Кыргызстандын Тышкы иштер министрлиги (ТИМ) Украинадагы кыргыз жарандарын Венгрия аркылуу (Будапешт - Стамбул - Бишкек) алып чыгып кетүү жолдорун иштеп чыкты. Бул тууралуу ТИМдин расмий билдирүүсүндө айтылат.
Эвакуациялоо үчүн кыргызстандыктар Украинага мыйзамдуу жол менен келген болушу керек жана жанында тиешелүү документтери болушу шарт. Мындан сырткары алар Венгрия аркылуу Кыргызстанга чыгып кетүү үчүн авиабилеттерди алуусу зарыл.
Кыргызстандын жарандары украин-венгр чек арасындагы “Чоп” өткөрмө бекетине өздөрүнүн эсебинен чогуу алып келинет. Венгриянын аймагында аларды аэропортко чейин Кыргызстандын Будапешттеги элчилигинин өкүлдөрү коштоп барат.
Бул мүмкүнчүлүктөн пайдалануу үчүн Кыргызстандын жарандары Кыргызстандын Украинадагы элчилигинин консулу Эрмек Каныбековго байланышы керек. Анын номери +380997573413, +380442370347.
Кыргызстандын ТИМи учурда Украинанын бүткүл аймагында каршылашкан тараптардын ортосунда атышуулар жүрүп жатканын белгилеп, ары-берүү каттоодо жеке коопсуздукка коркунуч келиши мүмкүндүгүн эскертет. Ушуга байланыштуу элчилик кыргыз жарандарын эгер жашаган жери коопсуз болсо Украинанын аймагында кырдаал турукташканга чейин ошол жерде кала берүүнү сунуштайт.
25-февралда Брюсселде Европа Биримдигине (ЕБ) мүчө мамлекеттердин тышкы иштер министрлери Орусиянын президенти Владимир Путин менен тышкы иштер министри Сергей Лавровдун активдерин камакка алууну макулдашты.
Бул чара ЕБдин лидерлеринин ушул эле күнкү жыйынында кабыл алынган масштабдуу санкциялардын бир бөлүгү болуп калды.
Тышкы иштер министрлери бул чараларды Орусиянын Украинага чабуулуна жооп катары киргизди. Азырынча Путин менен Лавров мындан канчалык жабыр тартары белгисиз жана ал символикалык мүнөзгө гана ээ экени да маалым эмес.
Украинанын президенти Владимир Зеленский 25-февралдын кечинде өзүнүн телеграм-каналында Киевдеги президенттин кеңсесинде тартылган видеокайрылуу таратып, ал борбор шаарда экенин маалымдады.
Видеодон Зеленскийди, президенттин кеңсесинин башчысы Андрей Ермакты, “Эл кызматчысы” фракциясынын лидери Давид Арахамияны, премьер-министр Денис Шмыгалда жана президенттин кеңешчиси Михаил Подолякты көрүүгө болот.
“Биз Киевдебиз. Биз Украинаны коргоп жатабыз”,-деди анда Зеленский.
Мурдараак CNN телеканалы өз булактарына таянуу менен “Владимир Зеленский бункерге эвакуация болгонун” билдирген. Ал бункер кайда экени айтылган эмес.
Киевдин мэри Виталий Кличко орус аскерлеринин жакындап келишине байланыштуу борбор шаар коргонуу режимине өткөнүн билдирүүдө. Украинанын аскердик техникалары шаарды кайтарып турушат. Аскерлерден сырткары жергиликтүү тургундарга да курал-жарак таратылган.
Орусиянын Коргоо министрлиги буга чейин алардын аскерлери Киевге батыш тарабынан жана түндүк тарабынан кирип баратышканын кабарлаган.
Комшо Штаттардагы бир катар жалпыга маалымдоо каражаттары (ЖМК) Вашингтон орус президенти Владимир Путинге санкция салышы мүмкүндүгүн билдирүүдө. New York Times гезити жазгандай, АКШ мындай чечимди жума күнү жарыялашы мүмкүн.
CNN телеканалы өз булактарына таянып билдиргендей, “кара тизмеге” Орусиянын Путинден башка жогорку расмий жетекчилери да киргизилиши ыктымал.
Эгер америкалык маалымат каражаттары жазгандар ырасталса, анда Путин Украинага кол салууга байланыштуу АКШ санкция салган Орусиянын эң жогорку расмий жетекчиси болуп калат.
Мунун алдында Европа Биримдигине (ЕБ) мүчө мамлекеттердин тышкы иштер министрлери Орусиянын президенти Владимир Путин менен тышкы иштер министри Сергей Лавровдун активдерин камакка алууну макулдашкан.
Орусиянын Украинага чабуулу 24-февралдын таңынан бери уланууда. Куралдуу кагылышуулар баш калаа Киев баштаган бир катар шаарларда жүрүп жатат. Украинанын бийлиги кармаштын биринчи күнү 137 аскери мерт болгонун кабарлады, Орусия курмандыктар боюнча маалымат тарата элек. Киев 25-февраль, саат 15:00гө карата үч миңдей орус аскерин жок кылганын маалымдады. Москва муну ырастаган жок.