افغان چارواکي وايي د کندهار مرستیال والي عبدالعلي شمسي چې د تېرې شپې په چاودنه کې سخت ټپونه اخیستي وو ساه ورکړه.
د ولسمشر د ویاند مرستیال دواخان مینهپال پر خپله فېسبوک پاڼه دا خبر تائید کړی خو په دې اړهیې نور جزئیات نهدي ورکړي.
پخواني معلومات:
د کندهار امنیه قوماندان جنرال عبدالرازق وايي چې د سې شنبې ماښام په چاودنه کې ۱۱ کسان وژل شوي او د کندهار د والي ډاکتر همایون عزیزي او د عربي متحده اماراتو د سفیر په ګډون ۱۲ نور ټپیان دي.
قوماندان که څه هم په دغې پېښه کې د مرستیال والي عبدالعلي شمسي ممکنه وژل کېدل تائید کړي خو د محلي ارګانونو خپلواکې ادارې د شپې ناوخته وویل چې د والي مرستیال ژوندی خو شدید زخمونه لري.
جنرال عبدالرازق چې خپله تر چاودنې مخکې د پېښې له ځایه وتلی و ازادي راډیو ته وویل چې چاودنه د هغو چاودېدونکو موادو په نتیجه کې رامنځته شوې چې د ولایت مقام د مېلمستون په کوچونو کې ځای پر ځای شوي وو.
قوماندان وايي، د ټپیانو حالت د اندېښنې وړ نهدی خو وژل شوي کسان داسې سوځېدلي چې د پېژندلو وړ نهدي.
په وژل شویو کسانو کې یوازې دقیقاً د عربي متحده اماراتو د پنځو ډیپلوماتانو او د پخواني جمهور رئیس د نېږدې خپل یما قریشي جسدونه پېژندل شوي دي.
د کندهار د بهرنیو چارو رئیس شاه احمد سعید او د ولسي جرګې استازي باز محمد جوزجاني د مرګ او ژوند په اړه تر اوسه رسمي معلومات نهشته.
د کندهار ملي سوداګر هاشم کرزی او حاجي محمد صدیق مهمند چې په دغې میلمستیا کې ګډون کړی وو د ټپیانو په ډله کې شامل دي.
بلخوا د کندهار د میرویس روغتون مسؤلین وايي چې ورته د تېرې شپې د پېښې کوم ټپي نهدی وروړل شوی.
په ورته وخت کې د کندهار پوځي روغتون ته چې د تېرې شپې د پېښې ټپیان وروړل شوي، یوې سرچینې ازادي راډیو ته وویل چې د ټپیانو په ډله کې د کندهار مرستیال والي نهشته کېدای شي وژل شوی وي.
د یادولو وړ ده چې دغه چاودنه د هغې مېلمستیا پر مهال رامنځته شوې چې د کندهار چارواکو د عربي متحده اماراتو د سفیر لپاره برابره کړې وه.
د عربي متحده اماراتو سفیر د سې شنې په ورځ د کوچنیانو لپاره د یوه ښوونځي د جوړولو د چارو د پیل لپاره کندهار ته راغلی و.
وسلهوالو طالبانو دغه حملې کې لاس لرل رد کړي.
پخوانی:
د کندهار ولایت مقام مېلمستون کې یوه چاودنه شوې.
د کندهار ولایت مقام ویاند صمیم خپلواک ازادي راډيو ته وویل چې دغه چاودنه د دغه ولایت مقام د مېلمستون په کوچونو کې د ځای پر ځای شویو چاودېدونکو توکو له امله رامنځته شوې.
ښاغلی خپلواک زیاتوي چې په دغې چاودنه کې ۵ تنه وژل شوي او د کندهار والي ډاکتر همایون عزیزي او افغانستان کې د عربي متحده اماراتو د سفیر جمعةالکعبی په شمول ۱۴ تنه ټپیان شوي او له چاودنې وروسته اور لګېدنه هم رامنځته شوې چې ځیني کسان هم سوځېدلي دی.
ښاغلي خپلواک د وژل شویو کسانو د هویت په اړه لازیات معلومات ورنهکړل.
یوې بلې باوري سرچینې د نوم نه ښودلو په شرط ازادي راډیو ته وویل چې په یاده پېښه کې د کندهار مرستیال والي عبدالعلي شمسي او د کندهار ولایت د بهرنیو اړیکورئیس شاه محمد هم وژل شوي دي.
دغه پېښه داسې محال رامنځته کېږي چې افغانستان کې د عربي متحده اماراتو سفیر له یو شمېر سوداګرو او د دغه ولایت چارواکو سره د ولایت مقام په مېلمستون کې په یوې مېلمستیا کې ګډون درلود.
رپوټونه وايي چې دغې مېلمستیا ته د کار او ټولنیزو چارو وزیره نسرین اوریاخېل او د کندهار امنیه قوماندان جنرال عبدالرازق هم وربلل شوي خو روښانه نهده چې دوی په دغې مېلمستیا کې ګډون درلود که نه؟
وړاندې له دې د کندهار ولایت مقام یوې سرچینې د نوم نهښودلو په شرط ازادي راډيو ته وویل چې په دغې چاودنه کې د کندهار والي ډاکټر همایون عزیزي او افغانستان کې د عربي اماراتو سفیر هم ټپيان شوي چې ښاغلی عزیزي د کوما په حالت کې دی.
په کندهار کې د ازادي راډيو خبریال محمد صادق رښتینی وايي چې سیمه د امنیتي ځواکونو لهخوا کلابند شوې او د پېښې ځای ته چا ته د تګ اجازه نهورکوي.
نوموړی وايي چې په سیمه کې امبولانسونه لیدل کېږي چې ظاهراً د پېښې ټپيان روغتونونو ته انتقالوي.
تر دې مهاله د دې پېښې مسؤلیت چا په غاړه نهدی اخیستی.
دا په داسې حال کې ده چې کابل ښار هم نن د دوو پرلهپسې چاودنو شاهد وو.
دا چاودنې نن سې شنبه مازيګر د لسو دقیقو په فاصله کې د دارالامان پر سړک وشوې.
د کابل امنیتي مسؤلین تائیدوي چې په دې چاودنو کې مرګ ژوبله رامنځته شوې.
د کابل ښار د اوومې امنیتي حوزې امر احمد ولي صبوري ازادي راډیو ته وویل چې دواړه حملې انتحاري وې چې د ده په خبره د دوو موټرو په واسطه ترسره شوي.
د افغانستان عامې روغتیا وزارت سلاکار خواجه قمرالدین صدیقي ازادي راډیو ته وویل جې په دغې پېښه کې ۳۰ تنه وژل شوي او ۷۸ تنه ټپيان دي چې د ۷ تنو روغتیايي وضعیت نازک دی.