د ۱۳۹۳ل کال انتخابات

په جوزجان کې د ازادۍ راډيو خبريال عالم رحمانيار وايي، د مرکز په څو مرکزونو کې د رايو پاڼې خلاصې شوې دي.

د افغانستان امنیتي چارواکي وايي، چې انتخابات تردې دمه له کومې لویې امنیتي ستونزې پرته مخ ته روان دي.

د کورنیو چارو وزارت امنیتي مرستیال محمدایوب سالنګي په یوه خبري کنفرانس کې امنیتي راپور وړاندې کړ او ویې ویل چې یو شمیر وسله وال مخالفین په بیلابیلو سیمو کې د افغان ځواکونو له خوا وژل شوي دي.

ښاغلي سالنګي وویل د کاپيسا په تګاب ولسوالۍ کې درې وسله وال مخالفین له امنیتي ځواکونو سره په جګړه کې وژل شوي دي.

سالنګي زیاته کړه، درې وسله وال مخالفین هم په زابل ولایت کې د خپل ماین ښکار شول او په چاودنه کې ووژل شول.

ده همدا راز وویل، چې په کونړ ولایت کې له پولې هاغاړه د افغان او پاکستاني طالبانو تر منځ جګړه شوې چې په نتیجه کې یې پنځه طالبان وژل شوي او اته نور هم ټپيان شوي دي.

په انتخاباتو کې د درغلیو په تورشپږ تنه د پولیسو له خوا نیول شوي دي.

د کورنیو چارو وزارت په یوې اعلامیې کې ویلي، چې دا کسان په کابل، میدان وردګ او کندهار ولایتونو کې له سهار راهیسې نیول شوي.

اخوا د انتخاباتي شکایتونو کمیسیون هم ټینګار وکړ، که چیرې کوم څوک په انتخاباتو کې درغلۍ وویني نو باید خپل شکایت ثبت کړي څو ژر تر ژره وڅیړل شي.

په پکتيا کې د ازادۍ راډيو خبريال ته خلکو شکايت کړى چې په ځينو ولسواليو کې دولتي چارواکي د انتخاباتو په پروسه کې مداخله کوي.