د افغانستان د سولې عالي شورا وایي، له حزب اسلامي سره د موافقه لیک تر امضا وروسته به د تروریستانو له لسته د ګلبدین حکمتیار د نوم د ایستلو قانوني مراحل پيل شي.
د سولې عالي شورا مرستیال عبدالخبیر اوچقون پرون جمعه ازادي راډیو ته وویل، د موافقه لیک یوه کاپي ولسمشر محمد اشرف غني او بله یې د حزب اسلامي مشر ګلبدین حکمتیار ته استول شوې ده.
ښاغلي اوچقون هیله څرګنده کړه چې د حزب اسلامي پلاوی به په څو ورځو کې له لاسلیک شوي موافقه لیک سره کابل ته ستون شي.
عبدالخبیر اوچقون زیاته کړه:
"په دې موافقه لیک کې راغلي چې د دې سند تر لاسلیک وروسته به له تورلسته د حکمتیار د نوم د ایستلو پروسه پيل، شي دا وعده د امنیت شورا اروپايي اتحادیې او امریکا هم کړې ده."
د ملګرو ملتونو امنیت شورا په ۲۰۰۳ میلادي کال کې د ګلبدین حکمتیار نوم د القاعده له مشر اسامه بن لادن سره د اړیکو له امله د تروریستانو په لست کې شامل کړ.
له افغان حکومت سره په مذاکرو کې د حزب اسلامي د پلاوي د مشر په وینا، د امنیت شورا د تروریستانو له لسته د حکمتیار د نوم لرې کېدل، له افغان حکومت سره د جوړې لپاره د دوی یو اساسي شرط و.
له حزب اسلامي سره د حکومت د سولې موافقه لیک ۲۵ مادې لري چې د دواړو خواوو شرایط په کې توضیح شوي دي.
د سولې د عالي شورا د مرستیال عبدالخبیر اوچقون په وینا، د موافقه لیک په متن کې د نړیوالې ټولنې او د افغانستان د ملي امنیت شورا شرایط مراعت شوي دي.
ښاغلي اوچقون څرګنده کړه چې دا موافقه لیک د افغانستان د اساسي قانون او د جزا قانون په رڼا کې جوړ شوی او په دې هېواد کې وروستیو پرمختګونو ته هیڅ ډول زیان نه شي رسولای.
د سولې عالي شورا پرمدني ټولنې، بشري فعالانو او خلکو غږ وکړ چې د سولې د ټینګښت لپاره د دوی او حکومت د هڅو ملاتړ وکړي.
