“Азаттыктын” Бишкектеги кабарчысы. 2011-жылы Мамлекеттик Ардак грамота менен сыйланган. Кыргыз улуттук университетинин филология факультетин аяктаган.
Бүгүн Жогорку Кеңештин төрагасынын эки орун басары шайланды. Тайырбек Сарпашев менен Кубанычбек Исабеков шайлоодо сунуш кылынган беш талапкердин ичинен жеңишке ээ болушту.
Кыргыз-казак мамлекеттик чегарасы тууралуу келишимди ратификациялоо тууралуу мыйзам долбоору Жогорку Кеңеште 13-июнда каралып, депутаттардын колдоосуна ээ боло албады. Эл өкүлдөрү 2001-жылы 15-декабрда экс-президент Акаев тарабынан кол коюлган келишимде Кыргызстандын кызыкчылыгына көңүл бурулбай калган деген чечимге келишти. Келишим боюнча депутаттык иликтөө жүргүзүү зарылдыгын белгилешти.
9-июнда парламентте “Терроризмди каржылоого жана кылмыш жолу менен келген арам акчаларды адалдоого каршы аракеттер” тууралуу мыйзам долбоору бир топ талаш-тартышты туудурду. Депутаттар бул мыйзамды дагы жеткире иштеп чыгууну зарыл деп белгилешип, тийиштүү комитетке кайта жөнөтүштү.
Жогорку сот бүгүн Аксы окуясы боюнча кайра тергөөнүн зарылдыгы жок деген чечим чыгарды. Соттун мындай чечимине нааразы болгон 10-15 адамдан турган аксылыктардын тобу Өкмөт үйүнө кирүүгө аракет жасашты. Аларды милиция кызматкерлери аскерлердин жардамы менен Өкмөт үйүнүн короосунан сыртка күч менен чыгарып койушту. Азыр Өкмөт үйүнүн алдында отуз чакты адамдан турган топ «Бакиев, сыртка чык, деп кыйкырып турушат. Жогорку сот Аксы окуялары боюнча кылмыш ишти Башкы прокуратуранын жаңы жагдайларга байланыштуу аны кайра тергөө тууралуу сунушунун негизинде карап баштаган эле. Анда бул иште жаңы жагдайлардын бар экени, мурдагы тергөөдө бийликтин жогорку тепкичиндеги жетекчилердин аракеттерине, «Тайфун» жана «Буран» операцияларына укуктук баа берилбегени белгиленген.
Кыргыз парламенти бүгүн Жерүй алтын кенин иштетүү жөнүндө австриялык “Глобал голд” компаниясы менен “Кыргызалтын” ишканасынын ортосунда түзүлгөн келишимди мыйзамсыз деп жаратпай салды. Депутаттар чет элдик инвестор тендер аркылуу тандалбагандыктан мыйзам бузулган деп белгилешип, ага жол берген адамдарды жоопко тартууну талап кылышууда.
Кыргыз улуттук илимдер академиясында академиктерди жана мүчө-корреспонденттерди шайлоо 25-майда болду. Ага жалпысы болуп, токсонго жакын окумуштуулар катышып, ат салышты. Алардын бири, тарых илимдеринин доктору, билим, илим жана жаштар саясаты министри Досбол Нур уулу шайлоо тууганчылык, жердешчилик принцибинде өтөрүн белгилеп, ага катышуудан баш тартты.
Эл аралык “Транспаренси интернешнл компани” уюмунун маалыматы боюнча Кыргызстан дүйнө жүзүндөгү коррупцияланган өлкөлөрдүн катарына кирет. Айрыкча, коррупция кийинки учурда Кыргызстандын сот системасын чырмоодо.
Коргоо министрлиги май айындагы аскердик майрамдарга карата 27-май күнү Алатоо аянтында чоң салтанат өткөрүүгө даярдык көрүүдө. Дал ушул күнү ушул эле аянтта көп адам катышкан ири митинг өткөрөрүн оппозициялык күчтөр мурдатан эле жар салып келатышкан. Ошол себептүү, митинг өткөрүүгө тоскоолдук жасоо үчүн борбордук аянтка атайын аскердик салтанат уюштурууда деп оппозиция өкүлдөрү бийликти сынга алышууда.
12-майда Өзбекстандын Бишкектеги элчилигинин алдында Анжиян окуясынын бир жылдыгына байланыштуу чакан митинг болуп өттү. Аны “Кылым шамы” бейөкмөт уюм уюштуруп, митингге башка бейөкмөт уюмдардын өкүлдөрү, Өзбекстандык журналисттер жана карапайым жарандар катышты.
Рысбек Акматбаевдин саясий тагдыры жакын арада чечилбей турган болду. БШКнын мүчөлөрү Акматбаевге депутат катары каттоо маселесин анын үстүнөн соттук териштирүү аяктагандан кийин кароо жөнүндө чечимге келишти.
Мамлекет казынасынан 420 миң долларды уурдоого катышы бар деген айып менен сот жообуна тартылып жаткан беш кишинин үстүнөн сот иши аяктады. Биринчи Май райондук соту жасаган иштеринде кылмыш курамы жоктугуна байланыштуу алардын баарын толук актаган чечим кабыл алды.
23-апрель күнү Кадамжай жана Куршаб шайлоо аймактарында Жогорку Кеңешке шайлоонун экинчи айлампасы болуп өттү. Кадамжай аймактык шайлоо комиссиясы 51,7% менен талапкер Нооманжан Аркабаевди жеңүүчү деп тапты. Ал эми Куршабда добуштарды бурмалоо болду деп талапкерлер ызы-чуу салып, шайлоо комиссиясы добуш берүүнү толук санап бүтө албай жатат.
Улуттук банктын мурдагы жетекчиси Улан Сарбановду, мурдагы каржы министри Султан Медеровду жана эсеп палатасынын мурунку жетекчиси Медет Садыркуловду мамлекеттик айыптоочу он эки жылдан эркинен ажыратууну сурап жатат. Алар экс-президент Аскар Акаевге берилди деп изи сууган 420 миң доллардын доосу боюнча айыпталышууда. Бул чуулгандуу иш боюнча сот жыйыны бүгүн уланат.
Өкмөт үйүн камоого алып жаткан Рысбек Акматбаевдин жактоочуларына 31-мартта кечинде Президент К. Бакиев чыгып жолукту. Ал талашка айланган маселени сот аркылуу гана чечүүгө болорун айтып, нааразылык акциясынын катышуучуларын тарап кетүүгө чакырды. Бирок, чогулгандар мамлекет башчынын сөзүнө кулак салышкан жок.
Кыргызстандын Борбордук шайлоо комиссиясы депутаттыкка ат салышып жаткан Рысбек Акматбаевди шайлоодон четтетип коюуга укуктук негиз жок экендиги жөнүндө расмий билдирүү таркатты. Мурда соттолгон фактысы жоюла элек болушу мүмкүн Акматбаевди депутаттык жарыштан алып салбай жаткандыгы үчүн Боршайкомду бейөкмөт уюмдар сынга алып жатышкан болчу.БШКны айыптаган сын-пикирлер айрым маалымат каражаттарында да жарыяланып кеткен.
Бишкек шаардык соту 15-март күнү Рысбек Акматбаевдин ишин карап баштады. Акматбаев баш болгон тогуз адамды актаган Биринчи май райондук сотунун чечимин талашкан арыз менен шаардык сотко Бишкек милициясынын тергөөчүлөрү кайрылышкан болчу.
Жыл жаңыргандан берки өлкөбүздүн социалдык-экономикалык жетишкендиктери өткөн жылкы эки айлык көрсөткүчтөргө караганда кубантарлык эмес. Бул 14-март күнү Өкмөт үйүндө өткөн жыйында белгилүү болду. Тоо-кен тармагында өсүш дээрлик жок, ал эми энергетиканын жалпы карызы 1 млрд сомдон ашкан.
Жакында март ыңкылабына бир жыл болот. Былтыр ушул күндөрү Кыргызстандын ар кайсы аймактарында шайлоонун 1-айлампасынын жыйынтыгына нааразы болушкан шайлоочулар нааразылык билдирип атышкан эле. Ал эми Жалалабадда Элдик кыймылдын мүчөлөрү Акаевдин бийлигин алмаштырууну пландаштырып жатышкан. Ошол күндөрдүн негизги жетекчилеринин бири, Элдик кыймылдын штаб башчысы болуп турган Азимбек Бекназаров ыңкылап кандайча ишке ашырылганы тууралуу “Азаттыкка”айтып берди.
Жакында март ыңкылабына бир жыл болот. Былтыр ушул күндөрү Кыргызстандын ар кайсы аймактарында шайлоонун 1-айлампасынын жыйынтыгына нааразы болушкан шайлоочулар нааразылык билдирип атышкан эле. Ал эми Жалалабадда Элдик кыймылдын мүчөлөрү Акаевдин бийлигин алмаштырууну пландаштырып жатышкан. Ошол күндөрдүн негизги жетекчилеринин бири, элдик кыймылдын штаб башчысы болуп турган Азимбек Бекназаров ыңкылап кандайча ишке ашырылганы тууралуу “Азаттыктын” угармандарына айтып берди. Анда назарыңыздарга ошол маекти сунуштайбыз. Аны кабарчыбыз Замира Кожобаева жүргүзөт.
Казакстандын белгилүү оппозиционери Алтынбек Сарсенбаевдин өлүмүнө тиешеси бар деген шек менен Казакстандын улуттук коопсуздук кызматынын “Арстан” деп аталган атайын бирикмесинин беш кызматкери кармалгандан кийин, улуттук коопсуздук кызматынын жетекчиси Нартай Дутбаев кызматтан чегинди. Буга карата айрым кыргыз саясатчылар өз пикирин билдирип, Кыргызстандын күч стуктураларынын жетекчилери Таштемир Айтбаев менен коопсуздук кеңешинин төрагасы Мирослав Ниязов тууралуу сөздөр айтыла баштады. Таштемир Айтбаевге парламент бир нече жолу ишеним көрсөткөн жок, ал эми коопсуздук кеңешинин катчысына сөзүнө турган жок деген кинелер коюулууда.
Дагы жүктөңүз
