د نړۍ د کاتولیکانو مشر پاپ فرانسس پر تهران غږ کړی چې د منځني ختیځ د سولې په پرمختګ او د ترورېزم د خپراوي په مخنیوي کې هڅه وکړي.
دا خبره د واتیکانه په یوه راغلي اعلامیه کې شوې ده.
دغه غوښتنه په داسې حال کې شوې د ایران ولسمشر حسن روحاني په تېرو شاوخوا دوو لسیزو کې د لومړي ځل لپاره د یوه ایراني مشر په توګه د پاپ فرانسس سره شخصي ولیدل او دواړو لورو یو بل ته ډالۍ هم ورکړې.
سره له دې چې ایران یو اسلامي جمهوریت دی، خو په روم کې د کاتولیکانو له کلیسا سره ښې اړیکې لري، له همدې کبله واتیکان هڅه کوي له خپل نفوذه په استفادې له تهرانه د منځني ختیځ د سولې په برخه کې مرسته وغواړي.
له واتیکانه په یوه راغلي اعلامیه کې د نړۍ د کاتولیکانو مشر پاپ فرانسس له قوله ویل شوي چې له تهرانه یې غوښتنې نه یوازې د منځني ختیځ د سولې په بهیر کې بلکه په دې سیمه کې د ترورېزم د خپراوي او د وسلو د قاچاق په مخنیوي کې کار وکړي.
د ایران شیعه حکومت د سوریې د ولسمشر بشارالاسد ملاتړی دی، خو د سوریې د پنځه کلنې کورنۍ جګړې په موده کې لویدیځو هېوادونه د سوریې د حکومت د سني مخالفې ډلي پلوي کړې ده.
په همدې حال کې ډیری لویدیځ هېوادونه ایران له هغو بېلابېلو ډلو سره په مالي مرسته تورنوي چې دوی یې تروریستي سازمانونه بولي.
د پاپ دا غوښتنه داسې مهال شوې چې د ایران ولسمشر حسن روحاني د واتیکان په ماڼۍ کې د پاپ فرانسس په شخصي میلمستون کې له هغه سره ولیدل.
په دې څلویښت دقیقه یې لیدنه کې پاپ له ولسمشر روحاني څخه د واتیکان د سفر له کبله مننه وکړه او د سولي هیله یې څرګنده کړه.
دواړو لورو په دې لیدنه کې یو بل ته ډالۍ هم ورکړې. د ایران ولسمشر د هغه هېواد یوه لاسي جوړه شوې غالۍ پاپ ته ډالۍ کړه او په بدل کې یې پاپ د سنت مارتین تورس مدال روحاني ته ورکړ.
ولسمشر روحاني له پاپ فرانسسه د دعا غوښتنه وکړه او وروسته یې د واتیکان له لوړ پوړو ډیپلوماتانو سره جلا جلا ولیدل.
ولسمشر روحاني د یوه څلور ورځني اروپایې سفر په هدف ایټالیا او فرانسې ته تللی دی او دا په تېرو شاوخوا دوو لسیزو کې اروپا ته د ایراني ولسمشر لومړنی سفر دی، که څه هم د ایران پخوانی ولسمشر محمد خاتمي د هغو مشرانو په منځ کې وو چې په ۲۰۰۵ کال کې یې د پاپ جان پاول د ښخولو په مراسمو کې ګډون کړی وو.
د دې سفر هدف پر تهران د نړېوالو بندیزونو تر لېرې کیدو وروسته له لویدیځو هېوادونو سره د ایران د اړیکو ښه کیدل او هغه هېواد ته د بهرنیو پانګه والو جلبول بلل شوي دي.
ولسمشر روحاني په روم کې یو شمېر سوداګرو ته وویل چې ایران په سیمه کې تر ټولو خوندي او باثباته هېواد دی.