Орусиянын армиясы Украинанын Днепр аймагына учкучсуз учактар менен чабуул койгонун Днепропетровск облусунун губернатору Сергей Лысак 29-мартта билдирди. Анын айтканына караганда, шаарда жарылуулар катталып, өрт чыкты. Турак үйлөр зыян тартты.
Жергиликтүү маалымат каражаттары Bartolomeo ресто-мейманканасы соккуга кабылганын жазып, көп кабаттуу үй жана жер там күйүп жатканы тартылган видеону жарыялашты.
Днепрдин мэри Борис Филатов ресторан зыян тартканын ырастап, анын сүрөтүн, видеосун жарыялабоого чакырды.
Орусиянын Коргоо министрлиги Днепрге жасалган чабуул тууралуу комментарий бере элек.
Соңку маалымат боюнча, Днепрде 29-мартка караган түнкү чабуулдан кеминде төрт кишинин өмүрү кыйылды, дагы кеминде 21 киши жараат алды.
Орусиянын президенти Владимир Путин АКШ президенти Дональд Трамптын администрациясы учурунда Орусияга каршы киргизилген санкцияларды жеңилдетүү мүмкүнчүлүгүн текшерип жатат. Бул тууралуу Bloomberg булактарына таянуу менен билдирди.
Кремлдин стратегиясынын бир бөлүгү - Кара деңиздеги элдешүү боюнча сүйлөшүүлөрдүн алкагында Россельхозбанкты SWIFTке туташтыруу талабы бар.
SWIFT эл аралык банктык маалымат алмашуу жана акча которуу системасы Еврокеңештин юрисдикциясында турат. Bloomberg билдиргендей, Россельхозбанкты системага кошуу талабы Трамптын Европага таасирин текшерүү үчүн коюлган.
Агенттиктин булактары бул маселе оң жагына чечилсе санкциялык режимдин акырындык менен жеңилдешине алып келиши мүмкүн экенин белгилешти.
24-мартта Эр-Риядда өткөн сүйлөшүүлөрдүн экинчи айлампасы аяктагандан кийин Орусия Россельхозбанктан жана башка уюмдардан азык-түлүк жана жер семирткичтерди соодалоого байланыштуу чектөөлөрдү алып салууну сунуштаган. АКШнын мамлекеттик катчысы Марко Рубио Вашингтон бул маселени Москва жана Евробиримдик менен талкуулоого даяр экенин билдирген.
Ошол эле учурда Франция, Улуу Британия жана коалицияга кирген мамлекеттер учурда Орусияга каршы санкцияларды жеңилдетүү же алып салуунун убагы эместигин жарыялашкан.
Франциянын президенти Эммануэл Макрон 27-мартта 30га жакын өлкөнүн өкүлдөрүнүн Парижде өткөн жолугушуусунан кийин, тескерисинче, санкцияларды, айрыкча Орусиянын көмүскө флотунун кемелерине каршы санкцияларды күчөтүү мүмкүнчүлүгүн талкуулашканын билдирди.
Мындан сырткары Европа биримдиги Орусияга каршы санкциялардын 17-пакетин иштеп чыгууга киришкени белгилүү болду. Кезектеги чектөөлөргө байланыштуу иш баштапкы этапта экени айтылган.
Коалиция ЕБ менен НАТОнун көпчүлүк өлкөлөрүн бириктирет. Булар мүмкүн болгон элдешүү келишими түзүлгөнгө чейин Украинага колдоо көрсөтүүгө жана ал түзүлгөндөн кийин ага коопсуздук кепилдигин берүүгө даяр өлкөлөр. Анын негизги катышуучулары Франция жана Улуу Британия.
Киев АКШдан кен байлыктар боюнча келишимдин жаңы вариантын алганын 29-мартта "Азаттыктын" украин редакциясы жазды. АКШ документти Украинанын вице-премьери Юлия Свириденкодон берип жиберген.
Украин президенти Владимир Зеленскийдин айтымында, Свириденко келишимдин жаңы вариантын “такыр башка документ” деп мүнөздөдү.
"Ал жерде талкууланбаган көп нерселер бар, ошондой эле тараптар буга чейин четке кагып койгон нерселер да пайда болду", - деген Свириденко.
Зеленский Киев өзүн карыздар деп эсептебей турганын билдирди.
Анын “Биз колдоо үчүн ыраазыбыз, бирок бул насыя эмес, биз ага жол бербейбиз” деген сөзүн УНИАН агенттиги жазды.
Мурдараак Financial Times жана Bloomberg АКШ менен Украинанын ортосундагы пайдалуу кендер боюнча жаңы келишимдин долбоорунун чоо-жайын жарыялаган. Бул документте Вашингтон Украинанын бардык жаратылыш ресурстарын, анын ичинде газ жана мунай, ошондой эле пайдалуу кендерди иштетүүгө байланышкан бардык инфраструктурасын камтыган.
АКШ бул келишим аркылуу Украина бардык акчаны кайтарып бермейинче инвестицияларынын баарын өзү көзөмөлдөгүсү жана ошол инвестициялык каражаттан түшкөн кирешени биринчи өзү алгысы келет.
Макулдашуунун мурдагы версиясында Зеленский талап кылган коопсуздук кепилдиктери камтылган эмес.
Ал долбоорго ылайык, украин өкмөтү мамлекетке таандык жаратылыш ресурстарын сатуу аркылуу түшкөн кирешенин 50 пайызын АКШ-Украина башкарган кайра куруу инвестициялык фондуна бөлүүгө милдеттендирилмек.
Кошмо Штаттардын президенти Дональд Трамп жакын арада Киев менен Вашингтон сейрек кездешүүчү минералдар жана табигый ресурстар боюнча келишимге кол коёрун 20-мартта билдирген.
Трамп Ак үйдө журналисттерге курган маегинде Украинадагы тынчтык келишимине жетишүү боюнча аракеттер "жакшы жүрүп жатканын" айткан.
Украинанын Куралдуу күчтөрүнүн Башкы штабы 28-мартка караган түнү Полтава облусу Орусиянын жапырт дрон чабуулуна кабылганын билдирди.
"Орусиялык баскынчылар кезектеги согуш кылмышын ишке ашырышты. Алар Shahed согуштук дрондору менен жапырт чабуул жасашты" деген мекеме соккуга жарандык инфраструктура, жайкын тургундар жашаган жерлер, административдик имараттар жана мунай-газ өнөр жай ишканалары кабылганын маалымдады.
Орус армиясынын учкучсуз учактары Украинанын Николаев облусунун Вознесенск шаарын, Одесса калаасын да аткылаганын, айрым жерлерде жарылуу болгонун, Сумы облусуна башкарылуучу бомбалар ыргытылганын жергиликтүү бийлик кабарлады.
Жапырт дрон чабуулуна кабылганын 28-мартта Орусия да билдирди. Бийликчил Телеграм- каналдар бир апта мурда сокку болгон Энгельс шаарындагы стратегиялык авиация базасы кайрадан бутага алынганын кабарлап, бул үчүн украин тарапты айыптоодо. Кандайдыр бир жабыркоо тууралуу азырынча маалымдала элек.
20-мартта Энгельс учкучсуз учактардын жапырт чабуулуна туш болгон, жергиликтүү бийлик муну согуш башталгандан берки эң чоң сокку деп атаган. Украинанын Куралдуу күчтөрүнүн Башкы штабы ошол күнкү соккудан Орусия украин аймактарына чабуул коюу үчүн колдонуп жаткан канаттуу ракеталарынын запасы жок кылынганын билдирген.