په کندز کې د یو شمېر بار وړونکو موټرو چلوونکي شکایت کوي چې له دوی څخه د لارې په اوږدو کې د ترانسپورټ، د لوړ تناژ ترازو کارکوونکي او پولیس باج اخلي.
دغه چلوونکي وايي چې دوی پر وخت خپل ترانسپورټي محصول او مالیات ورکوي، خو بیا هم دوی د لارو په اوږدو کې په بېلابېلو پلمو ځورول کېږي.
د بار وړونکو موټرو د چلوونکو په استازیتوب احمد جاوید خبرداری ورکوي، که دغه روان وضعیت ته اړوند ارګانونه توجه ونهکړي، نو خپل فعالیتونه به بند کړي.
نوموړی وايي:
"مشکل دا دی چې د لارې په اوږدو کې له موږه د ترانسپورټ کارکوونکي همدارنګه د بلند تناژه ترازو کارکوونکي غیر قانوني اخاذي اخلي او پوستې هم له موږه پیسې غواړي، خو د قانون په مطابق څوک کار نهکوي."
په ورته وخت کې د کندز د ترانسپورټ رئیس سید جواد جلالي د بار وړونکو موټرو د چلوونکو دغه ادعاوې ردوي وايي، که د دوی کارکوونکي د داسې چلند پر مهال وپېژندل شي، ورسره جدي قانوني چلند کوي.
دی وايي:
"ما په وار وار موټر چلوونکو او ترانسپورټي شرکتونو ته خبر ورکړی. که له ستونزو سره مخ شوې، نو فوراً موږ او یا کشفي ارګانونه پرې خبر کړئ، څو له خلافکاره کارکوونکو سره قانوني چلند وشي."
بلخوا د کندز امنيه قوماندان عبدالحمید حميدي هم وايي چې پولیس د دې حق نهلري چې د لویو لارو په اوږدو کې د بار وړونکو موټرو له چلوونکو پیسې واخلي.
ښاغلی حمیدي زیاتوي چې دوی د ډاډمن امنیت په خاطر د کندز-تخار او د کندز-بغلان په لویو لارو کې نوې امنیتي پوستې جوړې کړي، څو خلک په ارامه فکر سفر وکړي.
ښاغلی حمیدي وايي:
"موږ هڅې کوو، څو د لویو لارو امنیت خوندي وساتو، موږ ګرځنده ګزمې جوړې کړي چې د دغه ولایت د لارو په اوږدو کې د خلکو د سر او مال امنیت خوندي وساتو همدارنګه د ناامنیو او نورو ستونزو مخه ونیسو."
د کندز-تخار او کندز-بغلان لویې لارې د شمال او شمال ختیځ ولایتونو له مهمو ترانزیټي لارو څخه شمېرل کېږي چې شیرخان، د حیرتان او د اقينې سوداګریز بندرونهیې سره نښلولي دي چې له همدې لارو سوداګریز توکي د منځني اسیا هېوادونو همدارنګه د هېواد نورو ولایتونو ترمنځ صادر او واردېږي.
راپور: اجمل ارین