يو امریکايي خبريال او د هغه ژباړن د يکشنبې په ورځ په هلمند ولایت کې تر حمله لاندې راغلل او ووژل شول.
دغو دوو خبريالانو د يوه افغان پوځي واحد سره سفر کاوه چې د جګړې په اړه راپورونه ورکړي.
د څېړونکو په وينا د دوی وژل کېدل ښيي چې د افغانستان جګړه اوس هم د خبريالانو لپاره له خطرونو ډکه ده چې غواړي د دې جګړې په اړه راپور ورکړي.
د يکشنبې په ورځ په هلمند ولايت کې د افغان ځواکونو پر يوه واحد حمله وشوه او په کې دوو خبريالانو خپل ژوند له لاسه ورکړ چې د جګړې په اړه يې د راپور لپاره له دې واحد سره سفر کاوه.
په وژل شوېو کې يو امریکايي خبريال او عکاس پنځوس کلن ډېويډ ګيلکي او د هغه افغان همکار او ژباړن اته دېرش کلن ذبيح الله تمنا دي.
له دوی سره د امریکا د نېشنل پبلک راډيو دوه نور خبريالان ټام بومن او مونيکا ايوفسټاڼيوا په بل موټر کې روان وو خو هغوی ته کوم زیان نه دی رسېدلی.
د نېشنل پبلک راډيو يا این پي ار ويلي دغه موټر چې په کې ګيلکي او تمنا ناست وو مارجې ته نږدې تر حملې لاندې راغلل.
د اين پي ار مشر مرستيال ريس مايکل اوريکيس ويلي چې ډېويډ د افغانستان او عراق د جګړې په اړه د ۲۰۱۱میلادي کال د سېپتمبر راهيسې راپورونه ورکول.
د ده په وینا ډېويډ غوښتل جګړه او په جګړه کې د بندو پاتو خلکو ژوند نړۍ ته ښکاره کړي.
د خبريالانو د ژغورلو کمېټه چې د ازادې خبريالۍ ډله ده، وايي چې د ګيلګي او تمنا تر وژل کېدو مخکې، له ۲۰۰۱میلادي کال راهيسې په افغانستان کې څلورويشت خبريالانو او یو د رسنیو کارکوونکی وژل شوی دی.
په افغانستان کې د خبريالانو د اتحاديې يوه غړي نقيب فانوس ازادي راډيو ته وويل چې په افغانستان کې ټول خبريالان له ګڼ شمېر خطرونو او ستونزو سره مخامخ دي.
ده زياته کړه:
"خبريالان تل د بېلابېلو ډلو، د دولتي او امنيتي ادارو له خوا ګواښل شوي. موږ او تاسو ټول د دې شاهدان يو چې افغانستان داسې هېواد نه دی چې په کې خبريالان په بشپړه توګه خوندي وي. په افغانستان کې د خبريالانو ستونزې ډېرې دي."
د اين پي ار د جنوبي امریکا خبريال لولو ګارسيا ناوارو چې مخکې يې په عراق او منځني ختيځ کې د دې راډیو د ريس په توګه دنده تر سره کړې، پر خپله ټويټر پاڼه کې ليکلي:
"موږ د خپلو مړېو درناوی کوو. موږ دوی په ياد ساتو. موږ پوهیږو د دوی کار ژوندی دی خو دا کافي نه ده. موږ غمجن يو."
د ده په وینا ډېويډ ګيلکي د اين پي ار له تر ټولو غوره خبريالانو څخه يو وو.
