهوالو طالبانو ته درنه مرګ ژوبله اوښتې ده.
د لوګر د ولایتي شورا رئیس وايي، کله چې وسلهوال طالبان لارې وتړي یو شمېر کسان له دولت سره د همکارۍ په تور له ځان سره وړي چې وروستهیې برخلیک نامعلوم وي.
راپور: رحمتالله افغان
