د ننګرهار په لیرو پرتو سیمو کې د تېر په څېر د کوکنارو پراخه کښت شوی دی.
ولایتي چارواکي وايي، هغه ارقام چې دوی ته رسېدلي شااوخوا ۱۴ زره هکټاره ځمکه کرل شوې چې په خبرهيې په نېږدې راتلونکي کې به د کوکنارو کښت پر ضد کمپاین پيل شي.
د ننګرهار ولایت ویاند عطالله خوګياڼی وايي، ولایتي اداره پلان لري چې روان کمپاین کې به تر یو نيم زر هکټاره ځمکه باندې د کوکنارو کښت لهمنځه یوسي.
نوموړی وايي:
"تقریباً د ۱۴ زره هکټارو په شااوخوا کې به د کوکنارو کښت شوی وي خو موږ د یو نیم زر هکټاره ځمکې د اړولو اټکل کړی چې انشاءالله په راتلونکي کمپاین کې بهيې واړوو."
که څه هم هر کال د ولایتي ادارې لهخوا د کوکنارو د کښت پر ضد پراخ کمپاینونه کېږي ولې بیا هم اکثرو ناامنو سیمو کې د کوکنارو کښت نه حاصل اخیستل شوی.
د سیمې خلک وايي، ولايتي ادارې تر اوسه بزګرانو سره هغسې مرسته چې لازمه ده نهده کړې.
دوی وايي، همدا لامل دی چې اکثرو سیمو کې خلک د اقتصادي ستونزو له امله پر خپلو کروندو کوکنار کري.
دوی زیاتوي:
"زه محمد زمان یم، د کوکنار کروندې زیاتو سیمو کې شوي لکه پچيراګام، خوګياڼو، شيرزاد، هسکې مېنې او د سرخرود ځينو سیمو کې کرل شوي دي، ځينو ولسوالیو کې خو بېخي د ولسوالۍ مقام په یو کېلو مترۍ کې کرل شوي خو خلک مجبوره دي ځکه د حکومت لهخوا ورسره مرسته نهده شوې چې بديل ورته پيدا شي."
"شبير مې نوم دی، د خوګیاڼو یم، تر اوسه حکومت د کرنې برخه کې دهقانانو سره مرسته نهده کړې چې خلک بدیل کښت وکړي نو خلک د اقتصادي ستونزو له کبله کوکنار کري."
خو د ولایت ویاند عطالله خوګياڼی وايي، سږ کال د کمپاین بڼه بدله ده او هره سیمه کې چې د کوکنارو کښت اړول کېږي په بدل کې بزګرانو سره مرسته کېږي.
دی وايي، په دې وروستیو کې یې د ترکيې ځيني روزل شوي بوټي هم ننګرهار ته راوړي که بزګرانيې وکري د کوکنارو په پرتله به ورته ګټور تمام شي.
ښاغلي خوګیاڼي زیاته کړه:
"څو ورځې وړاندې د ترکيې څخه ننګرهار ته روزل شوي بوټي چې هغه د مالټو ، مڼو دي او نورو مېوهجاتو دي چې دا سوداګریزه بڼه لري دوو کالونو کې حاصلات ورکوي چې که دهقانان دا بوټي وکري د کوکنارو نه ښه حاصل او ښه عايد په لاس ورکوي."
اوسمهال د ننګرهار له لسو په ډېرو ولسواليو کې کوکنار کرل شوي چې د ولايتي ادارې د معلوماتو له مخې په نېږدې راتلونکي کې به د دې کښت پر ضد کمپاین ترسره شي.
بلخوا د سیمې خلک وايي، که راتلونکی کمپاین د تېرو کمپاینونو په څېر نمایشي وشي نو هېڅ لاسته راوړنه به ونهلري.
دوی له مسؤلينو غواړي هغه پیسې چې د کوکنارو د کښت پر ضد کمپاینونو او پروګرامونو لګول کېږي که په هغې له بزګرو سره مرسته وشي نو د دې ستونزې مخه به هم ورسره ونیول شي.
راپور: شاهمحمود شینواری