د افغانستان مشرانو جرګه وايي، د پرویز مشرف څرګندونې د افغانستان د همیشنۍ ادعا چې پاکستان د ترورېزم ملاتړی دی، په حقیقت بدلوي.
د مشرانو جرګې لومړی مرستیال فرهاد سخي د سې شنبې په ورځ ازادي راډیو ته وویل، پاکستان تل هڅه کړې چې د افغانستان کورنیو چارو کې مداخله وکړي او د خپلو ګټو په خاطر د ترهګرو ډلو پهواسطه زموږ په هېواد کې جنګ تود وساتي.
ښاغلي سخي زیاته کړه:
"پاکستان هېڅکله د افغانستان د خلکو تر څنګ نهو او په یو ډولیې غوښتي چې خپلې ګټې خوندي وساتي، دوهم دا چې هېڅکله وفادار نهو او خبرې یې نړیوالو ته د منلو نهدي، ځکه چې په نړیواله کچه د ترهګرو سترې ځالې په پاکستان کې دي او نړۍ هم پر دغې موضوع پوهېدلې."
دا په داسې حال کې ده چې د پاکستان پخواني جمهور رئيس پرویز مشرف ویلي چې له ۲۰۰۱ لومړي کال وروسته، پاکستان د افغان حکومت پر ضد، د طالبانو ډلې له سره تنظیم او تجهیز کړي.
مشرف د پاکستان ډان ورځپاڼې ته ویلي چې پاکستان د افغانستان د زیانمولو لپاره له طالبانو کار اخیستی او د ده په خبره دا د دې لپاره چې د افغانستان پخواني جمهور رئيس حامد کرزي د هند ملاتړ کاوه او دا کار د پاکستان په ګټه نهو.
پرویز مشرف دا هم ویلي چې افغانستان کې یې د نیابتي جګړې ملاتړ کړی دی.
مشرف د افغانستان د ملي یووالي حکومت ته اشاره کړې او ویلي يې دي چې له اشرف غني سره باید هر اړخیزه مرسته وشي او دا ځکه چې اشرف غني په سیمه کې د سولې د ټینګښت لپاره وروستۍ هیله ده.
هڅه مو وکړه چې په دې هکله د افغان حکومت نظر ولرو خو دغه حکومت دومره وايي چې دا ډول څرګندونې رسمي نهدي، له همدې امله نهغواړي چې په اړهیې خبرې وکړي.
اوسمهال چې د کابل او اسلاماباد تر منځ اړیکې ترینګلې شوي، دا ډول څرګندونې څه مفهوم بیانولای شي؟
ایا پاکستان له کابل سره د اړیکو رغول غواړي او که غواړي چې په روانو حالاتو کې د نړیوالو ذهنونه بدل کړي؟
په دې اړه د سیاسي چارو کارپوه بشیر بيژن وايي:
"زما باور دا دی چې پاکستان له افغانستان سره د اړیکو په ښه کولو فکر نهکوي بلکې د پاکستان هڅې د سیمې او له سیمې څخه بهر نورو هېوادونو ته دي چې لابيګري وکړي او خپلو جنایتونو ته ادامه ورکړي."
د ښاغلي بېژن په خبره د افغانستان خلک باید وپوهېږي چې طالبان هم د هېواد په ښېګڼه فکر نهکوي بلکې د افغانستان د خلکو د تباهۍ، بربادۍ او وژنو لپاره هڅې کوي.
دی وايي، پهکار ده چې د افغان حکومت مشران هم په هېواد کې د پاکستان د لاسوهنو په اړه نړیوالې ټولنې ته موجود اسناد او شواهد وسپاري څو د افغانستان د خلکو حقانیت ثابت شي.
راپور: خان محمد سیند
