د افغانستان ولسمشر محمد اشرف غني وایي، حکومت یې په خپل وخت د ولسي جرګې او ولسوالیو شوراګانو د راتلونکو انتخاباتو ترسره کولو ته ژمن دی.
ښاغلي غني نن د کابینې په غونډه کې ویلي، د انتخاباتو لپاره هر اړخېز چمتوالی نیول کیږي.
حکومت د روان لمریز کال د تلې څلورویشتمه نېټه د ولسي جرګې او ولسوالیو شوراګانو راتلونکو انتخاباتو ته ټاکلې ده.
د افغان حکومت د کابینې نننۍ غونډه چې د ولسمشر محمد اشرف غني په مشرۍ جوړه شوې وه، تر ډېره په انتخاباتي مسائلو متمرکزه وه.
ولسمشر محمد اشرف غني دې غونډې ته وویل، حکومت هر اړخېزې هڅې پيل کړي څو د ولسي جرګې او ولسوالیو شوراګانو راتلونکي انتخابات په خپل وخت ترسره کړي.
ښاغلي غني زیاته کړه:
"د انتخاباتو ترسره کولو ته د ملي یووالي حکومت اراده په مطلق ډول پیاوړې او هر اړخېزه ده، انتخاباتو ته امنیتي تدابیر په یوه کمېټه کې د کورنیو چارو د وزیر په مشرۍ نیول کیږي، مالي چارې یې په یوه بله کمېټه کې چې د مالیې وزیر یې مشري کوي سمبالیږي او قانوني چارې یې استاد سرور دانش د عدلیې وزارت په همکارۍ مخته بیایي."
ولسمشرهیله ښودلې چې ولسي جرګه باید ډېر ژر د انتخاباتي اصلاحاتو په اړه د ده دویم تقنیني فرمان تصویب کړي، ځکه چې انتخابات د ولس غوښتنه ده.
د انتخاباتو په اړه بحثونه وروسته له هغې راپورته شول چې د انتخاباتو د څار بنسټونو په دې وروستیو کې پر حکومت پرله پسې انتقادونه وکړل چې انتخاباتو او انتخاباتي اصلاحاتو ته اراده نه لري.
له دې دوه ورځې وړاندې ولسمشر د ملي امنیت شورا ته لارښونه کړې وه چې د ولسي جرګې او ولسوالیو شوراګانو د راتلونکو انتخاباتو امنیتي پلان نهایي کړي.
دغو انتخاباتو ته د ۱۳۹۵ کال د تلې ۲۴ نېټه ټاکل شوې، خو د انتخاباتو څارونکي بنسټونه وایي، امکان نه لري چې انتخابات دې په خپل وخت ترسره شي، دوی یې دلیل کم وخت او د انتخاباتي اصلاحاتو په اړه ټکني فعالیتونه یادوي.
د انتخاباتي اصلاحاتو په اړه د ولسمشر لومړی فرمان تېرکال د ولسي جرګې له خوا رد شو، دا مهال په همدې اړه د ولسمشر دویم فرمان هم په ولسي جرګه کې دی، خو معلومه نه ده چې تصویب به شي او که نه؟
د ټیفا یا د افغانستان د شفافو انتخاباتو د بنسټ مشر نعیم ایوب زاده ازادي راډيو ته وویل، حکومت باید د انتخاباتو له تخنیکي او مالي چمتوالي مخکې، د انتخاباتي سیسټم اصلاح ته کار وکړي او په انتخاباتو د خلکو له لاسه وتلی باور، بېرته ترلاسه کړي.
راپور: اسدالله لودین
