Бүгүн Кыргызстандын президенти Роза Отунбаева алтымыш жашка чыкты. Президенттик кызматка киришкен жылга туш келген бул мааракеге байланыштуу кандайдыр бир иш-чаралар өтөөр-өтпөсү тууралуу алдын-ала маалымат таратылган жок. Канткен менен дипломат жана саясатчы катары таанылган Роза Отунбаеванын таржымалына кызыккандар бул күнү аз эмеси айкын.
Вице-премьер-министр Азимбек Бекназаров Ош шаарында борбордук аянтта чогулгандардын алдында Мелисбек Мырзакматовдун мэр кызматында кала берерин жарыя кылды. Ошто эки күндөн бери шаар башчысы кызматынан алынары тууралуу кабар тарап, ошол себептүү мэрдин миңдеген жактоочулары каршылык акциясын өткөрүп жатышкан.
12-август – Жаштардын эл аралык күнү. Кыргызстанда жаштар маселеси кантип чечилип жатат? Бул багытта “Азаттыктын” суроолоруна Жаштар иштери боюнча министр Алиясбек Алымкулов жооп берди.
“Жарандык коом коррупцияга каршы” укук борбору тараткан маалыматка караганда укук коргоочу Төлөйкан Исмаилова өлкөдөн убактылуу чыгып кетүүгө мажбур болду жана башка өлкөдөн баш калка издөө жөнүндө ою жок.
Бүгүн Кыргызстанда аза күтүү күнү. Убактылуу өкмөттүн чечими менен Ош жана Жалал-Абаддагы кайгылуу окуялардан улам аза күтүү 16-июндан тарта 18-июнга дейре үч күнгө созулмакчы. Коогалуу аймакта акыркы эки күндө кырдаал салыштырмалуу турукташып, жаңжалдардын себептерин, кесепеттерин иликтөө жүрүп жатат. Оор жагдай түзүлгөн шаарларга туш тараптан гуманитардык жардам жеткирилүүдө.
9-июнда кечки саат алтылар чамасында Токмок шаарындагы "Мега-Сити" соода борборунда жардыруу болуп, андан төрт киши жабыркады. Бул окуя боюнча ИИМдин маалымат жана коомчулук менен байланыш башкармалыгынын жетекчисинин орун басары Рахматулла Ахмедов "Азаттыктын" суроолоруна жооп берди.
Конституциянын жаңы долбоору боюнча Кыргызстанда кандай башкаруу орнойт? Эмне үчүн өткөөл мезгилдин президенти кызматына Р. Отунбаевадан башка атаандаш талапкер коюлган жок? Ушул сыяктуу суроолорго Убактылуу өкмөт төрайымынын орун басары Ө. Текебаев жооп берди.
Өткөөл мезгилдин президенти Роза Отунбаева убактылуу өкмөттүн референдум жана парламенттик шайлоо алдында жүргүзүп жаткан ички, тышкы саясаты, өзгөчө пикирдеги саясий күчтөр менен мамилелер, маалымат жана идеология саясаты тууралуу “Азаттыктын” суроолоруна жооп берди.
Улуу Ата Мекендик согуштун ардагери, 86 жаштагы Усубалы Токталиев Жеңиштин 65 жылдыгы белгиленер алдында бир бөлмөлүү батир алуу укугуна ээ болду. Ардагер “Азаттыкка” берген интервьюсунда анын уулу Акин Токталиев мурдагы президент Аскар Акаевдин адвокаты болгону батир алууга тоскоолдук кылганына да токтолду.
Убактылуу өкмөттүн башчысынын орун басары Темир Сариев мурдагы президент Курманбек Бакиев Минскиде жасаган соңку билдирүүсү менен дүйнө коомчулугу алдында дагы бир жолу туруксуздугун көрсөттү деп эсептейт.
24-мартта Март ыңкылабына беш жыл болду. Бул күнгө байланыштуу ыңкылаптын ана башында тургандардын бири, "Жаңы Кыргызстан" саясий партиясынын лидери Үсөн Сыдыковго "Азаттык" бир катар суроолор менен кайрылды.
Кыргызстанда басма сөз эркиндиги кооптуу жагдайга кирептер болууда. Медиа уюмдар кечээ ушундай билдирүү жасашты. Алардын баамында өңчөй көз карандысыз маалымат каражаттарынын жабылып, тосмолонуп жатышына бийликтин таасири бар. Расмий бийлик өкүлдөрү болсо мындай дооматтардын коюлушун жөндүү деп эсептешпейт.
Бүгүн Бишкекте Ынтымак курултайы ишин баштайт. Бейрасмий булактарда Ынтымак курултайы адегенде Төр Кеңешти, анын төрагасын шайлап, андан кийин президент Курманбек Бакиевдин кайрылуусун угуп, анын негизинде талкуу жүрөөрү айтылууда. Буга ынабаган “Кыргыз эл биримдиги” курултайга катышуудан баш тартты.
БЭК уюштурган Элдик курултай апта ичиндеги олуттуу саясий окуялардын бири болду. Курултайда оппозиция бийликке жети талап коюп, аны аткарууга бир жума мөөнөт берди. Бийликтин айрым өкүлдөрү талаптар бийликтин Ынтымак курултайында каралыш ыктымалдыгын айтып жатышат.
17-мартта Хелсинки комиссиясы Кыргызстандагы сөз эркиндигине тынчсыздануусун билдирди. Буга биринчи кезекте “Азаттык” үналгысынын угармандарга жетпей жатышы негиз берүүдө. Бийлик болсо “Азаттыктын” уктурууларын кайра жандандыруу багытында аракет көрүлүп жатканын айтууда. Бул аралыкта Башкы прокуратуранын сунушу менен “Ачык саясат”, “Назар” гезиттерин сот жапты.
Аксы окуясына 17-мартта сегиз жыл болду. Анда окко учкандарды бүгүн Бишкекте Элдик курултай эскерди. Аксы окуясына байланышкан кылмыш иштерине чекитти Жогорку Сот 2007-жылы койгон. Жабырлануучулар жана алардын тарапкерлери болсо ушу күнгө чейин кандуу окуяга укуктук да, саясий да баа бербей келатат деп бийликке нааразы.
Элдик курултай бүгүн Социал-демократтар партиясынын баш кеңсеси жайгашкан Медиа-форум комплексинин аймагында өтмөй болду. Мындай чечимди кечээ БЭКтин саясий бюросу кабыл алып, аны оппозициянын сунушун бийликтин колдобой койгондугу менен негиздеди. Курултайга өлкөнүн ар тарабынан 7 миң чамалаш киши чогулат деп күтүлүүдө.
АКШнын Борбордук Командачысы Дэвид Петреус Бишкекке келип кетти. Бул сапарга аралаш Аксакалдар Кеңеши АКШнын Транзиттик Борборун Кыргызстандан чыгарууну бийликтен талап кылды. Бул апта ичинде катталган Кыргызстандагы олуттуу саясий окуялардын бири болду.
Конституциялык Сот 2-мартта “Жарандардын тынч, куралсыз чогулуу, митингдерди, демонстрацияларды эркин өткөрүү жөнүндөгү” мыйзамдын 3-беренесин жокко чыгарды. Укук коргоочунун датынын негизинде кабыл алынган мындай чечим коомчулукта олуттуу талаш-тартыштарга жем таштады.
Ушул күндөрү айрым жарандык коомдор алдыдагы бийлик жана оппозиция курултайларына бирдей катышаарын билдирип жатышат. Алардын бири - “Демократия жана жарандык коом үчүн” коалициясы. Коалициянын лидери Динара Ошуракунова “Азаттык” менен ой бөлүштү.
Дагы жүктөңүз
