Күлкү кербени

* * * * * * *

Шайлоо кимдики?

- Александр Навальный шайлоого талапкер катары катышат дешет.

- Кайсы шайлоого?

- Орусия Федерациясынын Президенти болуп Владимир Путин сөзсүз шайлана турган шайлоого.

* * * * * * *

Айырма – чоң

- Батыш менен сиздин өлкөнүн айырмасы эмнеде?

- Батышта өкмөт кайрымдуу салык төлөөчүлөрдүн эсебинен жашайт. Бизде – салык төлөөчүлөр кайрымдуу өкмөттүн эсебинен жашайт.

* * * * * * *

Салык төлөөчүнүн кудурети

- Борбордук чалгын башкармалыгы АКШнын президенттигине шайлоодо Доналд Трамп жеңишке жетиши үчүн Орусиянын салымы чоң болгонун айтып чыкты дешет.

- То-боо, Орусиянын салык төлөөчүлөрүнүн эсебинен эмнелерди гана ишке ашырууга болбойт!

* * * * * * *

Байыркы грек ойчулу Диоген өзүнүн замандашынын “кайсы жаныбар өзгөчө коркунучтуу?” деген суроосуна мындайча жооп узаткан экен:

- Үй жаныбарларынын ичинен – кошоматчы коркунучтуу, ал эми жапайы жаныбарлардан – тиран коркунучтуу”.

* * * * * * *

Бир ирет философ Платон Диогендин жакырдыгын келеке кылып мындай дептир:

- Мен ал түгүл Сиракуз шаарынын тираны Дионисийдин кулу болгон чагымда деле өзүм жей турган жашылча-жемишти жуучу эмесмин.

Анда демократ Диоген мындайча жооп бериптир:

- Эгерде Платон жашылча-жемишти өзү жууп жеп жүргөн болсо, анда ал кулчулукка кириптер болбойт болчу.

* * * * * * *

Кыска маалымат.

Философ Диоген Синоптук (Διογένης ὁ Σινωπεύς) б.з.ч. 412-жылдын тегерегинде Кара деңиздин түштүгүндөгү Синоп шаарында (азыр ал – Түркиянын аймагында) туулган жана б.з.ч. 323-жылы 10-июнда Коринф шаарында (азыркы Грекиянын аймагында) өлгөн.