Сентябрь айы башталгандан бери, эки жуманын ичинде орус аскерлери Украинага 640тан ашык "Шахед" дрондорун учурду. Бул тууралуу украин президенти Владимир Зеленский 16-сентябрда билдирди. Анын айтымында, көбү атып түшүрүлгөн. Зеленский жок кылынган дрондордун санын тактаган жок. Жекшембиден дүйшөмбүгө караган түнү Орусия 56 дрон менен сокку урганын, анын 53ү жок кылынганын айтты.
Shahed 136 - Иранда өндүрүлгөн учкучсуз учуучу аппарат (дрон). Ал биринчи жолу 2020-жылы көрсөтүлгөн жана негизинен аскердик максаттарда колдонулат. Shahed 136 дрону 2000 чакырымга чейин учуп, 40-50 килограмм жарылуучу затты алып жүрө алат.
Бул дрондор көбүнчө "жанкечти дрондор" деп аталат, анткени алар белгиленген максатка жеткенде жарылып кетет. Бул дрондорду азыр Орусия Украинадагы согушта колдонуп жатат.
Украинанын Аскердик-аба күчтөрү 16-сентябрга караган түнү Орусия өлкө аймагына учурган 56 согуштук дрондун 53ү атып түшүрүлгөнүн, негизинен бутага борбор калаа Киев алынганын, ушуну менен шаар сентябрь айы башталгандан бери сегизинчи жолу жапырт чабуулга кабылганын билдирди.
Киев облустук аскердик администрация башчысы Руслан Кравченко дрондун сыныгы түшкөн жерде бир аял жараат алганын, ал ооруканага жаткырылганын маалымдады.
Шаардык аскердик администрация башчысы Сергей Попко сокку үч саат бою урулганын айтты.
“Азаттык” радиосу согуш жүрүп жаткан аймактар боюнча эки тараптын тең маалыматтарын өз алдынча ырастай албайт.
2022-жылдын февраль айында согуш ачкандан бери Орусия Украинаны учкучсуз учак, ракета, авиабомба жана башка курал-жарактын ар кандай түрү менен аткылоодо. Соңку чабуулдардын көбү энергетика, медицина, билим берүү тармактарынын ишин үзгүлтүккө учуратып, жайкын тургундардын өмүрүн алууда.
Белгород шаарында сегиз тургун жаракат алды
16-сентябрда таң эрте Белгород шаарында Украинанын куралдуу күчтөрүнүн аткылоосунан сегиз жергиликтүү тургун жабыркады, алардын бири өтө оор абалда. Бул тууралуу Белгород облусунун губернатору Вячеслав Гладков маалымдады.
Анын айтымында, аткылоодон бир жеке үй жана 15 автоунаа өрттөнгөн. Ошондой эле газ түтүгү жабыркагандыгы кабарланууда. Жергиликтүү телеграм каналдар соккудан кийинки окуялардын видеолорун жарыялашты. Бул тууралуу "Азаттыктын" орус кызматы жазды.
Белгород облусунда бир сутка ичинде ондон ашык калктуу пункттар аткылоого жана дрондордун соккуларына дуушар болгон. Козинка айылында беш жеке үй өрттөнсө, Разумное кыштагында жергиликтүү тургун жарылуудан улам жаракат алып, ооруканага жеткирилген.
Москванын Украинага кеңири масштабдуу кол салуусунан кийин Орусиянын аймактары утур-утур дрондордун чабуулдарына дуушар болууда. Орусиянын Коргоо министрлиги Украина чабуулдарынын "мизи майтарылып", ракеталар жана дрондор жок кылынганы тууралуу маалымат берип келет. Көпчүлүк учурларда Киев бул билдирүүлөргө комментарий бербейт.
Украина: Орусиянын 53 дрону жок кылынганын билдирди
Украинанын куралдуу күчтөрү 16-сентябрга караган түнү Орусия тарабынан учурулган 53 дрондун жок кылынганын билдирди.
"Душман Shahed-131/136 үлгүсүндөгү сокку уруучу дрондор менен чабуул жасады. 15-сентябрдан 16-сентябрга караган түнү, саат 20:00дөн 06:00гө чейин Аба күчтөрүнүн радиотехникалык күчтөрү 56 дронду аныктап, байкоо салды (Курск жана Ейск шаарларынан учурулган). Негизги чабуул багыты – Киев облусу болду", – деп айтылат маалыматта.
Аба күчтөрүнүн маалыматына ылайык, Киев, Винница, Полтава, Сумы, Запорожье, Кировоград, Николаев, Днепропетровск жана Черкассы облустарында 53 дрон жок кылынган.
"Дагы үч душман дрону бир нече аймакта жок болуп кеткен, алдын ала маалыматтар боюнча жабыркагандар жана кыйроолор жок", – деп билдиришти аскерлер.
Буга чейин Киев шаардык аскердик администрациясы 16-сентябрга караган түнү Киевге Орусиянын куралдуу күчтөрү массалык сокку урганын билдирген.
Алдын ала маалыматтар боюнча, Киевде жабыркагандар жана кыйроолор болгон жок.
Ал эми 15-сентябрда Украинанын Харьков шаарында көп кабаттуу үйгө жасалган аба соккусунан бир киши набыт болуп, 40тан ашуун киши жаракат алганын, анын төртөө балдар экенин шаар мэриясы билдирген.
Орусия күчтөрү үзгүлтүксүз түрдө сокку уруучу дрондор, ракеталар, КАБ жана РСЗО менен Украинанын аймактарына чабуул жасап жатат.
Орусиянын жетекчилиги кеңири масштабдуу согуш учурунда Орусия армиясы Украина шаарлары менен айылдарындагы жарандык инфраструктураларга атайылап сокку уруп, жайкын тургундарды өлтүрүп, оорукана, мектеп, балдар бакчалары, энергетикалык жана суу камсыздоо объектилерин талкалап жатканын четке кагууда.
Украинанын бийликтери жана эл аралык уюмдар бул чабуулдарды Орусиянын аскердик кылмыштары катары квалификациялап, алар атайылап жасалганын баса белгилеп келишет.