د ګلبدین حکمتیار په مشرۍ د حزباسلامي مرکچي پلاوی وايي چې ډېر ژر به د دغه حزب یو پلاوی د امریکا متحده ایالاتونو ته سفر وکړي.
وروسته له هغې چې د ګلبدین حکمتیار په مشرۍ د حزباسلامي او افغان حکومت تر منځ د سولې تفاهملیک لاسلیک شو، دغه ګوند هڅې کوي چې اوس په ظاهري ډول له نړۍ په ځانګړي توګه امریکا سره خپلې سیاسي اړیکې بیا جوړې کړي.
د حزباسلامي د مرکچي پلاوي مشر محمد امین کریم د یکشنبې په ورځ ازادي راډیو ته وویل ټاکل شوې چې د حزباسلامي یو څلور کسیز پلاوی د امریکا متحده ایالاتو ته سفر وکړي.
که څه هم ښاغلي کریم د حزباسلامي د پلاوي د سفر هدف د هېواد ملي ګټې او سولې پورې اړوند مسائل بولي، خو په دې اړهیې زیات جزئیات ورنهکړل.
ښاغلي کریم زیاته کړه:
"د امریکا متحده ایالاتو ته د سفر مقصد هغه بحث و چې څو ورځې وړاندې مطرح شوی، خو اوس به له وخته وړاندې وي چې په دې اړه نظر ولرو، البته حزباسلامي به د پخوا په څېر د هېواد ملي ګټو د سولې د راتګ په اړه، لکه چې بهرنیو ځواکونو سره په تماس کې و له بهرنیانو سره هم په اړیکه کې وي."
محمد امین کریم وايي، حزباسلامي د هېواد ملي ګټو او د سولې د ټینګښت لپاره چمتو دی چې له نورو هېوادونو او نړۍ سره ډيپلوماتیکې اړیکې ټینګې کړي.
په ورته وخت کې د حزباسلامي د مرکچي پلاوي بل غړی عتیقالله صافی وايي، امریکا ته د حزباسلامي د څلور کسیز پلاوي مشري به ډاکټر غیرت بهیر کوي.
ښاغلي صافی ټینګار کوي، وروسته له هغې چې د افغان حکومت او حزباسلامي تر منځ د سولې تفاهملیک لاسلیک شو، د نړۍ هېوادونو حزباسلامي سره د اړیکو ټینګولو ته لېوالتیا وښوده، د هغه په وینا دا ډول سفرونه به نورو هېوادونو ته هم دوام پيدا کړي.
نېږدې ۱۰ ورځې وړاندې د ګلبدین حکمتیار په مشرۍ د حزباسلامي او افغان حکومت تر منځ د سولې تفاهملیک لاسلیک شو، افغان حکومت ژمنه کړې د ملګرو ملتونو او امریکا له تور لېسته به د حزباسلامي د غړو نومونه لیرې او بندیزونه به پرې ختموي.
خو د سولې د عالي شورا مرستیال عبدالخبیر اوچقون وايي، امریکا ته د حزباسلامي د سفر هدف د بندیزونو له لیرې کېدو سره اړیکه نهلري.
ښاغلی اوچقون وايي:
"دا چې د حزباسلامي پلاوی امریکا ته ځي، د سولې له توافقلیک سره اړیکې نهلري، که سفر لري، ممکن دوی پورې اړه ولري، د بندیزونو د لیرې کېدو موضوع د حکومت په لومړیتوبونو کې ځای لري."
له بل پلوه د سیاسي چارو کارپوهان وايي چې امریکا ته د حزباسلامي د پلاوي سفر کولای شي، له نورې نړۍ سره د دغه ګوند اړیکې پیاوړې او د سولې بهیر ګړندی کړي.
د دغو کارپوهانو له ډلې مطیعالله خروټی وايي، د حزباسلامي او امریکايي چارواکو مخامخ خبرې د دواړو لورو تر منځ باورونه زیاتوي.
راپور: رحمتالله افغان
