یوې امریکایۍ موسسې په افغانستان کې د امریکایي ځواکونو له لوري اوښتو ملکي تلفاتو ته اندیښنه ښکاره کړې ده.
د دې موسسې د راپور له مخې امریکا په افغانستان کې د جګړې پر مهال د ملکي تلفاتو اغیزو ته ډېر پام نه دی کړی.
دا راپور د اوپن سوسایټي په نوم موسسې د چهارشنبې په ورځ خپور کړ او په کې ویل شوي دي چې ملکي تلفاتو د امریکا پوځي ماموریت اغیزمن کړی دی او د طالبانو بیا راپیدا کیدو ته یې لاره هواره کړې ده.
د راپور له مخې طالبانو له دې تلفاتو د تبلیغاتو په ډول استفاده کړې او خپلو لیکو ته یې خلک جذب کړې دي.
دا په داسې حال کې ده چې امریکایي پوځیانو بیا بیا پر دې ټینګار کړی دی چې دوی د ملکي تلفاتو د مخنیوي لپاره تر وسه وسه هڅې کړې دي.
خو د راپور له مخې امریکایي ځواکونو په افغانستان کې د پنځلس کلنې جګړې پر مهال د هوایي ځواکونو پلانونو ته او د مشخصو هدفونو ویشتلو ته دقیقه پاملرنه نه ده کړې چې له دې امله ملکیان په نښه شوي دي.
د اوپن سوسایټي د راپورونو لیکوال مایکل فلورني دی. داسې اټکل کیږي، که ډیموکراټان د امریکا د ولسمشرۍ انتخابات وګټي دی به د امریکا دفاع وزیر شي.
فلورني وایي:
"تر پنځلس کلنې جګړې وروسته لاهم عکس العملونه لږ دي خو موږ ته پکار دي چې له دې زده کړه وکړو، په ځانګړي ډول د ستراتیژۍ په سطحه."
په راپور کې د ملکي تلفاتو یو شمير پیښو ته اشارې شوې دي او ویل شوي دي چې د پلیو ځواکونو د ملاتړ لپاره بې پلانه هوایي بریدونه د ملکي تلفاتو یو اساسي علت دی.
راپور لیکي چې په ۲۰۰۸ کال کې د ملکي تلفاتو څلور شپیته په سلو کې مسوولیت د هوایي بریدونو وو.
دا هغه کال دی چې تر نورو ټولو کلونو ډیر ملکي تلفات په کې واوښتل.
په افغانستان کې د ملګرو متلو د دفتر، یوناما په وینا په دې کال کې ۸۲۸ ملکیان د دولت پلوه ځواکونو له لورې ووژل شول.
جنرال مک کرسټل په افغانستان کې د امریکایي ځواکونو لومړی عمومي قوماندان و چې په ښکاره یې وویل چې د ملکيانو مرګ ژوبله د دوی له بریالیتوب سره مستقیم ارتباط لري.
تر دې وروسته تر دوه زره دولسم کلونو پورې د ملکي تلفاتو فیصدي ۶۹ په سلو کې راکمه شوه.
په راپور کې ویل شوي دي چې امریکایي ځواکونو په افغانستان کې د ملکي تلفاتو د اوښتو له امله یو شمیر تجربې ترلاسه کړې دي خو لاهم د امریکا دفاع وزارت په دې برخه کې له یو شمیر ستونزه سره مخامخ دی.
