د افغانستان د سوداګرۍ او صنایعو خونه، له ګاونډیو هېوادنو سره د حمل و نقل د ستونزو حل لپاره د کمېټې جوړول او د سیمهییز پیوستون د پلان پلي کول، یو مثبت ګام ګڼي.
یاده خونه وايي، په دې لاره کې باید ټولې ستونزې په ګوته او د حل لارې یې ولټول شي.
د افغانستان د سوداګرۍ او صنایعو خونې ویاند وايي، د دې کمېټي له فعالېدو سره به د سوداګرو ټرانسپورتي ستونزې هوارې شي.
صیامالدین پسرلي د چهارشنبې په ورځ ازادي راډیو ته وویل، د دې کمېټې کار او د سیمهییز پیوستون د پلان پلي کول به د هېواد اقتصادي او سوداګریزه وده پیاوړې او صادرات به زیات کړي.
هغه زیاته کړه:
"موږ خوشبینه یو چې دا کمېټه به د دې سبب شي چې ډېرې سوداګریزې او ټرانزیټي ستونزې هوارې شي."
دا په داسې حال کې ده چې له ګاونډیو هېوادونو سره د حمل و نقل ستونزو د حل کمېټه، د دوشنبې په ورځ د جمهور رئیس اشرف غني لهخوا جوړه شوه.
ښاغلي غني د سیمهییز پیوستون شورا په ناسته کې، د ګاونډیو هېوادونو ترمنځ د موافقتنامې په ارزونې تأکید وکړ او له نوې جوړې شوې کمېټې یې هیله وکړه چې په دې برخه کې ټولې نیمګړتیاوې پوره کړي.
دا کمېټه دنده لري چې د ستونزو پر هوارولو سربېره، د سیمهییز پیوستون د پلان پلي کولو ته هم کار وکړي.
جمهور رئیس ویلي چې دا پلان به افغانستان له ګاونډیو هېوادنو سره ونښلوي او د بندرونو په جوړولو سره به د حمل و نقل چارې اسانه کړي.
کارپوهان وايي، اوسمهال افغانستان د ټرانزیټ په برخه کې یوازې له پاکستان سره ستونزه لري.
پاکستان د روان کال په اسد میاشت کې د چمن سپین-بولدک دروازه د افغانستان د تجارتي مالونو پرمخ تړلې وه او افغانستان هم هغو پاکستانیو لاریو ته اجازه ورنهکړه چې مالونهيې د افغانستان له لارې د منځنۍ اسیا هېوادونو ته لېږدول.
د افغانستان د ټرانسپورت وزارت ویاند حکمتالله کوانچ وايي، په حمل و نقل کې د اسانتیاو د رامنځته کولو په خاطر یو لړ هڅې پیل شوي دي.
هغه زیاته کړه:
"د ترانسپورت وزارت د سلاکارانو او تخنیکي مسؤلینو یوه پلاوي کار پیل کړی، خپل نظریات به اماده او جمهوري ریاست ته بهيې واستوي."
د اقتصادي چارو کارپوه تاج محمد اکبر په دې نظر دی چې د سیمهییز حمل و نقل لپاره باید اقتصادي سیاستونه رامنځته او زېربناوې پیاوړې شي.
هغه زیاته کړه:
"له ګاونډیو سره د سیمهییز حمل و نقل لپاره په لومړي سر کې دوه مسئلې مهمې دي، لومړی سیاست او دوهم د زېربناو جوړول."
ښاغلی اکبر وايي، افغانستان دې په دې برخه کې سیمهییز انډول په پام کې ونیسي او د ترانزیټي مرکز په توګه دې د هېواد د بدلولو په خاطر، زیاتې پانګې جلب کړي.
راپور: خان محمد سیند