Трамп Зеленскийди "шайлоосуз отурган диктатор" деп сындады
Кошмо Штаттардын лидери Дональд Трамп украин президенти Владимир Зеленскийди "шайлоосуз отурган диктатор" деп атап, ал "тезирээк кыймылдабаса өлкөсүнөн кол жууйт" деп сындады. Трамп мындай пикири менен Truth Social cоциалдык тармагына бөлүштү.
"Ал арада биз согушту токтотуу боюнча Орусия менен ийгиликтүү сүйлөшүүлөрдү жүргүзүп жатабыз. Анткени бул Трамп жана Трамптын администрациясынын гана колунан келээрин баары мойнуна алып жатат", - деп кошумчалады америкалык лидер.
Ал украин лидерин "АКШ жана Трампсыз өзү эч качан жайгара албаган согушка аралашып, Американы 350 миллиард доллар сарптоого көндүргөн", - деп сындады.
Трамп ошондой эле Зеленскийди "шайлоо өткөрүүдөн баш тартып жатканы үчүн" айыптады. Ал украин президентинин рейтинги төмөн экенин дагы бир ирет белгиледи.
Украинада 2022-жылдын февралынан бери согуштук абал жарыялангандыктан шайлоо өткөрүүгө мүмкүн эмес.
Зеленский 19-февралда өткөргөн маалымат жыйында АКШ согуш башталганы 60 миллиард долларлык курал-жабдык жана 31,5 миллиард акчалай каражат бөлгөнүн билдирген.
АКШнын президенти ырастагандай, Кошмо Штаттар Европага караганда Украинага 200 миллиард доллар көп короткон.
Буга чейин Трамп Зеленскийдин рейтинги 4% түзөрүн айткан. Украинанын президенти бул "Орусия тараптан жайылган жалган маалымат экенин" белгилеген. Зеленский Киев эл аралык социология институтунун сурамжылоосуна таянып, ага украиндердин 57% ишенерин айткан.
АКШ президенти Дональд Трамптын администрациясы Украинанын жана айрым Латын Америка мамлекеттеринин жарандары тапшырган гуманитардык иммиграциялык арыздарды кароону убактылуу токтотту. Бул тууралуу CBS News телеканалы АКШнын Жарандык жана иммиграция кызматынан (USCIS) алган документке таянып билдирди.
Маалыматка караганда, мындай чечим "улуттук коопсуздукка коркунучтан жана көз боемочулуктун көбөйүшүнөн улам" кабыл алынган.
Чектөөгө мурдагы президент Жо Байдендин учурунда негизделген бир нече программа туш болду. Алардын арасынан "Украина үчүн биригүү" программасынын алкагында АКШга 240 миң украиналык кирген.
Андан тышкары CHNV деп аталган программа Куба, Гаити, Никарагуа жана Венесуэладан барган жарым миллиондон ашуун адамга Американын аймагына кирүүгө шарт түзгөн.
СBS News белгилегендей, мындай чечимге Американын аймагына кирип документтерин мыйзамдаштыруу жараянын баштагандар дагы туш болушат. USCISтин ички буйруктарына караганда, бул адамдардан документ алууга тыюу салынат.
Трамп быйыл 20-январда ант берип, кызматка расмий киришкени Американын Мексика менен чек арасына өзгөчө абал режимин киргизип, CBP One мобилдүү тиркемесин жаптырган.
Байдендин бийлиги маалында түзүлгөн бул тиркеме Мексика аркылуу киргендерге кезекке туруп, башкалка сураганга мүмкүнчүлүк берген. Бул тиркемени Орусия жана Борбор Азиядан барган жүздөгөн адам активдүү колдонуп турган.
Президент Трамп иммиграцияга жана Мексика менен чек арага байланыштуу жарлыктарын АКШнын улуттук коопсуздугун жана суверендүүлүгүн коргоо аракети катары түшүндүргөн.
Украинанын президенти Владимир Зеленский АКШнын президенти Дональд Трамптын атайын өкүлү Кит Келлог согушка барып, орус армиясына туруштук берип жаткан украин аскерлери менен сүйлөшүп көрүшү керек деген пикирде. Ал мындай сунушун 19-февралдагы маалымат жыйында айтты. Трамптын Украина жана Орусия боюнча атайын чабарманы Келлог Киевге шаршембиде барган. Бул анын кызматка дайындалган январь айынан бери Украинага алгачкы сапары.
Зеленский Келлогду майданга коштоп барууга даяр экенин да айтты.
"Биз дагы барабыз. Ал жактагы аскерлер менен сүйлөшүп көрсүн. "Мунун баарын орустарга бере салып, коопсуздук кепилдиктери жок эле үйгө тезирээк кетүү үчүн добуш берүүгө даярсыңарбы?" деп алардан сурап көрсүн. Мен үчүн Келлог мырза бул маалыматты өзү алганы маанилүү", - деди Зеленский.
Ал Келлог ошондой эле Украинанын чалгын кызматынын жана Коопсуздук кызматынын өкүлдөрү менен жолугарын кошумчалады.
Келлог буга чейин тынчтыкка жетүү үчүн Киев да, Москва дагы эпке келиши керек экенин бир нече жолу айткан. Киев аймактык жана саясий жактан Орусиянын талаптарына көнүү мүмкүн эмес экенин белгилейт.
Соңку жумада Келлог Украинага колдоо көрсөткөн Евробиримдикке мүчө мамлекеттердин өкүлдөрү менен жолуккан.
Украинадагы согушту токтотуу маселеси АКШ президенти Дональд Трамп кызматка киришкени күч алды. 18-февралда Сауд Арабиясында Америка менен Орусиянын делегацияларынын биринчи жолугушуусу өттү. Ушул эле күнү Трамп журналисттердин суроолоруна жооп берип жатып, Украинадагы "согушту токтотуу келишимине жетишерине терең ишеничте" экенин билдирди.
АКШ президенти Дональд Трамп Украинанын мамлекет башчысы Владимир Зеленскийдин сөздөрүнө нааразы экенин билдирди. Буга чейин Зеленский Украинаны Сауд Арабияда өткөн АКШ-Орусия сүйлөшүүсүнө чакырбай коюшканын бир нече жолу белгилеген.
"Бүгүн мен алар чакырылбай калганына нааразы экенин уктум. Бирок аларда үч жыл, андан да көп убакыт бар болчу. Мунун баарын оңой эле чечип койсо болор эле. Макулдашып алсаңар болмок", - деди Трамп.
Америка президенти муну менен эмне айткысы келгенин тактаган жок. Ал буга чейин бир нече ирет Украинанын НАТОго кирүү мүдөөсү согушка себеп болгонун айткан. Эксперттер согуш Путиндин империялык амбицияларынан улам башталганын белгилеп жүрүшөт.
Флоридадагы Мар-а-Лагодогу үйүндө 18-февралда журналисттердин суроолоруна жооп берип жатып Трамп Украинадагы "согушту токтотуу келишимине жетерине ишенерин" ырастады.
"Менимче, бул согушту токтотууга толук ыйгарым укугум бар",-деди Трамп.
18-февралда Эр-Риядда АКШ менен Орусия делегацияларынын алгачкы сүйлөшүүсү өткөн. Трамп ошондой эле ушул ай соңуна чейин Орусиянын президенти Владимир Путин менен жолугушуусу мүмкүн экенин айтып, Евробиримдикке мүчө мамлекеттердин Украинага бейпилдик күчтөрүн жиберүүсүнө каршы эместигин кошумчалады.
Трамп Украинада президенттик шайлоо өткөрүү зарылдыгын да баса белгиледи.
Украинанын президенти Владимир Зеленскийдин беш жылдык мөөнөтү расмий 2024-жылы май айында аяктамак. Бирок Украинанын Конституциясына ылайык, өлкөдө аскердик абал жарыяланып турган маалда шайлоо өткөрүүгө тыюу салынат. Зеленский согуштун активдүү фазасы аяктары менен шайлоо өткөрүлүшү мүмкүн экенин айткан.