د لوګر ولایت د پوهنې ریاست چارواکي وايي چې د یادې ادارې لخوا د خلکو د هڅونې او تشویق له لارې په ښوونځیو کې د نجونو زده کوونکو شمېر ډېر شوی دی.
دوی زیاتوي، د یاد ولایت خلک د علم او زده کړو سره مینه لري او له همدې کبله حتی په ناامنو سیمو کې هم ښوونځي نه دي تړل شوي، خو د وسایلو او امکاناتو له لحاظه د ښار ښوونځي هم له ستونزو سره مخامخ دي.
د لوګر د پوهنې رئيس انجنیر اکبر ستانکزي ازادي راډیو ته وویل چې دوی د خلکو سره خپلې اړیکې ډېرې کړي او هغوی یې هڅولي دي چې د زامنو په شان لوڼې هم ښوونځیو کې شاملې کړي.
انجنیر اکبر زیاته کړه:
"د پوهنې ریاست د قومي مشرانو او مخورو سره په هماهنګۍ باندې اقدام کړی ځکه چې یوازې ریاست ځان ته کار نشي کولای، نو موږ د خلکو د انسجام لپاره ډېر کوښښ کړی، د خلکو په منځ کې کار وکړو، هغوی تشویق کړو چې خپلې لوڼې هم ښوونځیو ته شاملې کړي."
د لوګر د پوهنې رئيس وايي چې د علم او پوهې سره د سیمه والو ډېره مینه د دې لامل شوې چې حتی په نا امنو سیمو کې هم ښوونځي ونه تړل شي او په امنیتي لحاظ په راتلونکې کې هم د ستونزو د رامنځته کېدو لپاره کومه اندېښنه نه لرو.
ستانکزي زیاته کړه:
"په امنیتي برخه کې د معارف پر وړاندې ستونزې نشته، په مرکز او ولسوالیو کې زموږ نجونې او هلکان خپلو ښوونځیو ته ځي، دوی ته د مخالفینو لخوا ګواښ نشته، د لوګر په ولایت کې تر اوسه ښوونځي نه دي تړل شوي، نو موږ امیدواره یو چې دا مشکل به په اینده کې هم راپېښ نشي. "
د لوګر د یوې مرکزي لیسې زده کوونکې خپلې اساسي ستونزې داسې شریکوي:
"زما نوم رانیه حقمل دی، د بي بي امنه لیسې یوه تنه زده کوونکې یم، د ښوونځیو وضعیت ښه دی، ښوونکي ښه درس ورکوي، خو د ټولګیو لپاره سرپنا نه لرو، ډېری زده کوونکي په بیرون کې کېني، نو اساسي مشکل مو د ښوونځیو د ودانیو نشتون دی. "
د بي بي امنیه لیسې یوه تنه ښوونکې وايي چې خلک په اقتصادي لحاظ کمزوري دي، نو باید حکومت دوی ته د زده کړو ټولې اسانتیاوې برابرې کړي، د دې په خبره د پوهنې په دودولو او پراختیا سره په ورانکارو فعالیتونو کې هم لږوالی راځي:
"په ښوونځیو کې د کتابونو او کتابچو کمښت دی، ګورئ موږ یوه داسې ټولنه یو چې د اقتصادي لحاظه ډېر کمزوري یو، نه سوداګر شته، نه خیمه شته، نو زما هدف دادی چې باید پوهنې ډېره توجه وشي، تر څو ځنې خلک له ورانکارو کارونو لاس واخلي. "
د یادونې وړ ده د لوګر د پوهنې چارواکي، ښوونکي او زده کوونکي د سرپنا په ګډون یو شمېر ستونزې داسې مهال رابرسیره کوي چې د نوي ښوونیز کال په پیل کې په یاد ولایت کې د زده کوونکو د مرستې صندوقونه جوړ شوي او هره ورځ په کې زده کوونکي د ښوونځیو د ودانیو د جوړولو لپاره یوه، یوه افغانۍ مرسته اچوي.
راپور: نجیب الله الوخېل