د کندهار امنیتي چارواکي وايي، د دولت وسلهوالو د کندهار په شاوليکوټ ولسوالۍ کې ۷۰ ملکي کسان برمته کړي دي.
امنیتي چارواکي وایي، د افغان حکومت وسلهوالو مخالفینو دغه کسان د شاوليکوټ له څو کليو څخه په دې خاطر بيولي چې له دوی سره يې همکاري نهکوله.
د کندهار امنیتي چارواکي وایي، وسلهوالو له تېرې اوونۍ راهیسې د شاوليکوټ له ماڼو، چينار او ځينو نورو سيمو څخه له ۷۰ زيات کليوال له ځانه سره بېولي دي.
د کندهار د امنيه قوماندانۍ ویاند ضيا دُرانی وایي، وسلهوالو مخالفینو د تېرې چهارشنبې په ورځ د شاوليکوټ د ماڼو پر قرارګاه له بريد وروسته دغه کسان له ځانه سره نا معلوم ځای ته بیولي دي.
دُرانی وایي، وسلهوالو مخالفينو ۷ برمته شوی کسان وژلي، خو ۲۰ تنه یې بېرته خوشې کړي او ۳۳ تنه لا هم لادرکه دي.
دراني وویل:
"له دې جملې څخه چې ۷۰ نفره دي، ۷ نفره يې په شهادت رسولي، ۲۰ نفره يې خوشې کړي او ۳۳ نفره لا هم نادرکه دي."
د پوليسو ویاند وایي، ممکن وسلهوالو دغه کسان له هغوی سره د نه همکارۍ په تور برمته کړي وي، خو نوموړی وایي، د ملکي کسانو د خلاصون لپاره یې هڅې پیل کړي دي.
ښاغلي دُراني زیاته کړه:
"زموږ امنیتي ځواکونه پلټنې کوي چې د برمته شوو کسانو د ځای څرګ ومومي او د هغوی د خلاصون لپاره عملیات وکړي."
وسلهوالو تر اوسه په دې اړه څه نهدي ویلي او نه د ملکي کسانو د برمته کولو په اړه بشري بنسټونو تبصره کړې ده.
راپور: محمدصادق رښتینی