په افغانستان کې د قاطع ملاتړ مأموریت وايي، د دوی د ارزونو له مخې لومړنۍ پایلې ښيي چې د امريکايي پوځيانو د ننګرهار پر اچین ولسوالۍ ستره هوايي حمله کې د داعش ډېری مرکزونه لهمنځه تللي نو ځکه ویلی شي چې دا یوه بریالۍ حمله وه.
د غوڅ ملاتړ مأموریت ویاند بېل سالوین وايي چې پهدې ستر بمي برید سره د داعش هغه مرکز هم لهمنځه تللی چې د سړک غاړې بمونه پهکې جوړېدل.
نوموړی وايي:
"د ارزونو له مخې د تونلونو جوړښت لهمنځه تللي چې دا یوه مثبته خبره ده او د دغه برید له امله د سړک غاړې بمي حملو کې کمښت راغلی ځکه په همدغه سیمو کې جوړېدل چې اوس هېڅ هم نهشته، موږ باور لرو چې د «GBU43» بم استعمال هغه هدف وو چې موږ ترلاسه کړ."
د روان لمریز کال د حمل په ۲۴مه نېټه ماښام مهال امریکايي پوځيانو د ننګرهار په اچین کې د داعش یا اسلامي دولت ډلې پر پټنځایونو تر ټولو ستر غیر هستوي بم چې د بمونو د مور په نوم هم یادېږي استعمال کړ چې د دغې ډلې لسګونه غړو تهيې مرګ ژوبله واړوله.
د دغه سترې بمي حملې په اړه په کور دننه او بهر او په ځانګړي ډول د سیمې خلکو خپل مثبت او منفي غبرګونونه وښودل خو د افغانستان دفاع وزارت وايي چې په داعش ډلې د دې بمې برید تأثیرات خورا زیات دي.
د دغه وزارت ویاند دولت وزیري د دوشنبې په ورځ ازادي راډیو ته وویل، د دوی څېړنې چې لا هم پای ته نهدي رسېدلي ښيي چې په برېد کې د ۱۳ بهرنیو قوماندانانو په ګډون نېږدې ۲۰۰ داعشیانو ته مرګ ژوبله اوښتې ده.
ښاغلي وزیري زیاته کړه:
"په داعش باندې يې ډېر زیات تأثیر کړی دی، ډېر کسانيې وژل شوي ډېر يې ټپیان شوي دي، ستر مرکز يې د امنیتي ځواکونو لاس ته ورغلی او دوی ترې وتلي یا وژل شوي، ټپيان شوي او یا تښتېدلي دي، د دې تر څنګ د داعش مورال ضعیفه شوی او هغه وسلې او مهمات چې دلتهيې ساتلي وو هغه ټول زموږ لاس ته راغلل."
ښاغلي وزیري وویل چې د اچین ولسوالۍ په مامند تنګي سیمه کې لا هم د داعش یا اسلامي دولت نومې ډلې پر ضد د افغان ځانګړو ځواکونو هوايي او ځمکني تصفیوي عملیات روان دي.
هغه وايي چې دوی به په سیمه کې د داعش ډلې د بشپړ لهمنځه وړلو لپاره خپلو پوځي عملیاتو ته دوام ورکړي.
راپور: اکرامالله اکرام
