Күлкү кербени

* * * * * * * *

Батыш дагы эле Чыгыш Европага өз баалуулуктарын таңуулап жатат! Добуш бурмалабастан, акыйкат, бийликтин бутактарын жиктөө, ж.у.с.ларды айтып! Силер минтип биздин өлкөнү кулчулукка матай албайсыңар! Жетишет! Буга жол жок!

* * * * * * *

— Сиздин оюңуз кандай болду экен, Украина соңку шайлоодо чоочундарды шайладыбы же жырткычтардыбы?

— Менимче, жатып ичерлерди шайлап алды!

* * * * * * *

Шайлоо алдында Александр Лукашенка Беларустагы бир кыштаккка келип, калайык менен жолугушуу өткөрүүгө киришти.

Кыштактагы шайлоочулар аны көздөрүнүн төбөсү менен карап, унчукпай турушту.

Лукашенка:

— Жолдоштор, бул жакта рыформалар кантип жүрүп жатат?

Эч кимиси үндөбөдү.

Лукашенка:

— Ал эми жалыйнаңар кантип төлөнүп жатат?

Эч кимиси үндөбөдү.

Лукашенка:

— Жолдоштор, турак-жай маселеси кандайча чечилүүдө?

Эч кимиси үндөбөдү.

Жыйын төрагасы Лукашенкага кайрылды:

— Ляксандр Рыгорыч, бул жактагы калк түркөй келет, карапайым тил менен эле сүйлөсөңүз?!.

Лукашенка:

— Арыбагыла, мужиктер?

Бардыгы бир ооздон жооп кайырышты:

— Арыбаңыз, барин («байым»)!

* * * * * * *

— Шайлоодо сен «Элдик майдан» үчүн добуш бересиңби, же «Бирдиктүү Орусия» үчүнбү?

— Путин кайсынысын колдосо, ошол контора үчүн добуш берем.

— Кызык го, ал деген мунусун да, тигинисин да колоп атпайбы!

— А—а, Путиндин «ВВПны эки эсеге көбөйттүм» дегенин эми түшүнбөдүмбү!

(Мында сөз оюну катылган: ВВП – 1. Улуттук дүң өнүм; 2. Путиндин ысымы, атасынын ысымы жана тегатынын шарттуу кыскартылган баш тамгалары).

* * * * * * *

Шаштысы кеткен Медведев Кремлде Путинге жолугат:

— Добуш бурмалоого каршы нааразылык кылып демонстрацияга чыккандардын өлө көп санын көрдүңбү?

— Көрдүм. Эл чын эле соолуга түшүптүр. Тез арада арактын баасын төмөндөтүү керек.

* * * * * * *

— Уктуңбу, кечээ биздикилер кайрадан утулуп калышыпыр?

— Спорттун кайсы түрүндө?

— Футболдо.

— Биздикилер шайлоодо кантип жеңип чыкканды гана билишет эмеспи.

* * * * * * *

* * * * * * *

Айылдагы кампачынын беш тоогун уурдаган Моңур тымызын киши салып айттырып, Шоңурду “сотто күбө түшүп сүйлөп, актаганга огожо боло көр”, деп өтүнгөн соң, Шоңур сотко келиптир.

- Кана, күбө экенсиз, билген-көргөнүңүздү айтыңыз. Чынын гана айтыңыз!

- Урматтуу сот, сиз ойлобоңуз, мени Моңур атайылап чакыртты деп. Өзүм эле келдим, аны актайын деп. Алиги беш тоок Моңурдун короосуна өздөрү эле түлкүдөн качып жүрүп адашып барып алышкан. Калп айтсам майнеке болоюн! Туурабы, Моке? – деп көзү алайган досуна кайрылыптыр.

* * * * * * *

Бир күнү сот Шоңур менен прокурор Моңур оодандык соттун кеңсесине кирип баратышса, алардын алдынан бүбү-бакшыдай көрүнгөн аял чыгып, жолдорун бууп ысырыктап калат экен:

- Сүф-сүф! Жамандык кетсин, доллар келсин! Жамандык жаныңардан кетсин! Доллар капчык толо келсин!

Шоңур берки аялга анча-мынча акча карматат.

- Опе-ей, сиз да ушуларга ишенесизби? – деп Моңур аң-таң калат.

- Жок, таптакыр ишенбейм. Бирок тилегени жакшы нерсе болуп жатпайбы!

* * * * * * *

Шоңур адвокаты Моңурга:

- Бүгүн мен прокурорду ит кылайын деп жатам?

- Кантип?

- Ал жети ай бою менин артымдан казып, жетимиш күбө даярдады. Мен болсом анын эч бир күбөсү ооз ача элегинде кылмышты мойнума алып салайын деп жатам!

* * * * * * *

- Урматтуу прокурор Шоңур мырза! Эмне үчүн сиз Моңурга байланыштуу кылмыш ишти создуктуруп жатасыз?

- Кечиресиз, баягы прокуратурада өрт чыкканда анын дакменттери бүт өрттөнүп кетиптир.

- Тоо-бо! Моңур кылмышты өрт өчкөндөн 6 айдан кийин жасады деп атышпайбы:

- Аныңыз туура, бирок мурдагы өрттүн бир чогу бурчта быкшыган бойдон калып калган экен...

* * * * * * *

Сот аяктаган соң адвокат Шоңур өзү жактаган Моңурга келиптир.

- Чоң рахмат! Эптеп алты айлык мөөнөткө шарттуу кесишти, бул – фантастика! Бул Сиздин эбегейсиз чоң эмгегиңиздин үзүрү болду! – дептир адвокатына ыраазы болгон айыпталуучу Моңур.

- Оо, өтө татаал иш болду! Сиз болгону алты ай... эптеп алты ай шарттуу мөөнөт болсо эле жарайт эле деп сурап туруп албадыңызбы! Анан эптеп сотту көндүрүүгө туура келди, болбосо чунак сот сизди таптакыр актап салсамбы деп жаткан!..

* * * * * * *

- Урматтуу айыпталуучу Шоңур мырза! Алты киши сизди паракор деп айтып жатат, буга эмне дейсиз? – прокурор Моңур үнүн өкүм чыгарыптыр.

- Эмне демек элем? Сизди деле "жемкор экен" деп мага алтымыш киши айткан, бирок мен аларга курулай ишенип калган жокмун да! – дептир Шоңур.

* * * * * * *

Шоңур Дордой базарга келип, Моңурдун дүкөнүнөн шым ченеп көрөт. Шым тим эле өзүнө тиккендей чак экен. Саат басып, жанында жетээр акчасы жок, айласы куруп ары жакты караса, татынакай бир күрмө илинип турат. Шоңурга күрмө да керек болчу. Ал шымды дүкөндүн ээсине кайтарат да, күрмөнү сурап кийип көрөт. Тим эле жарашыктуу!

- Болуптур, ушуну алдым! Жакшы калыңыз!

- Опе-ей, күрмөнүн акчасын бере элексиз да! – деп дүкөнчү Моңур кыйкырат.

- Кызыксыз го, бул күрмөгө жаңы шымды алмаштырбадымбы! – дептир Шоңур купшуңдап.

Ачуусу келген Моңур тигини дегдеңдете полицияга сүйрөп келиптир. Бирде сөзгө чоркок Моңурду, бирде чечен Шоңурду угуп, тергөөчү дүкөнчүгө айтат дейт:

- Анан башма-баш алмашып аткан соң, үстөк сурабай эле койбойсузбу, жарыктык Моңур мырза?!.

* * * * * * *

(TT)