Украинанын президенти Владимир Зеленский Британиянын премьер-министри Борис Жонсон менен сүйлөшүү жүргүзгөнүн жазды. Бүгүн Украина өнөктөштөрдүн колдоосуна муктаж экенин белгилеп, дүйнөнү Орусияга катаал санкцияларды салууга чакырды.
Бүгүн, 25-февралда Орусиянын Бишкектеги элчилигинин алдында отузга жакын киши Украинаны колдогон акция өткөрдү. Ушул эле күнү Ош шаарындагы Орусиянын Башкы консулдугунун алдында дагы ушундай акция болду.
Акцияга чыккандар "Согушка жол жок!", "Тынчтык үчүн!", "Алдоону жана өлтүрүүнү токтот!" деген жазууларды кармап турушту. Украинаны колдогон акция 24-февралда дагы Бишкек шаарында өткөн.
Тышкы иштер министри Руслан Казакбаев Украинанын Кыргызстандагы элчиси Валерий Жовтенко менен жолугушту. Тышкы иштер министрлигинин басма сөз кызматы жолугушуу 24-февралда болгонун кабарлады.
Элчи министрге Украинадагы абал жөнүндө маалымат берген. Казакбаев конфликт жакын арада жөнгө салынарына ишеним артып, абалды курчуп кетпеши үчүн эл аралык уюмдардын аянтчасында жана Бириккен Улуттар Уюмунун Коопсуздук Кеңешинде дипломатиялык жол менен сүйлөшүү зарылдыгын белгилеген.
Украинанын президенти Владимир Зеленский 25-февралда таңга маал жасаган билдирүүсүндө 24-февралдагы кармашта украиналык 137 аскер каза болгонун билдирген. Жайкын тургундар арасындагы курмандыктар так эмес.
Херсон чабуулга кабылды