د ارزګان مسؤلین وايي، دا ولایت د افغانستان یو له هغه ناامنه ولایتونو څخه دی چې ۹۰ سلنه برخهيې د وسلهوالو طالبانو تر ولکې لاندې ده او کروندګرو يې د کوکنارو کښت ته مخه کړې ده.
ارزګان ولایت کې د ولایتي شورا وکیل عبدالکریم خادمزوی د پنجشنبې په ورځ ازادي راډیو ته وویل چې د ارزګان ولایت خلک تېرې درې میاشتنۍ جګړې دې ته مجبوره کړي چې د کوکنار کرکېله وکړي، څو له همدې لارې د اړتیا وړ پیسې لاسته راوړي.
نوموړی وايي، د کوکنار کر هغه سیمو کې شوی کوم چې د وسلهوالو طالبانو تر ولکې لاندې وي.
د ده په خبره چې وسلهوال طالبان له همدې لارې عاید لاسته راوړي او حکومتيې باید مخه ونیسي.
ښاغلی خادمزوی وايي:
"د ارزګان ولایت خلک ډېر غریبان دي، کار او کسب نهشته نو ځکه دغه خلک د تاریاکو کرکېلې ته مخه کوي او بل دا چې د ارزګان ولایت زیاتره سیمې د وسلهوالو طالبانو په لاس کې دي ځکه د وسلهوالو طالبانو ۵۰ سلنه جګړه د تاریاکو پیسې تمویلوي."
په ورته وخت کې د ارزګان ولایت د والي مرستیال عبدالواحد پټان ازادي راډیو ته وویل، دوی پلان لري چې د ارزګان ولایت ټولې هغه سیمې چې د وسلهوالو طالبانو تر ولکې لاندې وي لومړی تصفیه او وروستهيې کوکنار لهمنځه یوسي.
نوموړی وايي، موږ هڅه کوو چې د کروندګرو لپاره د کوکنار بدیل کښت پیدا کړو څو دوی خپله د کوکنارو له کښته لاس واخلي.
ښاغلي پټان زیاته کړه:
"موږ د کروندګرو لپاره سړې خونې اصلاح شوي تخمونه په نظر کې لرو، خو ولې موږ د کوکنارو کرلو اجازه هېڅچاته هم نهورکوو، هغه سیمې چې وسلهوال طالبان پهکې نهوي موږ به هرو مرو د هغو سیمو کوکنار لهمنځه وړو."
ښاغلي پټان دا هم وویل چې ارزګان ولایت کې د نشهيي توکو پر وړاندې د مبارزې ریاست د کوکنارو د مخینوي لپاره هېڅ کوم اقدام نهدی کړی ځکه نو دغلته د کوکنارو کښت زیات شوی دی.
هاخوا په ارزګان ولایت کې یو شمېر کروندګر وايي چې دولت د کوکنارو بدیل کښت دوی ته نهدی موندلی او دوی هم مجبوره شوي دي چې د کوکنارو کښت ته مخه کړي.
د ارزګان ولایت یو شمېر کروندګرو ازادي راډیو ته وویل:
"زما نوم سلطان محمد دی، موږ ځکه کوکنار کرو چې سیمه کې اوبه نهلرو، اوبه په ماشینینو له څاه راباسو، نو که غنم وکرو اړتیاوې مو نهراپوره کوي."
"زمانوم حیاتالله دی، ما خپله تاریاک کرلي، که ویې نهکرم، پورونه مې څنکه ادا کړم، دولت دې د کار زمینه رابرابره کړي."
دا په داسې کال ده چې تېر کال هم ارزګان ولایت کې د ولایت مقام په ۱۰ مترۍ کې کروندګرو کوکنار کرلي وو، خو د لهمنځه وړلو لپارهيې هېڅ کمپاین نهو شوی چې د کوکنارو پر وړاندې د چارواکو پڅ دریځ کروندګر نور هم دغه کښت ته زړور کړي.
راپور: شریفالله شرافت