Күлкү кербени

* * * * * * *

— Мына бул пирамиданын бөлмөсүндө фараондун мумиясы сакталып турчу экен, бирок кийинчерээк аны уурулар таап, алтындарын уурдай качышыптыр, - жол көрсөткүч Мысырга келген туристтерге эски пирамиданын сырын айтып жатты.

— Алар да мумия сөөгүн Баткенге алып келип көмүшүптүрбү? – деп алыскы Борбордук Азиядан келген турист кызыга кетти.

* * * * * * *

— Эмне үчүн Сиз музейге ууруга киргендер көркөм өнөрдү ызааттаган кишилер болчу деп ойлойсуз?

— Анткени алар туфлилеринин сыртынан бахилла кийип алышыптыр да.

* * * * * * *

Байыркы Египеттин тарыхын үйрөтүү үчүн окуучу балдарды музейге алып келишти.

— Карасаң, тетиги фараондун баласынын мумиясын. Бүт баарын бинт менен таңып салышыптыр го, эмне үчүн? – деп бир окуучу экинчисинен сураптыр.

— Сыягы, аны менен мектепте чогуу окуган тентектер сабап салышса керек... – деп берки шыбыраптыр.

* * * * * * *

Жакынкы Чыгышта бир турист музейди кыдырып жатса, жол көрсөткүч айтып калды:

— Мына бул алтын жалатылган жыгач идиште фараондун күлү салынган.

— Опе-ей, анын тамекисинин күл түшүргүчү ушунчалык чоң беле? Киши боюндай экен го, тим эле!..

* * * * * * *

Парижде музей кыдырып жүрүп чаалыккан бир чет элдик турист айланасын карады да, бир бош турган татынакай орундукка отура калды.

— Карасаң, тим эле алтын жалатып коюптур, - деп ойлоп койду.

— Урматтуум, бул орундукка отурууга болбойт! – деди ага музей кызматкери сылыктык менен.

— Эмнеге?

— Ал Людовик ХIVгө таандык эмеспи.

— Мадам, эгер ал келип калса, анда орунду бошото салам, азыр бутумду саал жазып, эс алып алайынчы!..

* * * * * * *

Ал келди да, сөөлөт менен падышалык тактыга отурду.

Мына эми гана “падышалык жарлык чыгарып, буйрук берейин” деп эки жагын каранды эле, башын ылдый ийип, жанына ийменип келген аял өзгөчө сылыктык менен шыбырай кетти:

— Урматтуум, музей эки-үч мүнөттө жабылат. Тактыны бошотуп койсоңуз жакшы болоор эле!..

* * * * * * *

Ырым-жырымдар музейине кирген турист кагаздагы сүрөттү көрсөтө кетти:

— Мына бул карга сыяга боёлгон буту менен жорголоп кеткенде калгандай издер эмнени түшүндүрөт?

— Бул – жайсаңчынын “аркы дүйнө менен баарлашканда маалымат катары алдым” деп чийип койгон сүрөтү.

— Эмне, Жайсаң чын эле болгонбу?

— Албетте, болгон эмес!.. Бирок тээ илгери, XXI кылымдын башында, өзүн “жайсаңчымын” дегендер чындап эле болгон.

* * * * * * *

TT

* * * * * * *

Талип менен хизбу-т-тахрирчи

— Ооганстандагы талиптер менен биздеги мыйзамсыз Хизбу-т-Тахрир уюмунун өкүлүнүн кандай окшоштук же айырмасы бар?

— Оболу окшош жагын айтсак – экөө тең айдыңдык (мамлекеттик башкаруудан дин иштери бөлүнгөн секулярдык) түзүлүштү кулатууну, ордуна халифат түзүүнү жакташат.

— Ал эми айырмасы?

— Талиптер муну куралдуу күч колдонуп, терррорчул аракет менен өздөрү жүзөгө ашыргысы келет. Хизбу-т-Тахрир уюмунун өкүлү болсо өз колуна курал кармагысы келбейт, бирок өздөрү үчүн кимдир-бирөө өлкөгө келип, куралдуу күч колдонуп, терррорчул аракет менен халифат орнотуусун каалашат.

* * * * * * *

Ажыны таарынтканда...

— Урматтуу ажы мырза, Сиз аялга кол көтөрбөш керек дечү элеңиз го?

— Антпеш керек, чырагым! Антпеш керек...

— Анда эмне үчүн аялыңыздын көзүнүн алды көгөрүп жүрөт?

— Эми урматтуу ажы атыккан күйөөсү токол алайын десе, каршы чыгып жатса, бир аз тарбияланып калды да!..

* * * * * * *

Чоң жаңылыштык

— Бир министр көп аял алууга уруксат кылуу керек дегенде, аны келекелеп сүйлөп туура эмес кылган экенмин, — деп мурдагы муфтий күрсүндү.

— Анчалык эмне болуп кетти, молдоке?

— Акылым болгондо, аны колдой берсем туура болмок экен. Ошондо министрлер, депутаттар өздөрүнө уруксат кылгандай мыйзам же токтом токуп алышканда, бир нече жылдан кийин мага да пайдалуу болмогун менин бул башымдагы көк кээм аңдабаптыр да!..

* * * * * * *

Оболу байбиче болуу укугун пайдаланат

— Урматтуу Шамчырак Майдан кызы, сиз мусулман кыз-келиндердин укугун коргогон уюм түздүңүз. Бирок көп аялдуулукту жактап чыкканыңызды кантип түшүнсө болот?

— Бул – менин укугум.

— Андай болсо, Сиз өзүңүз да кимдир-бирөөгө токол болууга макулсузбу?

— Оболу мен кимдир-бирөөгө байбиче болуу укугумдан пайдаланам да, муну кантип түшүнбөйсүз?..

* * * * * * *

Сонунбектин сонун документи

— Таксыр, мына бул дүкөнүңүздө адал колбасалар бар экен...

— Ооба, ошондой күбөлөгөн кагазы – сертификаты бар, алардын.

— Эгерде мындай кагазды жөн эле чаптап койсочу?

— Анда сертификаттуу болуп калат... Опе-ей, башымды тегеретип жибердиңиз го, каалаган колбасаңызды ала бериңизчи, деги!

Кардар кеткен соң:

— Чын эле, Сонунбектин фирмасы чаптаган сертификатты көрүп эле «адал» экен деп ишенип калып жатпайбызбы, — деп дүкөнчү ойлонуп калды.

* * * * * * *

Кудайга жалынганынын сыры

— Баланча депутат эмнеге ар аптада намазга жыгылып, кудайга жалынып-жалбарып жүрөт?

— Анын бир сыры бар экен: жамы мечитке барган сайын бул мыйзамчы: “О Кудай! Мени сактай көр! Башка мамлекеттин да жарандыгын алгандыгымды эч кимге, БШКга да билдире көрбө!” деп жалынат тура.

* * * * * * *

Базар чайканасындагы чатак

— Орун бошоткула, таксыр ажы келе жатат, төргө чыгаргыла! – деп Фергана өрөөнүндөгү бир базардын чайканасында элди шаштырып, чайкана кожоюну түйшөлүп калды.

— Мен бул кишини эч сыйлабайм, ага төрдү бошотпойм! – деди бир киши.

— Эмнеге?

— Бул киши башка мамлекеттин жараны деген жасалма паспорт жасатып, анан ошо мамлекеттин квотасы менен Мекеге барып келди. Мыйзамды бузган неменин ажылыгы кабыл болгонуна эч ишенбейм! — дептир тиги.

Муну уккан ажы чайканадан оолактап кетүүгө шашкан экен.

* * * * * * *

TT