په کندهار کې د پاکستان سره پر پوله د سپين بولدک-چمن د لارې د بندېدو له امله سلګونه کسان د تېرو دوو ورځو را هیسې په دواړو خواوو کې بند پاتې دي.
د سپين بولدک کمیسار محمد علي داوري ازادي راډیو ته وویل چې د پاکستاني لوري سره یې څو ځله خبرې کړي، خو هغوی ورته ویلي چي لار به د پاکستاني چارواکو تر بل امر پوري تړلې وي.
د نوموړي په وینا د لارې د بندېدو له امله سلګونه کسان د تېرو دوو ورځو را هیسې په دواړو خواوو کې بند پاتې دي.
د ده په خبره دا کسان تر ډېره هغه مسافر دي چې د نورو ولایتونو راغلي او د لارې له بندېدو څخه ناخبره و.
نوموړی زیاته کړه:
"ټول هغه مسافر چې د نورو ولایتونو ناخبره راغلي اوس د سپین بولدک ولسوالۍ په هوټلونو کې شپې کوي د دوی سره ناروغان او ښځې هم
دي."
ښاغلی داوري وايي، دوی به د لارې د پرانیستلو لپاره خپلو هڅو ته دوام ورکړي.
د کندهار په سپین بولدک ولسوالۍ کې د بولدک – چمن تر منځ پر دغه لار هره ورځ زرګونه کسان تګ راتګ کوي.
دغه لار د جمعې په شپه د سیند ایالت په یوه زیارت کي تر چاودنې وروسته د پاکستان حکومت لخوا وتړل شوه.
بلخوا د هېواد د سوداګرۍ بورډ چارواکي وایي، د سپین بولدک - چمن د لارې تړل کېدل به سوداګر يو ځل بيا له درنو مالي زيانونو سره مخ کړي.
د ياد بورډ مشر رحيم الدين حاجي اغا ازادي راډیو ته وویل چې هره ورځ د چمن له لارې په سوداګريزو مالونه بار سلګونه موټرونه افغانستان ته راځي چې د لارې له تړل کېدو وروسته دا چاره په ټپه درېدلې او ټول زیان به یې افغان سوداګرو ته ورسېږي.
نوموړي زیاته کړه:
"دا لار چې هر څوک بند وي زیان یې زموږ سوداګرو ته رسېږي تاسي وګورئ هره ورځ په سلهاوو کانټېنره مالونه راځي پر دې مالونو هره ورځ مالیه راځي."
د سوداګرۍ بورډ چارواکي غوښتنه کوي چي افغان دولت دې د لارې د پرانیستنې لپاره جدي اقدامات وکړي.
دوی دغه راز له پاکستاني چارواکو هم ورته غوښتنه کوي اووايي چې دولتونه دې سوداګري او سیاست نه سره ګډوي.
راپور :محمدصادق رښتینی
