د پاکستان د نړیوال هوايي شرکت «PIA» د ادارې چارواکي وايي چې د دغه شرکت د یوې الوتکې د رالوېدو په نتیجه کې لږ تر لږه ۴۷ کسان مړه شوي دي.
د «PIA» شرکت د چارواکو په خبره، دغه الوتکه د چهارشنبې په ورځ تر غرمې وروسته د خېبر پښتونخوا له لیرې پرتې غرنۍ سیمې چترال څخه اسلاماباد ته روانه وه چې د دغې صوبې د ایبټاباد د حویلیا په غرنۍ سیمه کې رالوېدلې ده.
د یاد شرکت د چارواکو په وینا، دغه «ATR-42» ډوله الوتکه له چترال نه د خېبر پښتونخوا په وخت ۳ نیمې بجې روانه شوې وه او ټاکل شوې وه څلور نیمې بجې اسلاماباد ته ورسېږي، خو اسلاماباد ته څېرمه ایبټاباد کې له راداره لادرکه شوه چې بیا وروستهیې د لوېدو پخلی وشو.
د پاکستان هوايي شرکت د ادارې یوه چارواکي عرفان الهي له رسنیو سره په خبرو کې د الوتکې د لوېدو د پخلي تر څنګ وویل چې په دغې الوتکه کې ۴۲ مسافر او د عملې ۵ تنه سپاره وو چې ټول وژل شوي دي.
نوموړی وايي چې مرستندویه ټیمونه د پېښې ځای ته رسېدلي او مړي یې د پېښې له ځایه تر راایستلو وروسته د ایبټاباد ایوب میډیکل کمپلېکس ته وړي:
"د پېښې له ځایه راایستلي مړي مو د ایبټاباد میډیکل کمپلېکس روغتون ته وړي دي او سیمه کې مو مرستندویه او همداراز د الوتکې د تور بکس د موندلو عملیات پیل کړي، څو د الوتکې د لوېدو د دقیق علت په اړه ترې معلومات او شواهد ترلاسه کړو."
له بلېخوا بیا د پاکستاني پوځ مطبوعاتي څانګې هم ويلي چې د پېښې ځای تهیې مرستندویه ټیمونه ورلېږلي او د مړو په راایستلو یې لاس پورې کړی دی.
د دغې الوتکې د لوېدو د پېښې په وژل شویو کسانو کې ۳۱ سړي، ۹ ښځې او ۲ ماشومان شامل دي چې په دغو کې ۳ بهرني سیلانیان هم دي.
سربېره پر دې په وژل شویو کسانو کې د پاکستان پخوانی پاپ سندرغاړی او اوسنی نعت ویونکی "جنید جمشید" د هغه مېرمن او همدا شان د چترال یو جګپوړي دولتي چارواکی "ډپټي کمېشنر" اسامه وړایچ هم شامل دي.
د رسنیو د راپورونو له مخې، جنید جمشید څو ورځې وړاندې د تبلیغ لپاره له یوه تبلیغي جومات سره یوځای چترال ته تللی وو.
د پېښې عیني شاهدانو رسنیو ته وویل چې الوتکې د لوېدو پر مهال له غره سره له ټکرېدو سره سم اور واخیست او تور لوګي ترې پورته شول.
د پاکستان د هوايي شرکت چارواکي وايي چې د دې هېواد د پېژندپاڼې یا شناختي کارډونو د قومي ادارې (نادرا) د چارواکو یوه ډله د ایبټاباد ایوب میډیکل کمپلېکس ته ورغلې، څو د الوتکې د لوېدو پېښه کې د مړو شویو کسانو بایومیټریک پېژندګلوي وکړي او مړي يې کورنیو تهیې وسپاري.
له بلېخوا بیا د پاکستان صدراعظم نوازشریف د پوځ مشر او ګڼو نورو سیاستوالو د الوتکې د رالوېدو په دغې پېښه خواشيني څرګنده کړې او د وژل شویو له کورنیو سرهيې خواخوږي ښودلې ده.
په پاکستان کې دا د الوتکو د نسکورېدو لومړۍ پېښه نهده، بلکې تر دې مخکې هم د دې هېواد به بېلابېلو سیمو کې الوتکې نسکورې شوي چې سلګونه کسان پهکې وژل شوي دي.
د یادونې وړ ده چې که څه هم د پاکستان د هوايي شرکت چارواکو لا تر دې دمه له چتراله اسلاماباد ته د تلونکې الوتکې د لوېدو د لامل په اړه څه نهدي ویلي، خو په خبرهیې چې د پېښې تحقیقاتیې پیل کړي دي.
راپور: ذبیح مومند