Орусиянын Белгород облусу учкучсуз учактардын чабуулуна туш болгондо бир киши жарадар болгонун «Пепел» Телеграм-каналы жазды. Губернатор Вячеслав Гладков 18 жаштагы жергиликтүү тургун жабыркаганы тууралуу маалыматты тастыктады.
«Пепел» дрон кулаганда соода борбору өрттөнгөнүн билдирди.
Телеграм-каналдар Краснояруж районунда эки автобус минага кабылганда беш киши жараат алды деп билдиришти. Гладков кийинчерээк үч киши жабыркаганын жазды.
Орусиянын Коргоо министрлиги шейшембиге караган түнү укрианалык 46 дрон атып түшүрүлгөнүн, 41и Белгородго учурулганын, калгандары Брянск, Курск жана Орлов облустарын бутага алганын билдирди.
Курскини башкарып келаткан Александр Хинштейн аймактагы соккулардан беш киши жабыркаганын айтты.
Кремлчил блогерлер украин армиясы шейшембиде Белгород облусу менен чек арада активдешкенин жана Сумы облусу жактан кирип барууга аракеттенгенин жазышууда.
Губернатор Гладков билдиргендей, Украина менен чек арада кырдаал татаал болуп турат.
Телеграм-каналдар жазган ал жактагы кармаштар тууралуу эки тараптын тең аскерлери расмий түрдө кабарлай элек.
Орусия өз кезегинде кошуна өлкөсүнүн аймактарын аткылоону улантууда.
Орусия шейшембиге караган түнү Украинаны 137 дрон менен аткылады. Анын 63ү атып түшүрүлгөнүн, 64ү бутага жетпей калганын Украинанын аба күчтөрү маалымдады.
Кабарда Орусиянын чабуулунан Харьков, Сумы, Полтава, Днепропетров жана Черкассы облустары зыян тартканы жазылган.
Днепропетров облусунда дрон чабуулунан эки ишканада өрт чыкканы кабарланды.
Евробиримдикке мүчө өлкөлөрдүн тышкы иштер министрлери Украинага 40 миллиард евро өлчөмүндө жардам берүү боюнча келишимге келе алышкан жок. Бул тууралуу Брюсселде өткөн Евробиримдик кеңешинин жыйынынан кийинки маалымат жыйында Европанын тышкы саясат кызматынын башчысы Кая Каллас билдирди. Ал жакын арада оң жыйынтык болоруна үмүт артты.
Жаңы жардам траншын бөлүү демилгесин Кая Каллас көтөргөн. Ал март айында Украинага 20 миллиард евро бөлүүнү сунуштаган. Бирок Венгрия бул долбоорду бөгөттөп, ал 6-мартта өткөн Евробиримдик саммитинин жыйынтыктоочу чечимине кирбей калган. Euractiv басылмасынын маалыматы боюнча, Евробиримдиктин Украинага аскердик жардамын бөгөттөөдөн качуу үчүн ыктыярдуу фонд түзүү сунушу айтылган.
Кээ бир европалык саясатчылар бул план боюнча күмөндүү ойдо экенин билдиришти. Словакиянын премьер-министри Роберт Фицо Брюсселдеги саммиттин алдында анын өлкөсү Украинага Евробиримдиктин бюджетинен жардам көрсөтүүнү колдобой турганын айтты. Италиянын тышкы иштер министри Антонио Таяни La Stampa гезитине берген маегинде көптөгөн өлкөлөрдө сунушталган план боюнча суроолору бар экенин белгиледи.
Украинанын президенти Владимир Зеленский украин армиясынын Орусиянын Курск облусундагы операциясы аягына чыкканын билдирди. Бул тууралуу ал аталган облустун украин аскерлери ээлеп алган Суджа шаарын Орусиянын армиясы бошоткондон бир күндөн кийин маалымдады.
Украин Куралдуу күчтөрү Орусиянын чек арадагы Курск облусуна чабуулун 2024-жылдын августунда баштаган. Согушка чейин 5 миңдей калкы бар Суджа Орусиянын Украина ээлеп алган аймагындагы эң ири шаар болду.
Курск операциясы башталган алгачкы күндөрү Зеленский Орусиянын жерлерин ээлеп алуу орус президенти Владимир Путиндин башкаруу доору бүткөнүнүн символикалык белгиси болуп каларын айткан.
"Биз Орусия Путиндин тушунда кандай жол менен баратканын көрүп турабыз: 24 жыл мурда "Курск" кемесинин кыйрашы анын башкаруусунун символикалык башталышы болсо, азыр эми эмне менен бүтүп жатканы көрүнүп турат. Бул дагы Курск", - деген украин президенти.
Кийин Зеленский Курск облусундагы ээленген аймактар Орусия ээлеп алган украин аймактарына айырбаштоо үчүн колдонуларын айткан.
Ал эми 14-мартта украин президенти армиясынын Курскидеги милдети Орусияны өз аскерлерин Покровск, Харьков жана Сумы багытынан чыгарып кетүүгө мажбурлоо болгонун, бул максат ишке ашканын журналисттерге билдирди.
"Мен операция ийгиликтүү ишке ашты деп эсептейм", - деди Зеленский.
Орусиянын президенти Владимир Путин менен АКШнын лидери Дональд Трамп Курск облусунда көп украин аскерлери курчоодо калганын айтып жатышат.
Украина мындай маалыматты четке кагууда. Согушту иликтеген журналисттер да украин аскерлери Орусиянын аймагында курчоодо турганы тууралуу билдирүүлөрдү ырасташкан жок.
Украиналык Deepstate долбоорунун маалыматына караганда, Украина Орусиянын бир нече кыштагына көзөмөл кылууну улантууда. Москва да украин аскерлери ээлеп алган ошол кыштактар бошотулганы тууралуу маалымдай элек.