Күлкү кербени

Өлкөдө элдин баары дүрбөп президентикке аттанып жатканын кулагы чалып калып, Азыткы алда кайдан түшүп келиптир (же түпкүрдөн жогору чыгып келдиби, айтор, Ала-Тоого жетиптир).

Азыткы оболу талапкер Байкембаевден сураптыр:
- Эмне үчүн шайлоого катышып атасың?
- Партиям талап кылды, арга жок, катышуум керек.
- Максатың эмне?
- Эл-жеримди байытып жыргап-куунап калуу.

Ары жактан айланып өтүп бараткан талапкер Маралбаевден да Азыткы сураптыр.
- Эмне үчүн шайлоого аттанып жатасың?
- Партиям талап кылды, катыш деди, эми катышуум керек ко.
- Мүдөөң эмне?
- Демократиянын туу чокусуна калкымды күргүштөтүп айдап барып жеткирсем дейм.

Азыткы жолун улап, талапкер катары сөзүн кайра-кайра жаттап аткан Куурчаккуловду сөзгө тартыптыр.
- Эмне үчүн талапкердигиңди коюп жатасың?
- Мурдагы “алгачылар” менен “акжолчулар” сүрөөн кылып...
- Кандай долбоорлоруң бар?
- Мурдагы “ажолорду” алып келсем дейм. Алардын аттырганы – Каддафиникине жетпейт, жегени – Мубарактыкына караандабайт. Айланайындарым, тим эле бөөдө жерден качып кеткен периштелер турбайбы!

Андан соң Азыткы өзүн талапкерлердин татыктуусунун татыктуусу көргөн Даарыгановго келиптир:
- Эмне үчүн талапкердигиңди коюп жатасың, мырза?
- Эркекмин да, ошон үчүн.
- Максатың эмне?
- Эрдик кылсаң сүрө кыл дейт. Ушуну аялдарыма далилдегим келет.

Ары басып барып, Азыткы "мыкчегер" талапкер атыккан Дардаңбаевди таап алыптыр:
- Эмне үчүн президенттик шайлоого аттанып атасың?
- Эл деле чыгып атат, эмнем кем экен!
- Тилегиң эмне?
- Эптеп бул кызматка илээшип, миллиард доллар топтоп алсам, бул дүйнөдө армансыз өтөөрмүн дейм да.

Азыткы чымын куюн болуп барып Тайманбас кызына да жолугуптур.
- Эмне үчүн шайлоого катышып атасыз?
- Эмне, аялдардын өкүлү чыкпаса болбойт бекен?
- Ой-максатың эмне?
- Максатымды эмне кыласыз, андан көрө айтсаңыз, сиздин жынысыңыз ким өзү? Силер жакта гендер саясаты болобу деги?

“Ко-окуй” деп андан Азыткы кача жөнөп, анан ойлонуп туруп кайра Дардаңбаевге жетип келиптир.
- Мен өтө талдап көрүп, сенин талапкердигиңди колдоону чечтим.
- Саал кечигип калбадыңбы.
- И, эмне болуп кетти?
- Шериктеш бир кубаттуу өлкөдөн мага эки миллиард доллар келатат. Акысына алар кез-кезде колдоп сүйлөп турушумду каалашат экен. Мага эмне, колдоп койом да. Кез-кезде... Оозум башка темалардан бош боло калганда!
- Жо-ок, жок, жок! Алардан акча алгыча менден ал.
- Канча?
- Менде беш миллиард доллар каражат бар. Эки миллиардын артка кайтарылчу алиги акчанын ордуна аласың, бир миллиарды болсо – шайлоо чыгымдары, бир миллиарды – жеке өзүң чаалыкканда “чай ичип” койгонго...
- Дагы бир миллиардчы?
- Анысы – сендей азаматты тапканым үчүн мага мээнет акы катары калат да!

(Алар өз ара келиштиби-жокпу, ким билсин?!. Саат басып сөз этегин уга албай калганына калем ээси күнү-бүгүнкүгө чейин чындап арман кылып келет).

* * * * *


Михаил Горбачевдон достору сурап калыптыр:

- Беш жылдан кийинки болочогубуз кандай болот, Миша?

- Кызыксыңар го! Беш жылдан кийин өтмүшүбүзгө эмне болоорун биле албай жатсам сурайсыңар да...


* * * * *

Социологиялык сурамжылоо маалында көчөдөн бир чоң энени кармап сурашат:

- Сиз кандай деп ойлойсуз, “кайра куруу” дегенди окумуштуулар ойлоп таптыбы, же Горбачевбу?

- Албетте, Горбачев!

- Эмне үчүн?

- Эгерде окумуштуулар ойлоп табышса, оболу аны жаныбарларга сынап көрүшмөк да!


* * * * *

Кайра куруулар доорунда борбордук кабарчы алыскы кыштакка келип, карапайым колхозчудан чегелеп сурайт:

- Колхозуңардын башкармасы өзүн кайра куруп үлгүрдүбү?

- Албетте!

- Жакшы. А берки... парторгчу:

- Ал дагы.

- М-да!.. Дурус! А агрономчу?

- Ал кайра куруп үлгүрө албай калды. Беркилерден жыгач-таш артпай калды.


* * * * *

Кызыл Аянттан бир чоң дарбыз көтөрүп өтүп бараткан борбордук азиялыктан бир СССР эл депутаты сурап калат:

- Дарбызыңды мага сатасыңбы?

- Жок, эй!

- Эми сатсаң байболгур!

Тигиниси жибип кетип:

- Болуптур, анда. Танда!

- Кантип тандайм? Колтугуңда бир эле дарбыз турат ко?

- А сени шайлаганда өзүң деле жалгыз талапкер болбодуң беле!


* * * * *

- Тууган, деги плюрализмдин туу чокусу деген эмне?

- Бул, эсеби маселен, качан гана СССРдин президентинин ою КПСС БК Баш катчысынын оюна караманча-каршы чыкса, дал ошондо болчу жагдай!


* * * * *

Михаил Горбачевдон достору сурап калыптыр:

- Беш жылдан кийинки болочогубуз кандай болот, Миша?

- Кызыксыңар го! Беш жылдан кийин өтмүшүбүзгө эмне болоорун биле албай жатсам кайра менден сурайсыңар да...


* * * * *

СССР эл депутаттары Лигачевдон сурап калышат:

- Егор Кузьмич, социализм деп эмнени түшүгөсүз?

- Бул – баары кедей жана баары унчукпай турган коом.

- А кишилерге сөз эркиндигин ыйгарып, аларды бай жашатып койсочу?

- Анда капиталисттик коом болуп калат. Биз болсок, өзүңөр билесиңер, мындай жолду четке кагабыз!


* * * * *


Балтика боюндагы жумурияттагы бир орто мектепте сабак өтүп жатат.

- Балдар, кана, ким айтат, желегибиздеги көк тилке эмнени туюнтат?

Янис: - Бул – советтик баскынчылар кирдетип жаткан биздин көк асман!

- Ал эми желегибиздеги кара тилкечи?

Петерс: - Бул каргыш тийгир совет баскынчылары тебелеп жаткан биздин жерибиз.

- А берки ак тилке эмнени туюнтат?

Вовка: - Бул – Янис менен Петерс тазалай турган Сибирдин ак кары.


* * * * *

- Коммунист менен антикоммунисттин айырмасы эмнеде?

- Коммунист – бул Маркс менен Лениндин эмгектерин окуган киши. Антикоммунист болсо – алардын оюн аңдай алган киши.

* * * * *

- КПССтен чыгайын дедим эле, анын мүчөлүгүнөн кантип чыгам?

- Оңой эле. Партияда жок эки кишинин мактаган сунуш катын алып келиңиз.

* * * * *

Айтылуу “Мезгил” ("Время") берүүсү - сыналгыда. Диктор Игорь Кириллов кара кийимчен чыгып, кайгылуу кабарды угузууда:

- Урматтуу жолдоштор! Албетте, кээ бириңер күлө башташыңар мүмкүндүр, бирок биз чын эле кайрадан орду толгус жоготууга дуушар болдук...


* * * * *

Черненко түбөлүк жайына узатылган соң, Кремлге кимдир-бирөө телефон чалат.

- Алло, бул – Кремилби?

- Ооба.

- Силерге КПСС БКнын Баш катчылыгына киши керекпи?

- Бул сиз кимсиз деги? Ооруп турасызбы?

- Ооба, ооруп да турам, өтө карып да калдым. Ошо кызматка жарап берем.


* * * * *

Брежнев менен Черненко аркы дүйнөдө жолугуп калат.

- Костя, биздин ордубузда ким башкарып калды, ал жакта?

- Баягы Миша Горбачев.

- Аны ким колдоп жатат?

- Аны колдоп эмне зарылчылык бар? Ал өзү эле аркы-терки басып жүрө алат.


* * * * *


Тиги дүйнөдөн Ленин Брежневге учурап калыптыр.

- Сен “жалган дүйнөдө” жүргөндө коммунизмди курдуң беле?

- Жок, үлгүрбөй калдым.

- Мен дагы куруп үлгүргөн эмес болчумун. Анда эмнеге тигиңер “кайра куруп атам” деп айтып жүрөт?

* * * * *

Ар кыл интернет булактарынан алынды.