په داسې حال کې چې په افغانستان کې روانه جګړه تر ډېره بريده د مخدره موادو له کښت، تولید او قاچاق څخه تمویلېږي، د امریکا د نشهيي موادو پر ضد د مبارزې او د قانون د حاکمیت په نړیواله اداره کې د دغه هېواد د بهرنیو چارو وزیر مرستیال ویلیم برون فیلډ ټینګار کوي چې له مخدره موادو سره له مبارزې پرته، له ترهګرۍ سره مبارزه نهشي بریالۍ کېدای.
ویلیم برون فیلډ چې په یوه رسمې سفر کابل ته راغلی و، له افغان چارواکو سره تر لیده کاته وروسته د خپل سفر په پای کې د سې شنبې په ماښام خبریالانو ته وویل، له افغان حکومت سره دې نتیجې ته رسېدلی چې د افغانستان د جګړې د پای لپاره باید له مخدره موادو سره مبارزه ګړندۍ او نوره هم جدي شي.
نوموړي زیاته کړه:
"موږ پر دې توافق وکړ، دا ناممکنه ده چې په افغانستان کې د ترهګرۍ او مخدره موادو ګواښ يو له بله جلا وبلل شي، ځکه هغه ډلې چې ترهګریز فعالیتونه کوي، د مخدره موادو په قاچاق کې هم ښکېلې دي."
تر دې مخکې افغان حکومت د امریکا متحده ایالاتو ته وړاندیز کړی و چې په افغانستان کې د جګړې د بریالیتوب په خاطر دې د وسلهوالو ډلو مالي سرچینې چې ډېره برخهیې د مخدره موادو له کښت، تولید او قاچاق څخه ترلاسه کېږي لهمنځه یوسي او بايد له مخدره موادو سره مبارزه سیمهییزه بڼه غوره کړي.
د افغانستان د نشهیي موادو پر ضد د مبارزې وزارت هم ویلي، تر څو چې د مخدره موادو پر ضد مبارزه کې د سیمې هېوادونه شريک نهشي او په دې برخه کې صادقانه مبارزه ونهکړي د افغان حکومت مبارزه به مطلوبه نتیجه ورنهکړي.
په افغانستان کې له تېرې یوې نیمې لسیزې راهیسې د نشهیي توکو پر وړاندې مبارزه کېږي او په دې برخه کې د نړۍ ځیني هېوادونه لکه امریکا او بریتانیا په میلیونونو ډالر لګوي، خو د شنونکو په باور نهیوازې دا چې دې مبارزې تر اوسه کومه مطلوبه نتیجه نهده ورکړې، بلکې ورځ تر بلې د نشهیي موادو په تولید کې زیاتوالی راغلی دی.
ښاغلی برون فیلډ بیا د مخدره موادو پر وړاندې د افغان ځواکونو هڅې بریالۍ بولي، خو د ستراتېژيو په پلي کولو کې د افغان حکومت او نړیوالې ټولنې پر لا ډېرې همغږۍ ټینګار کوي.
دی وايي:
"ما افغان چارواکو ته وړاندیز وکړ چې دا ښه فرصت دی، څو کابل او واشنګټن له مخدره موادو سره د مبارزې په برخه کې خپله ستراتېژي بیا وارزوي او د کوکنارو د اړولو په برخه کې ټینګه اراده وکړي."
په ورته مهال کې د ولسي جرګې د مخدره موادو پر ضد د کمېسیون غړی، شهزاده شاهد د افغان حکومت او نړیوالې ټولنې له لوري د جلا-جلا ستراتېژیو پلي کول په افغانستان کې د مخدره موادو پر ضد د روانې مبارزې د نیمګړتیا یو لامل بولي.
ښاغلی شاهد ټینګار کوي چې اړتیا ده تر څو په افغانستان کې د مخدره مواد د تولید او نړۍ تهيې د قاچاقو د مخنیوي لپاره په ملي او نړیواله کچه موجودې ستراتېژۍ سره همغږي شي.
شاهد زیاته کړه:
"که موږ غواړو چې افغانستان له مخدراتو خلاص شي او نړیوالو ته هم مخدره مواد د قاچاقو په شکل ونهرسېږي، د دې لپاره یوه دقیقه پالېسي په کار ده او پر دې پالېسۍ صادقانه عمل په کار دی."
یو شمېر کارپوهان په دې باور دي چې په افغانستان کې د مخدره موادو پر ضد په مبارزه کې باید تېرې ناکامې تجربې تکرار نهشي.
کارپوه خالد سادات وايي، که امریکا او نړیواله ټولنه غواړي چې په افغانستان کې د مخدره موادو د تولید او نړۍ تهیې د قاچاقو مخه ونیول شي باید په ټولو برخو کې له افغان حکومت سره مشوره وشي او د مخدره موادو پر ضد په نوې ستراتېژۍ کې د افغان چارواکو نظرونو او وړاندیزونو ته ځای ورکړل شي.
راپور: عبادالله حنانزی