”زه فکر کوم چې د انتخاري بریدونو او یا د طالبانو سره د همکارۍ په تړاو د ایران د اتباعو نیول کیدل خامخا په دې معنی نه دي چې د ایران حکومت په دې کې ښکیل دی . ځکه ایراني بلوڅان د ایران له حکومت سره هم په ځینو مواردو کې په جګړه بوخت دي . خو که هر څه وي په دې برخه کې د افغان حکومت چوپتيا د اندېښنې وړ ده”
خو د افغانستان د سیمه ایزو مطالعاتو د مرکز مشر عبدالغفور لېوال بیا وايي چې اوس په افغانستان کې د ځینو وسلوالو ډلو سره د ایران اړیکې بیخي ثابتې دي. نوموړی زیاتوي ایران پوهیږي چې وسلوال طالبان نور په افغانستان کې هسې واک ته نه شي رسیدلی چې ایران ته ګواښ پېښ کړي او کولای شي همدا وړیا ځواک د خپل ستر دښمن یعنې امریکا په خلاف وکاروي .
له ښاغلي لیوال څخه مې وپوښتل چې ایران په افغانستان کې کوم داسې اهداف لري چې غواړي د تر لاسه کولو لپاره یې د حکومت له مخالفو وسلوالو سره مرسته وکړي او هغوی دا ډول بریدونه ته وهڅوي، په ځانګړي توګه که ایران د نیمروز وروستي بریدونو کې لاس ولري نو هدف به یې څه وو؟
ایران نیمروز د خپل نفوذ سیمه ګڼي د هلمند او بو مسله هم مهمه ده خو تر دې ټولو لوی هدف یې له داسې کړنو دادی چې غواړي خپل ستر دښمن (امریکا) په افغانستان کې چیلنج کړي .
د لیوال په وینا په دې ورځو کې د جنجالي اتومي پروګرام او په سوریه کې د ایران د لاس وهنې له کبله دا هیواد د لویدیځ په ځانګړې توګه د امریکا له فشار سره مخ دی . او له بده مرغه ایران غواړي ددې فشار ځواب په افغانستان کې وړکړي .
د افغانستان په روانو ناکراریو کې د ایران د لاس لرنې په اړه تر دې مخکې هم ځینې پېښې یادې شوي دي او ځینو سیمه ایزو چارواکو خپل غږ پورته کړی دی.
خو د افغانستان د ولسي جرګي استازی احمد بهزاد په دې برخه کې د ولسمشر حامد کرزي حکومت پړ بولي چې دده په وینا تل یې په دې برخه کې د ایران دفاع کړې:
”دا موضوع مخکې هم په لويدیځو ولایتونو کې د سیمه ایزو افغان چارواکو او ان په مرکز کې یو شمیر امنیتي لوړرتبه چارواکو یاده کړي چې ایران د افغانستان په ناکراریو کې لاس لري . خو له بده مرغه تر اوسه پورې ولسمشر کرزي په دې برخه کې کوم غوڅ او څرګند دریځ نه دی خپل کړی”
