د ناټو عمومي منشي وایي، د سږکال په مني کې به پرېکړه وکړي چې د قاطع ملاتړ ماموریت په چوکاټ کې څه شمېر ځواکونه په افغانستان کې پرېږدي.
ینس سټولټنبرګ نن د پولنډ په مرکز وارسا کې خبریالانو ته وویل، دا مهال د ۱۲ زرو په شا اوخوا کې بهرني ځواکونه د قاطع ملاتړ ماموریت په چوکاټ کې فعالیت کوي او حالاتو ته په کتو به د دغو ځواکونو د کمښت پرېکړه وکړي.
سټولټنبرګ په دې خبري غونډه کې وویل، د ناټو غړي هېوادونه ژمن دي چې تر ۲۰۲۰ کاله پورې د کال شااوخوا پنځه میلیارده ډالره افغانستان ته ورکړي.
سټولټنبرګ وویل، د ملي وحدت حکومت له مشرانو محمد اشرف غني او عبدالله عبدالله سره یې هم لیده کاته شوي او د افغانستان د وضعیت په اړه یې ورسره خبرې کړي دي.