د افغانستان د انتخاباتو د څار بنسټ " آیوا" وايي ملي شورا باید له ځنډ پرته د انتخاباتي اصلاحاتو په برخه کې د ولسمشر وروستی فرمان تایید کړي.
که څه هم د انتخاباتي اصلاحاتو د روان پڅ بهیر په اړه د مدني ټولنو اندېښنې نوې نه دي خو دا ځل د افغانستان د انتخاباتو د څار بنسټ " آیوا" وايي که وضعیت همداسې دوام وکړي راتلونکې انتخابات ممکن نه دي.
د افغانستان د انتخاباتو د څار بنسټ د چهارشنبې په ورځ په انتخاباتو کې د ښځو د ګډون تر نامه لاندې د تازه څېړنې د وړاندې کولو پرمهال یو ځل بیا د انتخاباتي اصلاحاتو د روان بهیر د پڅوالي په اړه جدي اندېښنه وښوده.
ددغه بنسټ مشر جانداد سپین له ملي شورا څخه په کلکه وغوښتل چې د وخت له ضایعه کولو پرته د انتخاباتي اصلاحاتو په برخه کې د ولسمشر فرمان تصویب کړي.
نوموړي زیاته کړه:
"یو وار بیا موږ تاکید کوو چې پارلمان باید د انتخاباتي اصلاحاتو په برخه کې د ولسمشر فرمان هرڅومره چې ژر کېږي تصویب کړي او په عین وخت کې له حکومت غواړو چې د غوراوي کمېټې له کاره ملاتړ وکړي څو موږ په انتخاباتي ادارو کې د بنیادي او هغه تغیرات چې توقع یې کېږي شاهد و."
حکومت د انتخاباتي اصلاحاتو دوهم فرمان له یو لړ تعدیلاتو وروسته شا او خوا دوه اوونۍ وړاندې د پارلماني چارو د وزارت له لارې ملي شورا ته واستاوه خو تر اوسه دغه فرمان نه دی تصویب شوی.
وړاندې تر دې د ولسمشر دوهم مرستیال هم له ولسي جرګې غوښتي وو چې د انتخاباتي اصلاحاتو په برخه کې د ولسمشر فرمان ژر تصویب کړي.
په ورته وخت کې د ولسي جرګې ادارې پلاوی بیا وايي چې جرګه د ولسمشر د فرمان په اړه بې تفاوته نه ده.
د ولسي جرګې منشي عبدالروف انعامي د چهارشنبې په ورځ ازادي راډیو ته وویل چې جرګه به تر پوره غور وروسته د ولسمشر د فرمان په اړه پرېکړه وکړي.
ښاغلی انعامي وايي ښايي تر راتلونکو درې اونیو به د ولسمشر د فرمان برخلیک روښانه شي خو جرګه نه شي کولای په ورخطايي په دې اړه ژر پرېکړه وکړي.
نوموړي زیاته کړه:
"ښه ده خو ولسي جرګه باید قانوني برخورد وکړي او د ټولنې مصلحتونه هم په پام کې ونیسي او دا نه شي کېدای چې ولسي جرګه د مدني ټولنې تر فشار لاندې راشي او احساساتي پرېکړه وکړي چې بیا به له تقلبه پاک انتخابات ونه لرو"
په ورته وخت کې د افغانستان د انتخاباتو د څار بنسټ اندېښنه ښيي چې په دواړو ارګ او اجراییه ریاست کې ځینې کړۍ د انتخاباتي اصلاحاتو مخه نیسي.
ددغه بنسټ ویاند او اجراییه رئیس شاه محمود مل وايي، که حکومت همداسې د راتلونکو انتخاباتو په اړه بې تفاوته وي ولس به د انتخاباتو په ګډون پر ټولو ډیموکراتیکو پروسو خپل باور له لاسه ورکړي.
د افغانستان د انتخاباتو د څار بنسټ د تازه څېړنې له مخې وايي چې په انتخاباتو کې د ښځو د ګډون پر وړاندې ګڼې ستونزې شته خو حکومت باید په راتلونکو انتخاباتو کې دې موضوع ته جدي پام وکړي.
راپور: محمد حدیث پردېس
