د ارزګان ولایت د ګېزاب ولسوالۍ سیمه ییز چارواکې وايي، که ولایتي اداره ورته پاملرنه ونهکړي نو دغه ولسوالۍ به د وسلهوالو طالبانو لاسته ولوېږي.
د دغې ولسوالۍ ولسوال خوشحال بارکزي د جمعې په ورځ ازادي راډیو ته وویل چې ولسوالۍ له تېرو اتو میاشتو راهیسې وسلهوالو طالبانو محاصره کړې خو ولایتي اداره ورته هېڅ پام نهکوي او په خبره يې چې نه هم د وسلهوالو طالبانو په پرتله غټې وسلې په واک کې ورکول شوي دي.
نوموړی وايي چې نور له وسلهوالو طالبانو سره د جګړې توان هم نهلري.
ښاغلي خوشحال زیاته کړه:
"موږ ټوله ولسوالۍ کې یو ټانک نهلرو، یو رینجر موټر نهلرو، امنیتي پوستو ته اکمالات پر موټر سایکلو کوو، وسلهوال طالبان اشتادوپنج لري، زموږ مهمات خلاص شوي."
ښاغلي خوشحال دا هم وویل چې په څو-څو ځلي يې ولایتي او مرکزي ادارې ته وړاندیزونه کړي چې مهماتو ته اړتيا لري خو تر اوسه يې دغه اړتیاوې نهدي پوره شوي.
دا په داسې حال کې ده چې څه موده مخکې د ارزګان ولایت دهراوود او چنارتو ولسوالېو امنیه قوماندانانو هم شکایت کړی وو چې ولایتي ادارې له پامه غورځولې او د مهماتو له کمي سره مخ دي.
په ورته وخت کې د ارزګان ولایتي ادارې مسؤلین هم دغه ستونزې تر یوه حده مني او د حل ژمنه يې کوي.
د دغه ولایت د والي ویاند دوست محمد نایاب ازادي راډيو ته وویل چې دغه ولایت کې د خالد په نوم پوځي عملیات پیل شوي چې د دغه عملیاتو څخه یو هدف هم دا دی چې د ولسوالېو او مرکز ترینکوټ ترمنځ لارې خلاصې کړي او په خبره يې چې په نژدې راتلونکې کې به د ټولو ولسوالېو لارې د ترافیکو پرمخ خلاصې شي.
ښاغلي نایاب زیات کړه:
"موږ ټولو ولسوالېو کې ستونزې لرو او لارې يې تړلي، خو موږ یوه میاشت مخکې ټولو ولسوالېو ته د پنځو میاشتو مهمات د هوا له لارې رسولي. "
د یادونې وړه ده چې ارزګان یو د افغانستان له هغه نا امنه ولایتونو څخه دی چې د مسؤلینو په خبره له تېرو اتو میاشتو راهیسې وسله والو طالبانو په دغه ولایت کې پر افغان امنیتي ځواکونو او دولتي تاسیساتو پراخ بریدونه پیل کړي چې لا هم پهکې د جګړې ډګر تود دی.
راپور: شریف الله شرافت ــ ارزګان