د افغانستان لوی څارنوال د مرکز او ولایتونو د څارنوالانو د کنفرانس د وروستۍ ورځې په غونډه کې وویل، د ښځو پر وړاندې تاوتریخوالی، د ناامنیو او اداري فساد په څېر د هېواد او خلکو په زیان دی.
لوی څارنوال فرید حمیدي نن چهارشنبې په کابل کې د مرکز او ولایتونو د څارنوالانو په کنفرانس کې پر څارنوالانو ټینګار وکړ چې د قضیو د څېړلو پر مهال، د هېواد نافذ قوانین له هر ډول جنسیتي، قومي، نژادي او سیمه ییزو تعصبونو پرته په جدي توګه پلي کړي.
ده وویل، د قانون حاکمیت په هېواد کې د عدالت د تأمینولو، د سولې ټینګښت او د ښځو د حقونو د خوندیتوب یوازینۍ لاره ده.
ښاغلي حمیدي وویل:
"څو چې له بې عدالتۍ سره مبارزه ونه شي او د قانون حاکمیت ځای ونه نیسي، نه شو کولای چې هېواد کې د سولې او ثبات په تمه واوسو. تاوتریخوالی زموږه د ژوند خوښی او د کورنیو سوکالي لهمنځه وړې ده. دغه دوه خطرناکې ویروونکې مسئلې بیا زموږ او د دولت له ټولو ارګانونو نه غوڅه اراده غواړي. څو لاسونه سره یو او پر ضد یې په ګډه مبارزه وکړو."
لوی څارنوال دا هم وویل، د قانون په پلي کولو کې اړتیا ده چې د حکومت نور ارګانونه له لوېې څارنوالۍ سره جدي او دوامداره همکاري وساتي.
ده حکومت ته وړاندیز وکړ چې د هېواد د ویاړنې یو شمېر مډالونه دې د هېواد د اتلو او قرباني شویو ښځو په نامه هم ونومول شي.
د افغانستان د څارنوالانو کنفرانس وړمه ورځ د جمهوري ریاست ارګ ماڼۍ کې جوړه شوې وه چې د څارنوالانو مسلکي ظرفیتونو پر لوړولو او په قضیو کې د قانون پر پلي کولو بحثونه شوي دي.
افغانستان کې د ښځو په وړاندې تاوتریخوالی هغه څه دي چې په وار- وار یې په اړه غونډې جوړې شوي او له اړوندو ارګانونو او ان دیني عالمانو څخه غوښتل شوي چې د ښځو حقونو پر وړاندې یې د تاوتریخوالي مخنیوي برخه کې خلکو ته عامه پوهاوی ورکړي.
غونډه کې د حکومت اجرائیه رئيس عبدالله عبدالله وویل، ځیني کړۍ د ښځو پر وړاندې تاوتریخوالي ته د دود او مذهب پلمې جوړوي خو له تېرو څو کلونو راهیسې حکومت هڅې کړي چې د دې ډول ناجایزه کړنو مخه ونیسي.
ښاغلي عبدالله ژمنه وکړه چې د ښځو اړوند نافذو مقررو او سټراټیژیو کې به د بیا کتنې په اساس هڅه وشي چې د ښځو حقوق په کې خوندي پاتې شي.
دی وايي:
"سخته لاره په مخکې لرو، خو د هېواد په راتلونکې که فکر کوو، اداري فساد او خشونت که په هرځای کې وي، جنسي تېرۍ هم پهکې شاملېدلای شي. زه په دې برخه کې د وړاندیزونو هرکلی کوم او ډاډ ورکوم چې په دې لاره کې به په قوت، جدیت او ټول ظرفیت سره د خلکو ترڅنګ ولاړ ووسو."
د افغانستان بشر حقونو خپلواک کمېسیون هم په دې اړه اندېښنه څرګنده کړې او د ښځو په وړاندې یې هر ډول تاوتریخوالی غندلی دی.
د بشري حقونو رئیسې سیما ثمر د ښځو د ظرفیتونو په لوړوالي ټینګار وکړ.
د غونډې ویناوالو وویل، په قضیو کې له هېواد او خلکو سره وفاداري، صداقت او د ټولنې او اسلام د ارزښتونو په پام کې نیول کولای شي چې له سولې او ثبات سره هم مرسته وکړي.