د افغانستان جمهور رئیس د جمعې په شپه د مونیخ په امنیتي غونډه کې د ګډون لپاره جرمني ته ځي.
د جمهور رئیس مرستیال ویاند شاه حسین مرتضوي د پنجشنبې په ورځ ناوخته په کابل کې یوې خبري ناستې ته وویل، د تاوتریخوالي پنځمه څپه چې داعش دی د مونیخ په ناسته کې به د جمهور رئیس د وینا اصلي محور وي.
نوموړی وايي:
"جمهور رئیس به نن شپه جرمني ته سفر وکړي، جمهور رئیس به په دې ناسته کې پر افراطیت او بنیاد ګرایي او د ترورېزم پر خطرونو چې سیمې او نړۍ ته متوجه دي، خبرې وکړي."
د ملي امنیت سلاکار محمد حنیف اتمر، د ماليې وزیر اکلیل حکیمي او یو شمېر نور لوړپوړي دولتي چارواکي د جمهور رئیس د دغه سفر ملګري دي.
پخوا تر دې جرمني کې ورته دوه نورې ناستې هم جوړې شوې دي.
د مونیخ امنیتي ناسته د امنیت او بهرني سیاست په اړه، یوه ستراتیژیکه نړیواله ناسته ده چې هر کال پهکې یوه مهمه نړیواله امنیتي موضوع مطرح کېږي او د غونډې ګډونوال پرې بحثونه کوي.
ویل کېږي چې د مونیخ په دغې ناسته کې به د چارواکو د بحث مهمې موضوعګانې د منځني ختیځ د هېوادونو بحران، د نړۍ مختلفو سیمو کې له جنګونو څخه د میلیونونو بېځایه شویو ستونزې او له ترورېزم سره مبارزه وي.
په ورته وخت کې د سیاسي چارو کارپوه ودیر صافي ازادي راډیو سره په خبرو کې د ترورېزم پر وړاندې د مبارزې لپاره د جمهور رئیس اشرف غني په لا هڅو او په دې مبارزه کې د نړیوالو د ملاتړ پر جلبولو ټینګار وکړ.
نوموړی وايي:
"که د ترورېزم زیانونه چې سیمې ته متوجه دي، نړیوالو ته تثبیت کړي، دا د افغانستان په ګټه دي، په داسې حال کې چې افغانستان اوسمهال د سیمهییزو او نړیوالو ترورېستي حملو قرباني دی."
که څه هم افغان کارپوهان د ورته تېرو نړیوالو ناستو څخه راضي نهښکاري خو وايي چې د ملي یووالي حکومت چارواکي باید نړیوال د داعش د ډلې له خطرونو څخه چې افغانستان، سیمې او نړۍ ته متوجه دي، خبر کړي.
راپور: خان محمد سیند