د افغانستان مالیې وزارت وایي، د بروکسل په کنفرانس کې د ګډون لپارهیې چمتووالی بشپړ شوی دی.
یاد وزارت وایي، د بروکسل کنفرانس ته د وړاندې کولو لپارهیې له ټولو اړوندو سکټورونو څخه طرحې تر لاسه کړي او چمتو دي چې په دغې غونډه کې ګډون وکړي.
د دغه وزارت ویاند اجمل حمید عبدالرحیمزي د سې شنبې په ورځ ازادي راډیو ته وویل چې د حکومت لهخوا د افغانستان د سولې او ملي پراختیا په چوکاټ کې چې څه موده مخکې نهایي شو، دا ټولې طرحې او وړاندیزونه شامل دي.
هغه زیاته کړه:
"موږ بشپړ چمتووالی لرو په دوه دلیله، یو خو دا چې سند مو نهایي کړی او باالمقابل کومې ژمنې چې موږ د توکیو کنفرانس نه راپدېخوا درلودې، اکثرهیې عملي شوي دي."
د افغانستان اقتصادي خودکفایي او لومړیتوبونه هغه اساسي مسایل دي چې د ښاغلي عبدالرحیمزي په خبره په دغې طرحه کې ځای لري.
نوموړی وایي، په بنسټیزو برخو کې د اوبو، انرژۍ، کرنې، رېل ګاډي پټلۍ او داسې نورو سکټورونو باندې بحث کېږي.
بروکسل کنفرانس د راتلونکې اوکټوبر میاشتې په ۴ او ۵مه د بلجیم مرکز بروکسل کې د ۷۰ هېوادونو او دېرشو سازمانونو د استازو په ګډون جوړېږي، د دغې ناستې هدف له افغانستان سره د نړیوالو اقتصادي مرسته ده.
د دې تر څنګ د ښځو پیاوړتیا، سیمهییزې همکارۍ او د افغان کډوالو موضوع هغه مسایل دي چې د غونډې په څنډه کې به ورباندې بحث وشي.
خو تر څنګیې افغان حکومت اړ دی چې اصلاحات راولي، له اداري فساد سره مبارزه او د بشري حقونو وضعیت سم کړي.
له دې مخکې د توکیو په کنفرانس کې په ۲۰۱۲ کال کې د څلورو کلونو لپاره نړیوالو له افغان حکومت سره د ۱۶ میلیارده ډالرو ژمنه وکړه.
نړیوالې ټولنې یو ځل بیا په ۲۰۱۴ کال د لندن په کنفرانس کې خپله ژمنه تازه کړه.
خو ایا افغان حکومت بروکسل کنفرانس کې د ګډون لپاره پوره چمتووالی لري او که نه په اړهیې د چارو کارپوه قیس محمدي وايي:
"زه فکر کوم د افغانستان حکومت تر ننه پورې هم دې ته تیاري نهلري چې د بروکسل کنفرانس ته ولاړ شي، ځکه ډېرې داسې ژمنې موجودې وې چې موږ کړي، خو تر اوسه مو نهدي عملي کړي."
ښاغلی محمدي وایي، ښایي دا ځل هم د تېرو کنفرانسونو غوندې حکومت ژمنې وکړي او نړیوال هم یوه اندازه مرستې وکړي، خو په خبرهیې دا کار د اوږد مهال لپاره د افغانستان درد نهشي دوا کولای.
نوموړی سپارښتنه کوي چې نړیوال باید له افغانستان څخه د څارنې یو منظم پلان جوړ کړي چې له مخې یې د حکومت ژمنې وخت په وخت تعقیب او د عملي کېدو لپارهیې لازم فشارونه راوړل شي.
تر دې مخکې د پوهنې، ښځو چارو او کډوالو او بېرته راستېدونکو چارو وزارتونو ویلي وو چې بروکسل کنفرانس تهیې خپلې طرحې چمتو کړي دي.
راپور: محمد قسیم سولهمل
