تمه ده چې د افغانستان، پاکستان او د ملګرو ملتونو د کډوالو چارو ادارې استازي په پاکستان کې غونډه وکړي.
په دې غونډه کې به له پاکستانه د افغان مهاجرو د ایستلو پر مسئلې خبرې وشي.
د افغانستان اجرائیه رئیس عبدالله عبدالله پرون کابل کې د دې درې اړخیزې غونډې په اړه د افغان کډوالو په چارو کې د ملګرو ملتونو له نوې عالي کمېشنرې فاتحه مجذوب عبدالله سره خبرې وکړې.
د اجرائیه ریاست مرستیال ویاند جاوید فیصل ازادي راډیو ته وویل چې افغان لوری به د پاکستان په غونډه کې پر دې ټینګار وکړي چې افغانان باید پرېښودل شي چې په خپله خوښه خپل هېواد ته راشي.
ښاغلي فیصل زیاته کړه:
"د افغانستان، پاکستان او «UNHCR» غونډه په پلان کې ده چې د پاکستان په کوربتوب د راتلونکې عیسوي میاشتې یعنې د فبرورۍ په ۱۵مه نېټه جوړه شي. د بحث مسئلهیې په پاکستان کې د افغان کډوالو د اسنادو او بېرته افغانستان ته د ستنېدو ده، که دا پروسه په مارچ میاشت کې ترسره کېږي، نو پهکار ده چې دغه افغانان خپل هېواد ته په خپله خوښه ستانه شي."
په پام کې ده چې په دې درې اړخیزه غونډه کې د افغانستان د کډوالو او راستنېدونکو چارو وزیر سید حسین عالمي بلخي د افغانستان په استازیتوب برخه واخلي خو تر اوسه دا خبر په رسمي ډول نهدی اعلان شوی.
بل لور ته ملګرو ملتونو په پاکستان کې یو پروګرام پیل کړی چې هر افغان کولای شي چې د پاکستان له امنیتي ادارو شکایت وکړي، کهیې له پاکستانه په زوره د دوی د ایستلو هڅه کړې وي.
د ملګرو ملتونو د کډوالو چارو ادارې د چهارشنبې په ورځ وویل چې افغان مهاجر کولای شي چې د ټویټر، فېسبوک او یا هم عادي پیغام له لارې له ملګرو ملتونو سره خپل شکایت ثبت کړي.
ملګري ملتونه وایي چې په دې ډول به دوی د کډوالو پر ستونزو لا ښه خبر شي.
د جرمني اژانس په باور د بشري حقونو فعالان وایي، د دې سربېره چې اسلاماباد ۱۳ لکه افغان کډوالو ته د روان میلادي کال تر اخره په پاکستان کې د اوسېدو اجازه ورکړې ده، بیا هم د دغه هېواد امنیتي ادارې له بېلابېلو لارو پر افغان کډوالو فشار راولي ترڅو افغانستان ته ستانه شي.
داسې ښکاري چې د افغان مهاجرو پر ثبت شویو شکایتونو به په راتلونکې درې اړخیزه غونډه کې چې د فبروري په ۱۵مه په پاکستان کې جوړېږي خبرې وشي.