د ملګرو ملتونو سازمان ګواښ کوي چې که له پاکستانه د افغان راستنېدونکو کډوالو وضعیت ته پام ونهشي، ښایي یو جدي ناورین پېښ شي.
دا سازمان وایي، له پاکستانه د راستنو شویو کډوالو وضعیت ته د رسېدنې لپاره ۶۶ میلیونو ډالرو ته اړتیا ده څو د ژمي له رسېدو مخکې پوره مرستې د دوی په اختیار کې کېښودل شي.
د خوړو د نړیوال سازمان مرستیاله انجلین روداکوبنا وایي، دغه مرستې باید د واورو له ورېدو او لارو د بندېدو نه مخکې د افغانستان بېلابېلو سیمو ته ورسول شي.
دې د بروکسل کنفرانس په درشل کې د ګارډین ورځپاڼې ته وویل، که مرسته کوونکي هېوادونه او ټولنې بېړنی اقدام ونهکړي، د افغانستان-پاکستان په پوله کې به یو انساني ناورین پېښ شي.
د خوړو د نړیوال سازمان مرستیاله وایي، مسؤلین باید د راتلونکې یوې میاشتې په ترڅ کې جدي تدبیرونه ونیسي او د هوا د سړېدو له امله د تلفاتو د مخنیوي په خاطر اقدامونه باید د ۳۰ ورځو په ترڅ کې اجرأ شي.
تمه ده د بروکسل په کنفرانس کې چې نن او سبا به د افغانستان په اړه متمرکز وي، په بېلابېلو برخو کې د نړیوالو مرستو ژمنه وشي خو په مشخصه توګه پاکستانه د افغان راستنېدونکو کډوالو د غم خوړلو په باب څه نهدي ویل شوي.
د خوړو نړیوال سازمان اټکل کوي چې خپل وطن ته د افغانانو راستنېدل او له پاکستانه د یو شمېر کډوالو اجباري اېستنه به د دې لامل شي چې د ۲۰۱۶ میلادي کال تر پایه پورې ۶۰۰ زره تنه افغانستان ته راستانه شي چې یوازې څه نا څه ۲۰۰ زره تنهیې قانوني اسناد لري.
په کابل کې د کډوالو په اړه د ملګرو ملتونو د عالي کمېشنرۍ مسؤله مایا امیراتونګا وایي، د سرپناه نهدرلودل په افغانستان کې د راستنېدونکو تر ټولو لویه ستونزه ده.
دې د روېټرز اژانس ته ویلي چې نورې ننګونې هم وطن ته د راستنېدونکو افغانانو په اړه شته.
امیراتونګا زیاته کړه:
"یو له کلیدي مسئلو څخه همدا ده چې دوی چېرې ژوند وکړي. د دوی ځیني کولای شي له خپلوانو سره واوسېږي اما نور ښایي دا امکان ونهلري. نو په خواشینۍ سره هغه څه چې وینو همدا دي چې خلک افغانستان ته په راستنېدو سره بیا هم لکه د بېځایه شویو په شان دي. یعنې دوی د ژوند کولو لپاره یو مؤقت ځای ته ځي او هڅه کوي چې کار پیدا کړي او دا هم یوه بله ننګونه ده."
د پاکستان د پولیسو او حکومت لهخوا د فشارونو په زیاتوالي او دغهراز د هغه هېواد د عادي خلکو لهخوا د سپکاوي له امله، په سلګونه زره افغان کډوال د سږکال په اوږدو کې بېرته افغانستان ته ستانه شوي دي.
د دوی ډېرو کسانو څو لسېزې په پاکستان کې ژوند کړی او هلتهیې کار او سرپناه درلوده.
ګارډین بریتانیایي ورځپاڼه په دې باب لیکي، د خوړو نړیوال سازمان وایي چې دوی په راتلونکو شپږو میاشتو کې څه د پاسه درې میلیونو افغان کډوالو ته د رسېدنې په خاطر د ۵۵ میلیونو ډالرو مرستې له کموالي سره مخامخ دي.
له افغانستانه د نړیوالو قوتونو په وتلو او د مرستندویو پروګرامونو له کمېدو سره د افغان کډوالو لپاره ځانګړې شوې مرستې هم متأثرې شوې دي.
اوس کډوالو ته د مرستې رسولو سازمانانو سترګې د بروکسل کنفرانس ته اړول شوي دي څو د دغې ناستې ګډون کوونکي د سلګونو زرو راستنو شویو افغان کډوالو په وضعیت قطعی پرېکړه وکړي.
