ولسمشر غني د انتخاباتو خپلواک کمېسیون ته په اشارې سره ویلي چې د اصلاحاتو د راوستلو، د انتخاباتو د نېټې د معلومولو او د اړتیاوو د فهرست جوړولو برخه کې هڅې وکړي څو کارونه پرته له کوم ځنډه ترسره شي.
ولسمشر غني ویلي، حکومت د هر اړخېز اصلاحاتو د راوستلو او د ولسي جرګې د انتخاباتو د ترسره کولو لپاره قوي سیاسي اراده لري.
د ولسمشر د ویاند مرستیال شاه حسین مرتضوي د پنجشنبې په ورځ په دې اړه ازادي راډیو ته وویل:
"د ټاکنو خپلواک کمېسیون ته ویل شوي چې خپل پلانون لکه د انتخاباتو نېټه او د اړتیاوو لېست چمتو او د انتخاباتو تاریخ دې له خلکو سره شریک کړي."
ولسمشر غني دا څرګندونې د چهارشنبې په ماښام په یوه غونډه کې د ټاکنو د خپلواک کمېسیون له کمېشنرانو، د ملګرو ملتونو له ځانګړي استازي او د بهرنیو هېوادونو له یو شمېر سفیرانو سره په خبرو کې کړي.
ولسمشر غني ویلي، حکومت د انتخاباتو د ترسره کولو لپاره ۳۰ میلیونه ډالر په پام کې نیولي او د ټاکنو کمېسیون باید خپل پلانونه داسې تنظیم کړي چې د لګښت د کمښت لامل شي.
ولسمشر دغه شان ویلي چې د ټکنالوژۍ برخه کې باید یوه تخصصي کمېټه جوړه شي څو تر ډېره د انتخاباتو شفافیت تضمین کړي.
ده د انتخاباتي کمېسیونونو د تېرو ستونزو پر بنسټیز حل هم ټینګار کړې دی.
په دغه ناسته کې اجرائیه رئیس عبدالله عبدالله هم ویلي چې حکومت په انتخاباتي کمېسیونو کې د اصلاحاتو راوستلو ته ژمن دی او د پلان پر بنسټ عملي کېږي.
د ملګرو ملتونو د سرمنشي ځانګړي استازي او افغانستان کې د بهرنیو هېوادونو یو شمېر سفیرانو د انتخاباتو په اړه د افغان حکومت دغه دریځ ستایلی دی.
خو د انتخاباتو د خپلواک کمېسیون رئیس نجیب احمدزی وايي، دوی په دغه ځانګړي شوې بودجې نهشي کولای چې راتلونکي انتخابات ترسره کړي.
ده د پنحشنبې په ورځ ازادي راډیو ته وویل، د اصلاحاتو راوستل او کورني کارونه یې په لومړیتوبونو کې دي نه د انتخاباتو نېټه.
نوموړی وايي:
"د اصلاحاتو پرته د انتخاباتو ترسره کیدل ناممکنه ده، لومړۍ غواړو چې په مرکز او ولایتونو کې اصلاحات راوستل شي او له هغه وروسته د ټاکنو پر نېټې کار کوو."
په ورته وخت کې د افغانستان پر انتخاباتو د څار د بنسټ رئیس جانداد سپینغر وايي، د انتخاباتو کمېسیون تر اوسه خپل فعالیتونه نهدي روښانه کړي او ان د راتلونکي کال په دوبي کې هم د دغو انتخابات د ترسره کولو لپاره هیله نشته.
نوموړی وايي:
"د انتخاباتو کمېسیون تر اوسه کوم واضح پلان نهدې وړاندې کړې چې له مخې یې د اصلاحاتو او د انتخاباتو د ترسره کولو لپاره کوم اقدام شوی وي، لاتر اوسه ډیر کارونه پاتې."
د هغه په خبره د اصلاحاتو پرته د ټاکنو ترسره کېدل د خلکو په سترګو کې د خاورې شیندل دي.
دی ټینګار کوي لومړۍ اړتیا ده چې کمېسیون خپل کورني کارونه تنظیم کړي او له هغه وروسته د انتخاباتو د ترسره کولو لپاره لاس په کار شي.
عبادالله حنان زی