“Күлкү кербен” кыргыз айдыңдары айтып жүрчү тамашалуу кептер тууралуу түрмөгүн улантат. Бул жолу Кыргызстандагы белгилүү агартуу ишмери, философ, саясат таануучу Алмазбек Акматалиев айткан азил кептерден бир шиңгил сунуштайбыз.
* * * * * * *
Карапайым атуулдар мурдагы бир президенттин сыналгы каналына курган соңку маегин кызуу талкуулап жатып калышыптыр.
Бул маекте мындайча сүйлөм бар экен: “Кудай мага айтып атат: “Эй, пендем, мынабуну көрдүңбү?” деп...”
Бул жаатта бир кесиптешим бүгүн минтип айтып калса болобу: эгерде сен кудайга кайрылып сүйлөшсөң, анда бул – дин болот. А непадам кудай сага кайрылып сүйлөшүп калчу болсо, анда бул – оорунун нагыз белгиси!
Ойлонуп көрсөм, өтө кылдат айтылыптыр!
* * * * * * *
Бүгүн бир таанышым күлдүрдү.
“Өткөн доордо эски телевизорлордун каналдарды которчу тетиги сынып калып, далай ирет аттиштин көмөгү менен улам жаңы каналга которчу элек” деген сөз болуп калды.
Анда, ал айтат:
– Атаңгөрү, азыркы аттиштин наркы 600 доллар туруп, ошол телевизорлордун өзүнөн үч эсе кымбат болуп калбадыбы! – деп...
* * * * * * *
Нарындык бир Төлөнчө деген киши болгон экен. Бою – араң 150 см, салмагы – 55 килограмм.
Согуштун убагында аскердик комиссариатка чакырылып, “согушка кетесиң” деп жолдомо алып, күч-кубат арттырчу “беркиден” жутуп алып, үйүнө барат.
– Эй, байбиче, азык-түлүк, кийим-кече даярда, мен согушка кетмей болдум! – дейт.
Байбичеси толук, бою узун, олбурлуу аял экен.
Күйөөсүнүн бакылдап атканын көрүп, колун бөйрөгүнө таяп алып, байбичеси айтат дейт:
– А-а, өлүгүңдү көрөйүн, ушу сага күнү түшүп калса, анда Кызыл аскердин деле шайы кетип калган го?
* * * * * * *
Жакырчылык жөнүндө
Мындан бир топ жыл мурун Дүйнөлүк Банктын бир адиси менен маектештип калдым. Өзү банктын жакырчылыкты иликтөө боюнча адиси экен.
– Эң жакыр деген райондун эң жакыр үй-бүлөсүн көрөйүн деп бардым. Эски үй экен, телевизор, муздаткычы бар. Менчик огороду – бир 80 сотых болот. Андан тышкары 8 гектар жери – суу баскан жайыкта, 10 гектар жери кайракы талаада экен. Эски "Жигулиси" турат короосунда, анан тышкары трактордун прицеби, 10 кой, бир уй, бир жылкысы бар экен. Тамагы: сары май, боорсок, куурулган картөшкө, айран, сүт... Эки баласы мектепке барат экен, эки баласы Бишкекте университетте окушат экен..., – деп кобурап отурду.
– Эмне ойлондуң? – дедим.
Ал айтат:
– Биздин Дүйнөлүк Банктын методикасы боюнча мындай үй-бүлөнү “жакыр” деп айта албайбыз. Жакыр деген мына Индияда, Пакистанда, Египетте, Ооганстанда, Африкада: үйү жок, жумушу жок, эч билими жок, эч менчиги жок, ачка, суу жок, биттеген... Силердики жөнүндө эмне деген баяндама жазам деп башым маң!..
Коштошуп жатып тамашалап койдум:
– Дэвид, сен барган үй-бүлө сенден бир сырын жашырып коюптур! Жанагы сен көргөн жакыр үй-бүлөнүн .... Бишкекте бир-эки бөлмөлүү үйү бар, – десем:
– Оо кокуй десе! – деп кол шилтеп алып узады.
* * * * * * *
Атеисттик доор
КПССтин бир райондук комитетинен чиркөөгө шашылыш телефон чалып калышыптыр.
– Абакебай, жардам бергиле, бизге отургучтарыңардан бере тургулачы! Эртең райондук партиялык жыйналыш өткөрөт элек!..
– Өткөндө эле силерге отургучтарды бергенбиз. Анан ал отургучтардын артына уят сөз жазып салыпсыңар. Бербейбиз!
– Эгерде отургуч бербесеңер, анда чиркөөдөгү хорго пионерлерди жибербей койобуз!
– Эгерде пионерлерди чиркөө хоруна жолотпой койсоңор, анда кечилдерибиз коммунисттик ишембиликке чыкпай коюшат!
– Андай болсо, чокунгандардын жүрүшүнө комсомол мүчөлөрүн катыштырбай салабыз!
– Ошондойбу! Зыяратка комсомолдорду катыштырбай салчу болсоңор, анда кечил айымдарды саунага жиберүүдөн баш тартабыз!
– Абаке, мындай коркутуп-үркүтүүңүз үчүн партиялык белетиңизди үстөлгө таштап калып жүрбөңүз!..
* * * * * * *
(TT)
