د افغانستان دفاع وزارت وايي هڅه کوي چې د بروکسل په ناسته کې د ملي اردو د سمبالښت لپاره د ناټو لا ډېره همکاري جلب کړي.
د دغه وزارت د ویاند مرستیال محمد رادمنش د چهارشنبې په ورځ ازادي راډیو ته وویل چې د دفاع سرپرست وزیر به د ملي اردو د سمبالتیا لپاره هغه طرحې چې د ده په وینا ډېر کار پرې شوی د بروکسل په ناسته کې شریکې کړي.
دا چې دغه طرحې په کومو برخو کې دي او څومره کولای شي د ناټو غړي هېوادونه قانع کړي ښاغلی رادمنشیې په اړه وايي:
"څلور کلن پلان چې موږ ورباندې په موفقیت کار کړی، د فساد په مقابل کې د مبارزې، د ملي اردو د بیارغونې، په اردو کې د ځوان او مسلکي کادرونو ځای پر ځای کول او د کشف او د استخباراتو د تقویې په برخو کې به خبرې وشي."
د ناټو د دفاع وزیرانو ناسته به د چهارشنبې په ورځ د بلجیم په پلازمېنه بروکسل کې پیل او تر درېیو ورځو به دوام وکړي.
که څه هم دا لومړی ځل نهدی چې د ناټو د دفاع وزیرانو په ناسته کې د افغانستان د حالت په اړه بحث کېږي، خو ښايي دا لومړی ځل وي چې افغان حکومت په دغه ناسته کې پر پاکستان د فشار راوړلو هڅې کوي.
ناټو دا مهال په افغانستان کې شااوخوا ۱۳ زره سرتېري لري خو دغه سرتېري په جګړه کې برخه نهاخلي او یوازې له افغان ځواکونو سره د روزنې، سمبالښت او سلا مشورې په برخو کې همکاري کوي.
له دې وړاندې په ۲۰۱۶ میلادي کال کې د ناټو سازمان د دفاع وزیرانو په غونډه کې امریکا او د ناټو غړو هېوادونو ژمنه کړې وه چې تر ۲۰۲۰ میلادي کاله به د افغان ځواکونو ملاتړ ته دوام ورکړي.
خو اوس افغان حکومت تمه لري چې حالت ته په کتو نړیواله ټولنه او په ځانګړې توګه د ناټو غړي هېوادونه د افغان ځواکونو سمبالولو ته هم پاملرنه ډېره کړي.
د چارو ځيني کتونکي که څه هم د افغان ځواکونو سمبالول مهم بولي خو په افغانستان کې د امنیت او ثبات د ټینګښت لپاره د ترهګرو د ځالو لهمنځه وړل حتمي ګڼي.
ناصر شفیق په دې اړه وايي:
"د افغان ځواکونو تجهیر او سمبالنه په کار ده، اما دا هم ضروري ده چې پر هغه ځای فشار راوړل شي له کومه ځایه چې جګړه رهبري کېږي."
د ښاغلي شفیق په خبره افغان حکومت باید د ځواکونو د سمبالښت او پر پاکستان د فشار تر څنګ په خپله په افغانستان کې هم د جګړې انګېزې لهمنځه یوسي.
د ناټو د دفاع وزیرانو دا غونډه په داسې وخت کې جوړېږي چې امریکايي جنرالان په افغانستان کې د جګړې د کابو کولو په هدف د موجوده ستراتېژۍ د نوي کولو لپاره له افغان چارواکو سره په سلا مشورو بوخت دي.
راپور: محمد حدیث پردېس
