په کندز کې د ولایتي شورا یو شمېر غړي او په ولسي جرګې کې د دې ولایت ځینې استازي وايي، سره له دې چې په دغه ولایت کې مېشتو وسلهوالو ته د پاکستان له لوري اکمالات ممکن نهدي خو وایي چې وسلهوالو طالبانو نوي وسلې تر لاسه کړي دي.
دوی د سیمې د اوسیدونکو په حواله وایي چې وسلهوال طالبان د تاجکستان له پولي وسلې ترلاسه او په کښتیو کې یې د آمو سیند دې غاړه ته را لېږدوي.
په ولسي جرګه کې د کندز د خلکو استازي عبدالودود پیمان ازادي راډيو ته وویل، د خلکو له ډېرو شکایتونو وروسته یې دا اندیښنې د تاجکستان له سفیر سره هم شریکې کړي دي.
نوموړی وايي:
"طالبان د شپې لهخوا په کښتیو کې لیدل کېږي او په آمو سیند کې کښتۍ تګ راتګ کوي، د تاجکستان سفیر دا موضوع رد کړې او وايي چې دا کښتۍ د افغانستان په خوا کې چلېږي، دوی وايي زموږ پولي زموږ په لاس کې دي او روسان نشته خو د سیمې خلک اندیښنې لري. "
له دې وړاندې د کندز پخواني والي محمد عمر صافي ازادي راډيو ته ویلي چې روسي ځواکونو د داعش له ډاره د تاجکستان او کندز ترمنځ په سرحدي سیمو کې حضور پیدا کړی، وسلهوال طالبان تجهیزوي او وخت نا وخته ورسره لیده کاته هم کوي.
په همدې حال کې د کندز د ولایتي شورا رئیس محمد یوسف ایوبي وايي، د سیمې خلک په دې باور دي چې طالبان له همدې لارې وسلې را لېږدوي خو دی وایي چې دا موضوع لا مستنده شوې نهده.
ښاغلي ایوبي زیاته کړه:
"داسې خبرې شته او اوازې اورېدل کېږي خو موږ دقیق معلومات نهلرو او کشفي ارګانونه باید معلومات راکړي. "
طالبانو لا تر اوسه په دې اړه تبصره نهده کړې.
کندز په تېرو دوه کلونو کې د افغان حکومت او وسلهوالو طالبانو تر منځ د سختو جګړو شاهد پاتې شوی ان د دې ولایت مرکز دوه ځلي په مؤقت ډول سقوط هم وکړ.
له کندزه مخکې د فراه ولایت چارواکو هم ویلي چې په دغه ولایت کې له وسلهوالو سره روسي مارک وسلې شته.
په افغانستان کې د غوڅ ملاتړ ماموریت د ځواکونو قومندان جنرال جان نیکلسن هم د امریکا د سنا د پوځي خدماتو په کمېټې کې روسیه او ایران له طالبانو څخه په ملاتړ تورن کړی.
سره له دې چې د وسلهوالو طالبانو څخه د روسيي او ایران ملاتړ د ملي شورا د غړو او افغان څیړونکو اندیښنې راپارولي خو د افغانستان دفاع وزارت لا هم د موضوع د څېړلو خبره ک وي.
د دې وزارت ویاند دولت وزیري د یکشنبې په ورځ ازادي راډيو ته وویل چې د دې موضوع په اړه به هر اړخېزې پلټنې وشي.
نوموړی وايي:
"موږ تر اوسه پورې کوم مؤثق اسناد نهلرو خو په دې هکله پوښتنې او څېړنې کوو کهواقعیت ولري په هغې صورت کې به د بهرنیو چارو وزارت او یا د دولت نور مسؤل مقامات خپل نظر اعلان کړي. "
روسي چارواکو هم له طالبانو سره اړیکې تائید کړي خو ویلي یې دي چې دا اړیکې یې د داعش پر ضد د جګړې د سټراټیژی تر حده دي.
تردې وړاندې د افغانستان د ملي شورا ځینو غړو او سیاسي څیړونکو ویلي چې افغان حکومت باید له هرې ممکنې لارې په دې هېواد کې د امریکا او روسیې د تقابل مخه ونیسي.
یوسف خان ځدراڼ