پاکستاني پوځ د سې شنبې په ورځ وویل، د افغانستان سره د ډیورند پر کرښهیې د امنیت د ښه کېدو په هدف د دېوال جوړول پیل کړي.
خو دې اقدام په کابل کې افغان چارواکي غوسه کړي او وايي چې پاکستان د ډیورند کرښې ته نېږدې د هېڅ ډول تأسیساتو د جوړولو حق نهلري.
پاکستان او افغانستان د ډیورند کرښې چې ۲۴۰۰ کېلو متره اوږدوالی لري خپلو کې وېشلی.
دا کرښه په ۱۸۹۶ میلادي کال کې بریتانوي واکمنو راښکلې او افغان حکومتیې له پاکستان سره د خپل رسمي سرحد په توګه نهمني.
د پاکستان د پوځ د خبرپاڼې په وینا پر ډیورند کرښه د دېوال جوړولو لومړی پړاو په باجوړ، مومندو، خېبر او قبایلي سیمو کې بشپړېږي.
پاکستاني پوځ همدارنګه زیاته کړې چې په دې سیمو کې د ترهګرو له تګ راتګ څخه د مخنیوي او دفاعي پیاوړتیا لپاره پوځي چاوڼۍ او سرحدي پوستې هم جوړوي.
خو په کابل کې افغان چارواکي وايي، له دوی سره پر ډیورند کرښه د دا ډول تأسیساتو د جوړولو په اړه هېڅ ډول سلا او موافقه نهده شوې.
د افغانستان د سرحدونو او قبایلو د چارو سرپرست وزیر عبدالغفور لېوال ازادي راډیو ته وویل، دا کار د سیمې د خلکو د بېلتون پرته بل کوم هدف نهلري او افغان حکومت د دا ډول اقداماتو مخالف دی.
نوموړی وايي:
"د افغانستان له حکومت سره په دې برخه کې هېڅ ډول توافق وجود نهلري. د افغانستان حکومت پر دې نظر دی چې د ډیورند پر فرضي کرښې د هر ډول موانعو جوړول د سیمې له ثبات سره کومه مرسته نهشي کولای، یوازې د دې سیمې د خلکو د بېلتون او د حقونو د پایمالېدو سبب کېږي او افغان حکومت به د هغه څه چې د سیمې د خلکو په زیان وي مخالفت وکړي."
خو د پاکستان چارواکي ټینګار کوي چې د دواړو هېوادونو تر منځ پر کرښه د دېوال جوړول د دواړو هېوادونو په ګټه دي.
د پاکستان د پوځ خبرپاڼه وايي:
"پر کرښه یو ښه تنظیم شوی امنیتي مېکانیزم د سولې او ثبات سره مرسته کوي."
خو ښاغلی لېوال وايي، ترهګر د پاکستان په ښارونو کې ځای لري، نوموړی د اسامه بن لادن د وژل کېدو ځای ته اشاره وکړه او زیاتهیې کړه، د قبایلي سیمو اوسېدونکي پر دوی د تپل شوې ناامنۍ او ترهګرۍ قرباني دي.
غفور لېوال ازادي راډیو ته وویل، د ترهګرۍ پر ضد اقدامات د پاکستاني لوري رښتینی نیت او اراده غواړي، نه پر ډیورند کرښه د دېوالونو جوړول.
د ښاغلي لېوال په وینا دا دېوال جوړونه پاکستان د یو سیاسي تاکتیک په توګه کاروي.
د افغانستان د کورنیو چارو وزارت هم پر ډیورند کرښه د پاکستان لهخوا د دېوال د جوړونې پر ضد خبرداری ورکړی.
د کورنیو چارو وزارت ویاند نجیب دانش اسوشیټېډ پرس خبري اژانس ته ویلي:
"پاکستان د افغانستان سره پر کرښه د هېڅ ډول دېوال یا نورو تأسیساتو د جوړولو حق نهلري."
ښاغلې دانش د پاکستان لهخوا پر ډیورند کرښه د دېوال جوړولو په صورت کې د متقابلو اقداماتو خبرداری ورکړی او وايي:
"تر دې مخکې هم پاکستاني چارواکو د کرښې سره نېږدې د ودانیو د جوړولو تېروتنه کړې چې زموږ لهخوا له سخت عکسالعمل سره مخ شوي، هیله ده چې دوی به بیا داسې تېروتنه نهتکراروي."
د دواړو هېوادونو تر منځ وروستۍ ناندرۍ په داسې حال کې راپورته کېږي چې ټاکل شوې په نېږدې ورځو کې د چین د بهرنیو چارو وزیر کابل او اسلاماباد ته د دواړو هېوادونو تر منځ د منځګړیتوب لپاره سفرونه وکړي.
د چین د بهرنیو چارو وزیر کابل او اسلاماباد ته سفر کوي
ارګ: د چین د بهرنیو چارو وزیر او یو پاکستانی پلاوی کابل ته راځي
کابل ته د چین د بهرنیو چارو د وزیر سفر او د سولې په اړه هيلې
همدارنګه افغان چارواکو ویلي چې د پاکستان یو پلاوی هم په راتلونکو څو ورځو کې کابل ته راځي چې په دوه اړخیزو مسئلو به خبرې وکړي.
