پسرلی د نړۍ په نور هېوادونو کې د هیلو او خوشحالي موسم ګڼل کېږي خو افغانستان کې بیا پهکې د جګړې اور بل وي او په دغه موسم کې جګړه له افغانانو ډېره قرباني اخلي.
روانې ناامنۍ او ژمي کې د وسلهوالو مخالفینو له لوري د ځينو ولسوالیو سقوط د مدني ټولنو او عامو خلکو اندیښنې زیاتې کړي.
یو شمېر مدني فعالانو د جمعې په ورځ کابل کې د یوه خبري ناستې په ترڅ کې له روان امنیتي وضعیته اندیښنه وښودله او له حکومت یې وغوښتل چې د را روان پسرلي لپاره پوره چمتوالی ونیسي.
د ټولنیزعدالت په نوم د مدني بنسټ غړی مصطفی اریا په دغه ناسته کې وویل:
"موږ افغانستان له مدریتي ضعف او امنیتي برخه کې د سټراټیژۍ له نشتون سره مخ یو او له بده مرغه چې راتلونکې پسرلی به د تېرو کلونو په پرتله ګواښونکې وي، ځکه وسلهوالو طالبانو ژمي کې خپل عملیات پیل کړي."
د ټولنیز عدالت په نوم دغه مدني بنسټ سیمه کې د پاکستان، ایران، چین او روسیې لهخوا جوړ شوي ائتلاف د افغانستان لپاره خطرناک ګڼي او وايي چې حکومت باید د ترورېزم سره د مبارزې د مدریت لپاره د دغه هېواد د متحدینو لازیات ملاتړ جلب کړي.
دغه اندیښنې داسې مهال دي چې له دې مخکې د ملي شورا یو شمېر وکیلانو هلمند، ارزګان او یو شمېر نورو ولایتونو کې د بد امنیتي وضعیت په اړه اندیښنه ښودلې وه او تازه د بغلان ولایت د تاله و برفک ولسوالۍ سقوط دغه اندیښنې زیاتې کړي دي.
خو د افغانستان دفاع وزارت وايي، د وسلهوالو مخالفینو لهخوا د یوه ولسوالۍ مؤقتي سقوط د افغان ځواکونو د ضعف په معنی نهده.
د دغه وزارت ویاند دولت وزیري ازادي راډیو ته وویل، افغان ځواکونه په روان کال کې ښه روزل شوي، تجهیز شوي او چمتو دي چې د وسلهوالو مخالفانو هر ډول بریدونه شنډ کړي.
ښاغلي وزیري زیاته کړه:
"هیله لرم چې پسرلي کې جګړه ونهشي، خو که دوام پیدا کړي او وسلهوال مخالفین جګړې ته دوام ورکړي افغان ځواکونه پورته چمتو دي چې له خپل هېواده دفاع وکړي او خپل ولایتونونه او ولسوالۍ وساتي."
د ټولنیز عدالت په نوم دغه مدني بنسټ د افغان ځواکونو مدریتي ضعف ته په اشارې سره وايي، که امنیتي بنسټونو کې اصلاحات رانه وستل شي ناامنۍ به لا زور واخلي.
په ورته وخت کې د دغه بنسټ مسؤلین د حکومت د مشرانو ترمنځ ته شته اختلافاتو پر هواري ټینګار کوي او له حکومته غواړي چې د سیمه ییزو او نړیوالو سیالیو څخه ګټه پورته کړي.
راپور: عبادالله حنان زی