Күлкү кербени

Адатта, Германиянын бийик тоолуу болбогон өрөөндөрүндө кар анча деле жаабайт. Бирок быйылкы кышта “Шибердин кызыл камчысы” бүткүл немис жергесинде калайыктын төбөсүндө ойноп жаткан кез.

* * * * * * *

Дагы караңыз

Коронавируска койдун майы эм!

Быйылкы калың кар интернеттеги коомдук тармактарда юмордук хештег (ачкыч сөз сымал термин) ойлоп табууга түрткү болду.

Коронавируска байланыштуу бүт дүйнө “карантин” сөзүнүн англисчесин жакшы билип калышты: бул “локдаун” (“Lockdown”) сөзү.

Ал эми немистер бул сөздүн алгачкы муунун немисче “флоке” ("Flocke" – “үлбүрөк”; “өтө назик”; “Schneeflocke” – “шниифлоке” – “кардын кичинекей бүртүкчөсү”) деген сөз менен алмаштырып, #Flockdown деген хештег ойлоп табышты.

Бул немисче-англисче муундардан куралган юмордук терминдин сөзмө-сөз мааниси “кардын төмөн түшүүсү”, бирок ал кыйыр мааниде “кар карантини”, “кар калың жаагандагы карантин” дегенди туюнтат.

* * * * * * *

Кимиси кыйын – флокдаунбу же локдаунбу?

Интернеттин коомдук тармактарында немистер бул жаатта көп азил курушту. Азырынча #флокдаун күчтүүрөөк болуп жатат окшойт. Кантсе да, кар эрий элек эмеспи!

* * * * * * *

“Кар жаадыруу (флокдаун) – бул карантин (локдаун) аркылуу немистерди камай албай койгон чакта, Билл Гейтс Германия калкына каршы атайылап багыттап жүзөгө ашырган эң мыкты амал болду”.

(Бул азил баары-жоктун баарын Атлантика мухитинин ары жагындагы “зулум империалисттик күчтөрдүн айла-амалынан” көрүп шектене берчүлөрчү солчулдарды да чымчылайт).

* * * * * * *

Коомдук тармактардагы #Flockdown жарыяларынын өрнөктөрүнөн.

Дагы караңыз

Рейгандын азили Горбачевду да күлдүргөн

“#Флокдаундун” саясаттагы изине байланыштуу башка азилдерден:

* * * * * * *
“Жөө жүргөндөр үчүн көчөлөрдү саясатчылар эч бошото албай коюшту эле, #флокдаун оп-оңой бошотуп берди”.

* * * * * * *
“#Флокдаун саясатчылардын калкты биротоло велосипедге өткөрүү концепциясынын бырын-чырынын чыгарып койду”.

Германиядагы мега-#Флокдаун
Биринчи чаралар:
– Кооптуу жолдо унаа айдоого тыюу салуу (эгерде жаңы кар 30 сантиметрден жогору болсо);
– Жалпыга милдеттүү түрдө чектөө. Жерлер;
– Евробиримдик боюнча карда чана сүйрөгөн иттердин атайын тукумун өстүрүү;
– Байчечекей гүлдөгөнгө чейин бетме-бет сабактар өтүү;
– #Флокдаун дегенди тангандарды кылмышкер катары жарыялоо.
“Твиттердеги” бул азилдин автору – германдык кинорежиссёр, журналист Том Бон (Tom Bohn).

* * * * * * *

“Бардык кишилерди бири-бирине теңеп койгондугу үчүн #Flockdown аппак кары мага жагат”, – деп дагы бирөө жазды.

* * * * * * *

Эки кар бүртүкчөсү асманда каалгып учуп жүрөт дейт.
– Кайсы тарапка учкан жатасың? – биринчиси сурайт.
– Гренландияга, мен ал жерде көпкө чейин жерде жата алам. Ал эми сен өзүңчү? – дейт экинчиси.
– Германияга!
- Ал жакта сага бышырып коюптурбу?
– Жөн эле мен элди дүрбөлөңгө түшүргүм келип жатат!
* * * * * * *
("Дойче Велле" жана башка ар кыл интернет булактарынан).

* * * * * * *
– Алиги мурдагы бажычы сотто 260 миң сомго айыппулга жыгылыптыр го?
– Ооба, миллиарддаган сом акча жеген эргул сотко дароо 300 миң сом бериптир да, калган акчасын кайтарып эч убара болбогула, (“сдачаны”) тим эле койгула, байболгурлар! – дептир.
* * * * * * *
– Эки миллиард сомду канча убакытта табаар элең?
– Азыркы 9 миң сомдук мугалимдик ишимде маянамды тамак-аш ичпей чогултсам, 18 миң 518 жылда оп-оңой чогулта алам.
– Бажыда иштесеңчи?
– Анда ал акчаны ыктыярым менен эле мамлекетке төгүп бермекмин. Калганы деле өзүмдүн Амандам экөөбүзгө жетмек.
* * * * * * *
– АА менен СЖ эмнеге араздашып кетиптир?
– АА бажыдагы саан уйду “мал базарга тапшыралы”, десе, СЖ “жо-ок, өзүм эле ордо конушта саап ичем!” дептир, ошондон балээ башталыптыр!
* * * * * * *
– Мурдагы бажычы эмнеге көбүрөөк күйөт дешет?
– Ал акчалай колдогон партиялар шайлоодо татынакай эле жеңип өтүп кетсе, ыңкылап деген шайтаның бул шайлоо жыйынтыгын “жыдытып” салганына күйөт экен.
* * * * * * *

– Эми ит болбодумбу!
– И-и, эмне болуп кетти?
– Аманданы уулума өкүл эне кылып албадым беле?!.
– Ой, сен айткан Аманданын тиги бажычынын катынына кандайча тиешеси бар?
– Эми аты уйкаш экенин кантип улам-улам далилдеп отурабыз?
* * * * * * *
– Урматтуу сот, бул шайтан коңшусунун тоогун уурдап алыптыр!
– Үч жылга абак!
– Урматтуу сот, бул аткаминер бажыда кезинде миллиард сомду «ап этип» сугунуп какап калыптыр!
– Анча-мынчасын кустуруп, анан дароо тез-жардамга дарыгер чакырып, үч кабат үйүндө жылуу-жумшак дарылаткыла!
* * * * * * *
– Бир тоок уурдаса ким дейбиз?
– Ууру дейбиз.
– Ал эми миллиард тоок уурдасачы?
– Аны журт багаар дейбиз.
* * * * * * *
(Ар кыл интернет булактардан).
(TT)