د كابل ښار يو شمېر اوسيدونكو، چې له ازادي راډيو سره يې خبرې كولې وويل، د انتخاباتو د بهير يا د كانديدانو موافق يا مخالفان ټول نور ستړي شوي وو او د دې بهير وروستي نتيجې ته سترګې په لاره وو نو ځكه دوی د كميسيون د دې پرېكړې هركلې كوي.
"زما نوم محمد نبي دی، زه په دې خوشحاله یم چې د دوهم پړاو انتخابات ترسره نه شول، ځکه یو خو د ژمي موسم را روان دی او بله دا چې مصرف یې ډېر دی.
په هر صورت خوشحاله یم، چې د ټاکنو کمیسیون کرزی د ګټونکي په توګه اعلان کړ او دا پوره مشرعیت لري.
- زما په نظر که ډاکټر عبداله په دویم پړاو د انتخاباتو کې ګډون کړی وای نو ښه به وای.خو اوس، چې هغه ګډون ونه کړ، موږ بله چاره نه درلوده او زه دا تاییدوم.
- زما نوم امید ساحل دی، زه ډېر خوشحاله یم، چې ښاغلی کرزی بیا وټاکل شو.
کومه نتیجه، چې د انتخاباتو د کمیسیون له خوا اعلان شوه، زه فکر کوم، چې دا د څو اړخونو نه ملت ته د منلو وړ وي، یو خو دا چې د دویم ځلي انتخاباتو یو اضافي مصرف وو او خلک هم نور زغم نه درلود."
کله چې د انتخاباتو په دويم پړاو کې د ولسمشر حامد کرزي يوازېني سيال عبدالله عبدالله له ګډون څخه ډډه وکړه، د انتخاباتو خپلواک کميسيون حامد کرزى د راتلونکو پنځو کلونو لپاره د افغانستان د ولسمشر په توګه اعلان کړ.
د جمهوري رياست د انتخاباتو د لومړي پړاو نتايج د درغليو او سرغړونو د ادعاوو پر اساس دوې مياشتې وځنډول شول.
د امريکا جمهور رييس بارک اوباما له ولسمشر حامد کرزي ته د مبارکۍ د پیغام وړاندې کولو سره له ده وغوښتل، چې ډېر ژر د اداري فساد د له منځه وړلو لپاره دې خپلې هڅې زياتې کړي.
په کابل کې، سیاسي او فرهنګي کړیو، جهادي مشرانو لکه حضرت صبغت الله مجددي، استاد سیاف، دیني علماوو، قومي مشرانو، د بېلابېلو سیاسي ګوندونو چارواکو، سوداګرو او نورو ولایتي مخورو د مبارکۍ د بېلابېلو پیغامونو د استولو سره، هیله څرګنده کړه، چې ولسمشر به له ملت سره خپلې کړې ژمنې پوره کړي.
ولسمشركرزي هم د نړيوالو او كورنيو هيله منديو په ځواب كې ويلي چمتو دی، چې د نړيوالو په ملاتړ او ښه همكارې سره د خلكو سره كړې ژمنې پوره كړي.
خو داچې راتلونكې پنځه كاله به ولسمشر كرزې د فساد نه څومره پاكه اداره، د سولې په راوستلو او د خلكو سره د كړو ژمنو په پوره كولو كې څومره كلكه اداره ولري په دې اړه به بيا هم خلك قضاوت وكړي.