د کندز وروستۍ ناامني د دې سبب شوې چې بالاخره جګپوړي امنیتي او دفاعي چارواکي دغه ولایت ته سفر وکړي.
د ملي دفاع وزارت سرپرست طارقشاه بهرامي، د کورنیو چارو وزارت امنیتي مرستیال مراد علي مراد، د ملي امنیت ریاست مرستیال او په ولسي جرګه کې د دفاعي چارو د کمېسیون مسؤل او د کندز د خلکو استازی د دوشنبې په ورځ دغه ولایت ته د خپل سفر په ترڅ کې د پراخو پوځي عملیاتو د پیلېدو خبره وکړه.
د ملي دفاع وزارت سرپرست طارقشاه بهرامي له رسنیو سره د خبرو پر مهال وویل:
"موږ په دې خاطر راغلي یو ځکه کندز له لوړ امنیتي ګواښ سره مخ دی، څو د کندز د سیمهییزو چارواکو امنیتي پلانونه او وړانديزونه وګورو او موږ د دوی له پلانونو سره همغږي یو او زموږ امنیتي او دفاعي ځواکونه دا وړتیا لري چې په هر شرایط کې د کندز له خلکو څخه دفاع وکړي."
په ورته وخت کې د کورنیو چارو وزارت امنیتي مرستیال مراد علي مراد د کندز خلکو ته ډاډ ورکړ چې ډېر ژر به د دغه ولایت په خاناباد ولسوالۍ کې ټول غیر مسؤله وسلهوال خلع سلاح او د قانون منګولو ته بهیې وسپاري.
ښاغلي مراد زیاته کړه:
"زه د کندز د خلکو ټولې ستونزې او اندېښنې تائیدوم، ځکه غیر مسؤله وسلهوالو چې کومې ستونزې او ننګونې په خاناباد ولسوالۍ کې د خلکو پر وړاندې جوړې کړې دي، خو هغه خلک چې زموږ پر وړاندې جنګېږي دومره ستونزې نهدي جوړې کړي، لکه څومره چې خپلسرو وسلهوالو د خلکو پر وړاندې جوړې کړي او د دغو غیر مسؤله وسلهوالو د خلع سلاح کولو په اړه امنیتي او دفاعي ارګانونو جدي پلان نیولی دی او ډېر ژر به د دوی پر وړاندې عملي اقدام کېږي."
بلخوا په ولسي جرګه کې د دفاعي چارو د کمېسیون مسؤل او د کندز د خلکو استازې شایسته باز ناصري د کندز پر روان وضعیت اندېښنه وښوده، خو له دغو راغلو جګپوړو چارواکو څخهیې وغوښتل چې د دې ولایت امنیتي وضعیت ته جدي پاملرنه وکړي.
نوموړي زیاته کړه:
"کومې اړیکې چې موږ له خلکو سره درلودې موږ تهیې ډېرې اندېښنې وزېږولې نو په همدې خاطر کندز ته راغلو چې د خلکو او د چارواکو خبرې له نېږدې واورو، څو امنیتي او دفاعي ارګانونه په کندز کې موجوده ناامنیو او د خپلسریو پر وړاندې جدي اقدام وکړي."
دغه لوړپوړي امنیتي او دفاعي چارواکي به داسې حال کې کندز ته سفر کوي چې لا هم د دغه ولایت د ښار په نېږدې څنډو کې وسلهوال مخالفین حضور لري او وخت نا وخت د دې ولایت بېلابېلې سیمې د وسلهوالو مخالفینو او د افغان ځواکونو ترمنځ د درنې جګړې شاهد وي.
راپور: اجمل ارین
